തിരുവനന്തപുരം: സംസ്ഥാനത്തെ പോലീസ് സ്റ്റേഷൻ കോമ്പൗണ്ടുകളിലും പരിസരത്തും വർഷങ്ങളായി കൂട്ടിയിട്ടിരിക്കുന്ന വാഹനങ്ങൾ നീക്കം ചെയ്യുന്നതിനായി ആഭ്യന്തര വകുപ്പ് ഒരു പുതിയ പദ്ധതി ആരംഭിച്ചു. “സ്പേസ്” (Scrap Processing for Area Cleanup and Enhancement – SPACE) എന്ന് പേരിട്ടിരിക്കുന്ന ഈ വിപ്ലവകരമായ പദ്ധതി ആഭ്യന്തര മന്ത്രി രമേശ് ചെന്നിത്തല ഒരു പത്രസമ്മേളനത്തിൽ പ്രഖ്യാപിച്ചു. വളരെക്കാലമായി പോലീസ് സ്റ്റേഷനുകൾ നേരിടുന്ന ഒരു പ്രധാന പ്രശ്നത്തിന് ഇത് ശാശ്വത പരിഹാരം നൽകും.
‘റീക്ലെയിം, റിന്യൂ, റിവൈവ്’
കേരള പോലീസ് ഹൗസിംഗ് ആൻഡ് കൺസ്ട്രക്ഷൻ കോർപ്പറേഷൻ ലിമിറ്റഡിന്റെ (KPHCC) നേതൃത്വത്തിൽ, കേന്ദ്ര പൊതുമേഖലാ സ്ഥാപനമായ ‘സീറോ’ (CERO)-യുമായി സഹകരിച്ചാണ് പദ്ധതി നടപ്പാക്കുന്നത്. ‘റീക്ലെയിം, റിന്യൂ, റിവൈവ്’ (Reclaim, Renew, Revive) എന്ന ടാഗ്ലൈനിലാണ് പദ്ധതി വിഭാവനം ചെയ്തിരിക്കുന്നത്. സംസ്ഥാന പോലീസ് മേധാവി ചെയർമാനായും കെ.പി.എച്ച്.സി.സി. മാനേജിംഗ് ഡയറക്ടർ അംഗവുമായുള്ള ഉന്നതതല സമിതിയാണ് പദ്ധതിയുടെ കൃത്യമായ നടത്തിപ്പിന് രൂപം നൽകുക.
സംസ്ഥാനത്തെ വിവിധ പൊലീസ് സ്റ്റേഷനുകളിൽ കെട്ടിക്കിടക്കുന്ന വാഹനങ്ങളുടെ കൃത്യമായ കണക്കെടുപ്പ് നടത്തി നടപടികൾ സമയബന്ധിതമായി പൂർത്തിയാക്കാൻ നിർദേശം നൽകിയിട്ടുണ്ടെന്ന് മന്ത്രി അറിയിച്ചു. സ്റ്റേഷൻ പരിസരങ്ങൾ പൂർണ്ണമായും ശുചിയാക്കുകയാണ് ഇതിലൂടെ ലക്ഷ്യമിടുന്നത്.
വർഷങ്ങളായി ഇത്തരത്തിൽ വാഹനങ്ങൾ കിടക്കുന്നത് പൊലീസ് സ്റ്റേഷനുകളുടെ പ്രവർത്തനത്തെ ബാധിക്കുന്നതിനൊപ്പം പൊതുജനങ്ങൾക്കും വലിയ ബുദ്ധിമുട്ട് സൃഷ്ടിക്കുന്നതായി വ്യാപക പരാതിയുണ്ടായിരുന്നു. നിലവിൽ വാഹനങ്ങൾ ലേലം ചെയ്യുന്ന രീതിയുണ്ടെങ്കിലും അത് പലപ്പോഴും പ്രായോഗികമായ ഒരു ശാശ്വത പരിഹാരമായിരുന്നില്ല. ഈ സാഹചര്യത്തിലാണ് പുതിയ സ്ക്രാപ്പ് പ്രോസസിംഗ് പദ്ധതിയുമായി സർക്കാർ മുന്നോട്ട് വരുന്നത്. പദ്ധതിയുടെ വിശദമായ നടത്തിപ്പ് സംബന്ധിച്ച റിപ്പോർട്ട് കമ്മിറ്റി ചെയർമാന്റെ നേതൃത്വത്തിൽ ഉടൻ തീരുമാനിക്കുമെന്നും മന്ത്രി രമേശ് ചെന്നിത്തല വ്യക്തമാക്കി.
പിആര്ഡി, കേരള സര്ക്കാര്
