വ്യാജ കൊലപാതകക്കുറ്റം ചുമത്തപ്പെട്ടതിനെത്തുടര്ന്ന് ഇന്ത്യന് വംശജനായ സുബ്രഹ്മണ്യം വേദം ജയിലില് കിടന്നത് 43 വർഷം. കുറ്റവിമുക്തനാക്കിയെങ്കിലും, 43 വര്ഷം മുമ്പുണ്ടായിരുന്ന ഒരു മയക്കുമരുന്ന് കേസിന്റെ അടിസ്ഥാനത്തിൽ അദ്ദേഹത്തെ നാടുകടത്താൻ യുഎസ് സർക്കാരിന്റെ ശ്രമം കോടതി തടഞ്ഞു.
പെന്സില്വാനിയ: 64 വയസ്സുള്ള ഇന്ത്യൻ-അമേരിക്കൻ സുബ്രഹ്മണ്യ വേദത്തിന്റെ കഥ അമേരിക്കയിലെ നീതിയെയും മനുഷ്യത്വത്തെയും കുറിച്ച് നിരവധി ചോദ്യങ്ങളാണ് ഉയർത്തുന്നത്. വ്യാജ കൊലപാതകക്കുറ്റം ചുമത്തി സുബ്രഹ്മണ്യം 43 വർഷമാണ് ജയിലിൽ കിടന്നത്. 2025 ഓഗസ്റ്റിൽ കോടതി അദ്ദേഹത്തെ നിരപരാധിയാണെന്ന് പ്രഖ്യാപിച്ചതിനു ശേഷവും അദ്ദേഹത്തിന്റെ പ്രശ്നങ്ങൾ പരിഹരിക്കപ്പെട്ടിട്ടില്ല. ഇപ്പോൾ, യുഎസ് സർക്കാർ അദ്ദേഹത്തെ നാടുകടത്താൻ ശ്രമിക്കുകയാണ്. എന്നാല്, രണ്ട് യുഎസ് കോടതികൾ അദ്ദേഹത്തിന്റെ നാടുകടത്തൽ താൽക്കാലികമായി തടഞ്ഞു.
മാതാപിതാക്കളോടൊപ്പം ഇന്ത്യയിൽ നിന്ന് നിയമപരമായി അമേരിക്കയിലേക്ക് കുടിയേറിയപ്പോൾ സുബ്രഹ്മണ്യം വേദത്തിന് ഒമ്പത് മാസം മാത്രമേ പ്രായമുണ്ടായിരുന്നുള്ളൂ. പെൻ സ്റ്റേറ്റ് യൂണിവേഴ്സിറ്റിയിൽ പ്രൊഫസറായിരുന്നു അദ്ദേഹത്തിന്റെ പിതാവ്, സ്റ്റേറ്റ് കോളേജിലാണ് സുബ്രഹ്മണ്യം വേദം പഠിച്ചത്. അമേരിക്കയിലെ നിയമപരമായ സ്ഥിര താമസക്കാരനുമാണ്. 1982-ൽ അറസ്റ്റിലാകുന്നതിന് മുമ്പ് അദ്ദേഹത്തിന്റെ പൗരത്വ അപേക്ഷ അംഗീകരിച്ചിരുന്നുവെന്ന് അദ്ദേഹത്തിന്റെ അഭിഭാഷകർ പറയുന്നു.
1980-ൽ, തന്റെ സുഹൃത്തായ തോമസ് കിൻസറിനെ കൊലപ്പെടുത്തിയതിന് അദ്ദേഹത്തിനെതിരെ കൊലക്കുറ്റം ചുമത്തി. പോലീസ് പറയുന്നതനുസരിച്ച്, വേദം അവസാനമായി കിൻസറിനൊപ്പമാണ് കണ്ടതെന്നാണ്. കൃത്യമായ തെളിവുകളോ കാരണമോ ഉണ്ടായിരുന്നില്ല, എന്നിട്ടും അദ്ദേഹം രണ്ടു തവണ ശിക്ഷിക്കപ്പെട്ടു. പതിറ്റാണ്ടുകൾക്ക് ശേഷം, 2025 ഓഗസ്റ്റിൽ, പുതിയ ബാലിസ്റ്റിക് തെളിവുകൾ എല്ലാം മാറ്റിമറിച്ചു.
