ഡാളസ് : ഡാളസിലെ എഴുത്തുകാരുടെയും സാഹിത്യാസ്വാദകരുടെയും സംഘടനയായ കേരള ലിറ്റററി സൊസൈറ്റി, ഡാളസ്സിന്റെ 2025 പ്രവർത്തനോത്ഘാടനവും സാഹിത്യ പുരസ്കാരദാനവും മാർച്ച് 8 ശനിയാഴ്ച രാവിലെ 10:30 ന് ഗാർലാൻഡ് പബ്ലിക് ലൈബ്രറി ഹാളിൽ വച്ച് നടത്തപ്പെടും. ഈ വർഷത്തെ മലയാളം മിഷൻ പ്രവാസി പുരസ്കാരം നേടിയ പ്രസിദ്ധ സാഹിത്യകാരനായ കെ വി പ്രവീൺ പരിപാടി ഉൽഘാടനം ചെയ്യും.
പ്രവാസി മലയാള കവി ജേക്കബ് മനയിലിൻറെ പേരിലുള്ള കേരള ലിറ്റററീ സൊസൈറ്റി മനയിൽ കവിതാ അവാർഡ് 2024, ശ്രീമതി ജെസ്സി ജയകൃഷ്ണൻ സ്വീകരിക്കും. പ്രശസ്ത മലയാള കവി സെബാസ്റ്റ്യൻ ജൂറിയായ അവാർഡ് കമ്മിറ്റിയാണ് ജെസ്സിയുടെ “നഷ്ട്ടാൾജിയ” എന്ന കവിത തിരഞ്ഞെടുത്തത്.
കേരള ലിറ്റററി സൊസൈറ്റി ഡാളസ് ഏർപ്പെടുത്തിയ എബ്രഹാം തെക്കേമുറി സ്മാരക കഥാ അവാർഡ് ഡോ. മധു നമ്പ്യാർക്കു നല്കും. അദ്ദേഹം എഴുതിയ “ചാര നിറത്തിലെ പകലുകൾ” എന്ന കഥയ്ക്കാണ് അവാര്ഡ്. പ്രശസ്ത കഥാകൃത്ത് വിനു ഏബ്രഹാമിന്റെ അദ്ധ്യക്ഷതയിൽ ഉള്ള ജൂറി അംഗങ്ങളാണ് പ്രസ്തുത കഥ തിരഞ്ഞെടുത്തത്.
കേരള ലിറ്റററി സൊസൈറ്റി ഡാളസിന്റെ ഈ വർഷത്തെ പ്രവർത്തനങ്ങൾക്കും ഇതോടൊപ്പം ഔദ്യോഗിക തുടക്കം കുറിക്കും. മാർച്ച് 8 ശനിയാഴ്ച ഗാർലാൻഡ് പബ്ലിക് ലൈബ്രറി ഹാളിൽ രാവിലെ 10:30ന് തന്നെ എല്ലാ സാഹിത്യ പ്രേമികളും എത്തിച്ചേരണമെന്ന് പ്രസിഡന്റ് ഷാജു ജോണ് അഭ്യർത്ഥിച്ചു.
കൂടുതല് വിവരങ്ങള്ക്ക്: സെക്രട്ടറി 214 763 3079
