തിരുവനന്തപുരം: ഇത്തവണത്തെ ഓണാഘോഷം വ്യത്യസ്തമായ പരിപാടികളോടെ സംഘടിപ്പിക്കുമെന്ന് ടൂറിസം മന്ത്രി പി എ മുഹമ്മദ് റിയാസ് പറഞ്ഞു. തിരുവനന്തപുരത്ത് നടന്ന സംഘാടക സമിതി യോഗം ഉദ്ഘാടനം ചെയ്യുകയായിരുന്നു മന്ത്രി. പൊതുവിദ്യാഭ്യാസ മന്ത്രി വി ശിവൻകുട്ടി യോഗത്തിൽ അദ്ധ്യക്ഷത വഹിച്ചു.
തിരുവനന്തപുരത്ത് മുഖ്യമന്ത്രി പിണറായി വിജയൻ ഉദ്ഘാടനം ചെയ്യുന്ന ഓണാഘോഷം ഒരു പൊതു പ്രമേയത്തെ അടിസ്ഥാനമാക്കിയായിരിക്കും. ഒരു പൊതു രൂപകൽപ്പനയും ഉണ്ടായിരിക്കും. ഘോഷയാത്രയും ഒരു പൊതു പ്രമേയത്തെ അടിസ്ഥാനമാക്കിയായിരിക്കും എന്ന് മന്ത്രി പറഞ്ഞു. വേദികളിൽ ലഭ്യമായ സൗകര്യങ്ങൾക്കനുസരിച്ച് മിക്സഡ് ഫോർമാറ്റിലും പരിപാടികൾ സംഘടിപ്പിക്കും.
നഗരത്തിലെ വൈദ്യുത പ്രദർശനം പുലർച്ചെ ഒരു മണി വരെ ആളുകൾക്ക് ആസ്വദിക്കാൻ കഴിയുന്ന തരത്തിൽ ക്രമീകരണങ്ങൾ ചെയ്യാൻ പോലീസിന് നിർദ്ദേശം നൽകുമെന്ന് ടൂറിസം മന്ത്രി പറഞ്ഞു. വിദേശികൾ വരുന്നുണ്ടെങ്കിൽ അവർക്ക് ആകർഷകമായ രീതിയിൽ ഒരു പ്രത്യേക പവലിയൻ ഒരുക്കണമെന്ന് മന്ത്രി പറഞ്ഞു. മാധ്യമങ്ങൾക്കും വ്ളോഗർമാർക്കും പ്രത്യേക സൗകര്യങ്ങളും ഒരുക്കുമെന്ന് മന്ത്രി പറഞ്ഞു.
മാലിന്യ നിർമാർജനം ഉൾപ്പെടെയുള്ള കാര്യങ്ങളിൽ ഗ്രീൻപ്രോട്ടോക്കോൾ കമ്മിറ്റിയുടെ ശ്രദ്ധയുണ്ടാവണമെന്ന് അധ്യക്ഷത വഹിച്ച മന്ത്രി വി. ശിവൻകുട്ടി പറഞ്ഞു. എല്ലാത്തവണയും നഗരശുചീകരണം മികച്ച രീതിയിൽ കൈകാര്യം ചെയ്യാറുണ്ട്. അതു തുടരുന്നതിനുള്ള നടപടികൾ സ്വീകരിക്കണം. മാലിന്യം കൈകാര്യം ചെയ്യുന്നത് സംബന്ധിച്ച ബോധവത്ക്കരണവും ആലോചിക്കും. പ്രത്യേക മീഡിയ സെൽ നേരത്തെ തുടങ്ങും. കേരളീയം പരിപാടിയുടേതിന് സമാനമായ രീതിയിൽ ഫുഡ്ഫെസ്റ്റിവൽ സംഘടിപ്പിക്കും. ഫുഡ് സ്റ്റാളുകളും ആകർഷകമായ രീതിയിൽ സജ്ജീകരിക്കുമെന്ന് മന്ത്രി പറഞ്ഞു. അതോടൊപ്പം വിപണന മേളകളും ശ്രദ്ധേയമായ രീതിയിൽ സംഘടിപ്പിക്കും. ഓണാഘോഷത്തിന്റെ ഭാഗമായുള്ള സുരക്ഷാ ക്രമീകരണങ്ങളിലും ജാഗ്രത പുലർത്തും. എം.എൽ.എമാർ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ യോഗത്തിൽ സംബന്ധിച്ചു.
പിആര്ഡി, കേരള സര്ക്കാര്
