തിരുവനന്തപുരം: സിഎംആർഎൽ–എക്സാലോജിക് സാമ്പത്തിക ഇടപാട് കേസിൽ നിർണായക വഴിത്തിരിവ്. വീണാ വിജയനും പിണറായി വിജയനും എതിരായി സിഎംആർഎൽ എംഡി ശശിധരൻ കർത്ത മൊഴി നൽകിയിരുന്നുവെന്ന എൻഫോഴ്സ്മെന്റ് ഡയറക്ടറേറ്റിന്റെ (ഇഡി) അവകാശവാദങ്ങൾക്കിടെയാണ്, ആ മൊഴി പിൻവലിക്കാൻ കർത്തയുടെ ഭാഗത്തുനിന്ന് സമർപ്പിച്ച സത്യവാങ്മൂലത്തിലെ വിവരങ്ങൾ പുറത്തുവന്നിരിക്കുന്നത്. ഇഡി ഉദ്യോഗസ്ഥർക്കെതിരെ ഗുരുതര ആരോപണങ്ങളാണ് സത്യവാങ്മൂലത്തിൽ ഉന്നയിച്ചിരിക്കുന്നത്.
ആശുപത്രിയിൽ ചികിത്സയിൽ കഴിയുന്നതിനിടെ ഇഡി ഉദ്യോഗസ്ഥർ സമ്മർദം ചെലുത്തിയെന്നും ബലംപ്രയോഗിച്ച് വിരലടയാളം പതിപ്പിച്ചെന്നും കർത്ത ആരോപിക്കുന്നു. മാനസികമായി പീഡിപ്പിച്ചുവെന്നും അദ്ദേഹത്തിന്റെ ഭാഗത്തുനിന്ന് ആരോപണമുണ്ട്. 2024-ൽ കർത്തയ്ക്കുവേണ്ടി സഹോദരൻ സമർപ്പിച്ച സത്യവാങ്മൂലത്തിലാണ് ഈ പരാമർശങ്ങളുള്ളത്.
ആശുപത്രിക്കിടക്കയിൽ കഴിയുമ്പോഴും അന്വേഷണ ഉദ്യോഗസ്ഥരുടെ സമ്മർദം തുടർന്നുവെന്നാണ് കർത്തയുടെ ആരോപണം. ഇഡിയുടെ നടപടികളിൽ കുടുംബാംഗങ്ങൾ കടുത്ത ആശങ്ക പ്രകടിപ്പിച്ചിരുന്നതായും സത്യവാങ്മൂലത്തിൽ പറയുന്നു.
പിണറായി വിജയനുമായുള്ള വ്യക്തിപരമായ അടുപ്പത്തിന്റെ പേരിലാണ് വീണാ വിജയനും എക്സാലോജിക് കമ്പനിക്കും സിഎംആർഎൽ പണം നൽകിയതെന്നായിരുന്നു ഇഡിയുടെ വാദം. വീണാ വിജയനോ എക്സാലോജിക്കോ സിഎംആർഎലിന് സേവനങ്ങളൊന്നും നൽകിയിട്ടില്ലെന്ന് കർത്ത മൊഴി നൽകിയതായും ഇഡി നേരത്തെ അവകാശപ്പെട്ടിരുന്നു.
എന്നാൽ, ഈ മൊഴി പിൻവലിക്കുന്നതായി വ്യക്തമാക്കുന്ന സത്യവാങ്മൂലം കർത്തയുടെ ഭാഗത്തുനിന്ന് സമർപ്പിക്കപ്പെട്ടതോടെയാണ് കേസിൽ പുതിയ ചർച്ചകൾക്ക് വഴിതുറന്നിരിക്കുന്നത്. മൊഴി രേഖപ്പെടുത്തിയ സാഹചര്യം സംബന്ധിച്ച കർത്തയുടെ ആരോപണങ്ങളും ഇഡിയുടെ നേരത്തെയുള്ള അവകാശവാദങ്ങളും ഇതോടെ വീണ്ടും പരിശോധനയ്ക്കും ചർച്ചയ്ക്കും വിധേയമാകുകയാണ്.
കേസിലെ നിർണായക തെളിവുകളിലൊന്നായി ചൂണ്ടിക്കാട്ടപ്പെട്ട മൊഴിയുടെ വിശ്വാസ്യതയും അത് രേഖപ്പെടുത്തിയ സാഹചര്യവുമാണ് പുതിയ വെളിപ്പെടുത്തലുകളുടെ പശ്ചാത്തലത്തിൽ ശ്രദ്ധാകേന്ദ്രമാകുന്നത്.