വേദത്തിന്റെ നിരപരാധിത്വം തെളിയിക്കാൻ സാധ്യതയുള്ള തെളിവുകൾ സർക്കാർ പ്രോസിക്യൂഷൻ മുമ്പ് തടഞ്ഞു വെച്ചിരുന്നു എന്ന് കോടതി കണ്ടെത്തി. തുടർന്നാണ് കോടതി അദ്ദേഹത്തിന്റെ ശിക്ഷ റദ്ദാക്കുകയും നിരപരാധിയാണെന്ന് പ്രഖ്യാപിക്കുകയും അദ്ദേഹത്തെ വിട്ടയക്കാൻ ഉത്തരവിടുകയും ചെയ്തത്. എന്നാല്, ഒക്ടോബർ 3 ന് വേദം പെൻസിൽവാനിയ ജയിലിൽ നിന്ന് പുറത്തുപോയ ഉടൻ, ഇമിഗ്രേഷൻ ഉദ്യോഗസ്ഥർ (ICE) അദ്ദേഹത്തെ കസ്റ്റഡിയിലെടുത്തു.
അതേസമയം, ഏതു വിധേനയും ട്രംപ് ഭരണകൂടം അദ്ദേഹത്തെ മയക്കുമരുന്ന് കേസിൽ അമേരിക്കയിൽ നിന്ന് നാടുകടത്താൻ ശ്രമിക്കുകയും യുഎസ് ഇമിഗ്രേഷൻ ഡിപ്പാർട്ട്മെന്റ് (ഐസിഇ) അതിനുള്ള നടപടിക്രമങ്ങള് ആരംഭിക്കുകയും ചെയ്തു. വേദമിന് വെറും 20 വയസ്സുള്ളപ്പോൾ നടന്ന സംഭവമാണ് ഇപ്പോള് ഐസിഇ ‘കുത്തിപ്പൊക്കി’ അദ്ദേഹത്തെ നാടു കടത്താന് ശ്രമിക്കുന്നതെന്നും, 43 വര്ഷങ്ങള് യാതൊരു ഒഴികഴിവുമില്ലാതെ ജയിലില് കഴിഞ്ഞ വേദമിനോട് കാണിക്കുന്ന അനീതിയാണിതെന്നും അദ്ദേഹത്തിന്റെ അഭിഭാഷകര് പറയുന്നു. തടവില് കഴിയവേ അദ്ദേഹം മറ്റ് നിരവധി തടവുകാരെ പഠിക്കുകയും പഠിപ്പിക്കുകയും ചെയ്തിട്ടുണ്ടെന്നും അഭിഭാഷകർ പറയുന്നു. ഇത്രയും വർഷത്തെ അനീതിക്ക് ശേഷം, സർക്കാർ അദ്ദേഹത്തിന് പൗരത്വവും ബഹുമാനവും നൽകണമെന്നും, വീണ്ടും ശിക്ഷ വിധിക്കുന്നത് മനുഷ്യത്വരഹിതമാണെന്നും അവർ വാദിക്കുന്നു.
കഴിഞ്ഞ ആഴ്ച, ബ്യൂറോ ഓഫ് ഇമിഗ്രേഷൻ അപ്പീൽസ് (BIA) അദ്ദേഹത്തിന്റെ കേസ് പുനഃപരിശോധിക്കുന്നതുവരെ നാടുകടത്തൽ നിർത്തിവയ്ക്കാൻ ഒരു ഇമിഗ്രേഷൻ ജഡ്ജി ഉത്തരവിട്ടു. കൂടാതെ, പെൻസിൽവാനിയ ജില്ലാ കോടതി ഇളവ് അനുവദിക്കുകയും സ്റ്റേ ഓർഡർ പുറപ്പെടുവിക്കുകയും ചെയ്തു. ഈ പ്രക്രിയയ്ക്ക് നിരവധി മാസങ്ങൾ എടുക്കുമെന്ന് പ്രതീക്ഷിക്കുന്നു.
കൊലപാതകക്കുറ്റം ചുമത്തി കുറ്റവിമുക്തനാക്കുന്നത് മയക്കുമരുന്ന് കേസിന്റെ അവസാനമല്ലെന്ന് യുഎസ് ഹോംലാൻഡ് സെക്യൂരിറ്റി വകുപ്പ് പറയുന്നു. അതേസമയം, ഇത് മനുഷ്യാവകാശ വിഷയമാണെന്നും 43 വർഷത്തെ ജയിൽവാസത്തിന് ശേഷം നിരപരാധിയായ ഒരാളെ നാടുകടത്തുന്നത് നീതിയുടെ തത്വങ്ങളുടെ ലംഘനമാണെന്നും വേദത്തിന്റെ അഭിഭാഷകരും കുടുംബവും പറയുന്നു. വേദം ഇപ്പോൾ ഒരു കാര്യം മാത്രമേ പ്രതീക്ഷിക്കുന്നുള്ളൂ: യഥാർത്ഥ സ്വാതന്ത്ര്യം, അത് അദ്ദേഹത്തിന് ഇതുവരെ ലഭിച്ചിട്ടില്ല.
