ഫിലഡൽഫിയ: ലോക മലയാളികളുടെ അഭിമാന സംഘടനയായ ഫോമയുടെ മിഡ് ടെം ജനറൽ ബോഡി യോഗം ഒക്ടോബർ 25 ശനിയാഴ്ച ഫിലഡൽഫിയ സീറോ മലബാർ കത്തോലിക്കാ പള്ളിയുടെ ഓഡിറ്റോറിയത്തിൽ വച്ച് നടത്തുമെന്ന് സംഘാടകർ അറിയിച്ചു,
ഫോമ പ്രസിഡന്റ് ബേബി മണക്കുന്നേൽ, വൈസ് പ്രസിഡന്റ് ശാലു പുന്നൂസ്, സെക്രട്ടറി ബൈജു വർഗീസ്, ജോയിന്റ് സെക്രട്ടറി പോൾ ജോസ്, ട്രഷറർ സിജിൽ പാലക്കലോടി, ജോയിന്റ് സെക്രട്ടറി അനുപമ കൃഷ്ണൻ എന്നിവരടങ്ങുന്ന എക്സിക്യൂട്ടീവ് കമ്മിറ്റി നേരിട്ടാണ് മിഡ് ടേം ജനറൽബോഡി നടത്തുന്നത്.
ഫിലഡൽഫിയിൽ നിന്നുള്ള വൈസ് പ്രസിഡണ്ട് ശാലു പുന്നൂസിന്റെ പ്രത്യേക ആവശ്യപ്രകാരമാണ് മിഡ് ഈ ജനറൽ ബോഡി ഫിലഡൽഫിയയില് നടത്തുവാൻ തീരുമാനിച്ചത്.
വിദൂര സ്ഥലങ്ങളിൽ നിന്നും ജനറൽ ബോഡിയിൽ പങ്കെടുക്കുവാൻ എത്തിച്ചേരുന്ന വിവിധ സംഘടനാ പ്രതിനിധികൾക്കായി റാഡിസൺ ഹോട്ടലിൽ (Raddison Hotel, 2400 Old Lincoln Hwy, Trevose, PA 19053) നേരത്തെ ബ്ലോക്ക് ചെയ്തിരുന്ന 40 മുറികളുടെയും ബുക്കിംഗ് പൂർത്തിയായിക്കഴിഞ്ഞു. ജനറൽ ബോഡിയിൽ പങ്കെടുക്കുവാനായി ഏകദേശം നൂറോളം പേര് വെള്ളിയാഴ്ച വൈകുന്നേരം തന്നെ എത്തിച്ചേരുമെന്ന് അറിയിച്ചിട്ടുണ്ട്.
ഒക്ടോബർ 25 ശനിയാഴ്ച രാവിലെ 10 മണിക്ക് നാഷണൽ കമ്മിറ്റി ആരംഭിക്കും. തുടര്ന്ന് 11 മണിക്ക് ജനറൽ ബോഡി, ഉച്ചയ്ക്ക് 12 മണി മുതൽ ഒന്നു വരെ ലഞ്ച്, ഒന്നു മുതൽ മൂന്നു വരെ ബൈലോ അമെൻഡ്മെന്റ്, അതിനുശേഷം മൂന്നരയ്ക്ക് റീജിയന്റെ കൺവെൻഷൻ കിക്കോഫ്, നാലുമണിക്ക് ബിസിനസ് ഫോറത്തിന്റെ നാഷണൽ കിക്കോഫ്, അഞ്ചുമണിയോടെ പ്രാദേശിക കലാകാരന്മാരെ ഉൾപ്പെടുത്തി ഒരുക്കിയിരിക്കുന്ന അതിമനോഹരമായ കലാസന്ധ്യ എന്നിവയാണ് പ്രോഗ്രാമുകൾ.
വിഭവസമൃദ്ധമായ സദ്യയും, നയനമനോഹരങ്ങളായ കലാപരിപാടികളും തീർത്തും സൗജന്യമായാണ് ഒരുക്കിയിരിക്കുന്നത്. ഫോമ എക്സിക്യൂട്ടീവ് നാഷണൽ കമ്മിറ്റിയും, മിഡ് അറ്റ്ലാന്റിക് റീജണൽ ആർ വി പി പത്മരാജൻ, നാഷണൽ കമ്മിറ്റി മെമ്പേഴ്സ് ജിയോ ജോസഫ്, ഷാജി മറ്റത്താനി എന്നിവർ പ്രോഗ്രാമിന്റെ വിജയത്തിനായി അണിയറയിൽ പ്രവർത്തിക്കുന്നു.
