കൊച്ചി-ബെംഗളൂരു വ്യാവസായിക ഇടനാഴിയുടെ ആദ്യ നോഡായ പാലക്കാട് സ്മാർട്ട് സിറ്റിയുടെ (ഇന്റഗ്രേറ്റഡ് മാനുഫാക്ചറിംഗ് ക്ലസ്റ്റർ) അടിസ്ഥാന സൗകര്യ വികസനത്തിനുള്ള ടെൻഡർ നടപടികൾ കേരളം പൂർത്തിയാക്കി. ദിലീപ് ബിൽഡ്കോൺ ലിമിറ്റഡും (ഡിബിഎൽ) പിഎസ്പി പ്രോജക്ട്സ് ലിമിറ്റഡും സംയുക്ത സംരംഭത്തിനാണ് നിർമ്മാണ കരാർ.
ഇതോടെ, കഴിഞ്ഞ വർഷം രാജ്യത്ത് അനുവദിച്ച 12 വ്യാവസായിക ഇടനാഴി-സ്മാർട്ട് സിറ്റി പദ്ധതികളിൽ അടിസ്ഥാന സൗകര്യ വികസനത്തിനുള്ള നടപടിക്രമങ്ങൾ പൂർത്തിയാക്കിയ ആദ്യ സംസ്ഥാനമായി കേരളം മാറി. ജിഎസ്ടി ഉൾപ്പെടെ 1316.13 കോടി രൂപയ്ക്കാണ് കരാർ ഒപ്പിട്ടത്. നിർമ്മാണ പ്രവർത്തനങ്ങൾ ഉടൻ ആരംഭിക്കും.
പാലക്കാട് സ്മാർട്ട് സിറ്റി പദ്ധതിക്ക് ആകെ 3,600 കോടി രൂപ ചെലവ് പ്രതീക്ഷിക്കുന്നു. ഭൂമി ഏറ്റെടുക്കുന്നതിനായി സംസ്ഥാന സർക്കാർ രണ്ട് വർഷം മുമ്പ് കിഫ്ബി വഴി 1,489 കോടി രൂപ ചെലവഴിച്ചിരുന്നു. 1,450 ഏക്കർ ഭൂമി ഇതിനകം ഏറ്റെടുത്തു കഴിഞ്ഞു. നിലവിൽ കിൻഫ്രയുടെ കൈവശമുള്ള ഭൂമി ഘട്ടം ഘട്ടമായി കോറിഡോർ വികസന കോർപ്പറേഷന് കൈമാറുകയാണ്. ആദ്യ ഘട്ടത്തിൽ കഴിഞ്ഞ വർഷം ഡിസംബറിലും 220 ഏക്കർ ഭൂമി മാർച്ചിലും കൈമാറി, അതേസമയം കേന്ദ്രം രണ്ട് ഘട്ടങ്ങളിലായി 313.5 കോടി രൂപയും കൈമാറി.
ചെന്നൈ- ബാംഗ്ലൂർ വ്യാവസായിക ഇടനാഴി കൊച്ചിയിലേക്ക് നീട്ടി കൊച്ചി- ബംഗളൂരു വ്യാവസായിക ഇടനാഴി നിർമിക്കാൻ 2019 ആഗസ്റ്റിലാണ് തീരുമാനിച്ചത്. സംസ്ഥാന സർക്കാരിനും കേന്ദ്രസർക്കാരിനും തുല്യപങ്കാളിത്തമുള്ള പദ്ധതി പ്രാവർത്തികമാക്കുന്നതിനുള്ള നടപടിക്രമങ്ങൾ കേരളം 2020 സെപ്റ്റംബറിൽതന്നെ ആരംഭിച്ചു. 2022 ജൂലൈ മാസമായപ്പോഴേക്കും സ്ഥലമേറ്റെടുപ്പ് 85 ശതമാനവും കേരളം പൂർത്തിയാക്കി. 1152 ഏക്കർ ഭൂമിയുടെ ഏറ്റെടുപ്പിന് 14 മാസം മാത്രമാണ് സംസ്ഥാനത്തിനു വേണ്ടിവന്നത്. കഴിഞ്ഞ ജൂണിൽ മന്ത്രി പി. രാജീവ് കേന്ദ്ര വ്യവസായ വാണിജ്യ മന്ത്രി പീയൂഷ് ഗോയലിനെ സന്ദർശിച്ച് വ്യാവസായിക ഇടനാഴിക്കുള്ള അംഗീകാരം ലഭ്യമാക്കണമെന്ന് ആവശ്യപ്പെടുകയും സംസ്ഥാനം പൂർത്തിയാക്കിയ നടപടിക്രമങ്ങളെപ്പറ്റി ബോധ്യപ്പെടുത്തുകയും ചെയ്തിരുന്നു.
കേരള സർക്കാരിനു കീഴിലുള്ള കിന്ഫ്രയും കേന്ദ്ര സര്ക്കാരിനു കീഴിലുള്ള നാഷണൽ ഇൻഡസ്ട്രിയൽ കോറിഡോർ ഡെവലപ്മെന്റ് ആൻഡ് ഇംപ്ലിമെന്റേഷൻ ട്രസ്റ്റും (എൻഐസിഡിഐടി) ചേർന്ന് തുല്യ ഓഹരി പങ്കാളിത്തത്തോടെ രൂപംകൊടുത്ത പ്രത്യേകോദ്ദേശ്യ സ്ഥാപനമായ കേരള ഇൻഡസ്ട്രിയൽ കോറിഡോർ ഡെവലപ്മെന്റ് കോർപ്പറേഷൻ ലിമിറ്റഡ് (കെഐസിഡിസി) ആണ് പാലക്കാട് സ്മാര്ട് സിറ്റിയുടെ വികസനപ്രവര്ത്തനങ്ങള് ഏകോപിപ്പിക്കുന്നത്.
സ്മാർട്ട് സിറ്റിയുടെ രൂപകൽപ്പന, നിർമ്മാണം, പരിപാലനം എന്നിവ ഉൾപ്പെടുന്ന ഇപിസി (എഞ്ചിനീയറിംഗ്, പ്രൊക്യുർമെന്റ് ആൻഡ് കൺസ്ട്രക്ഷൻ) കരാറിനായി ദേശീയ തലത്തിൽ ടെൻഡർ ക്ഷണിച്ചു. അടിസ്ഥാന സൗകര്യ വികസനത്തിൽ പ്രധാനമായും പദ്ധതി പ്രദേശത്ത് ആവശ്യമായ റോഡുകൾ, ഡ്രെയിനേജുകൾ, പാലങ്ങൾ, ജലവിതരണ ശൃംഖല, അഗ്നിശമന മാർഗങ്ങൾ, ജല പുനരുപയോഗ സംവിധാനങ്ങൾ, മലിനജല ലൈനുകൾ, വൈദ്യുതി വിതരണ സംവിധാനങ്ങൾ, മലിനജല ശുദ്ധീകരണ പ്ലാന്റ്, വ്യാവസായിക മലിനജല ശേഖരണ സംവിധാനങ്ങൾ, മലിനജല ശുദ്ധീകരണ പ്ലാന്റ് തുടങ്ങിയവ ഉൾപ്പെടുന്നു.
