ജംഷഡ്പൂർ: ഝാർഖണ്ഡിലെ ജംഷഡ്പൂരിനെ നടുക്കി അതിദാരുണമായ റോഡപകടം. സോനാരി പോലീസ് സ്റ്റേഷൻ പരിധിയിലെ ദോമുഹാനിക്ക് സമീപം മറൈന് ഡ്രൈവില് നിർത്തിയിട്ടിരുന്ന ട്രക്കിന്റെ പിന്നിലേക്ക് കാർ ഇടിച്ചുകയറിയുണ്ടായ അപകടത്തിൽ നാല് പേർ മരിച്ചു. ഝാർഖണ്ഡ് ഗ്രാമവികസന-പഞ്ചായത്തിരാജ് മന്ത്രി ദീപിക പാണ്ഡെ സിംഗിന്റെ മകൾ തൃഷ സിംഗ് ഉൾപ്പെടെയുള്ളവരാണ് മരിച്ചത്. വ്യാഴാഴ്ച പുലർച്ചെ മൂന്നു മണിയോടെയായിരുന്നു അപകടമെന്ന് പോലീസ് അറിയിച്ചു.
മരിച്ചവരെ തൃഷ സിംഗ്, സാർഥക് അഗർവാൾ, നമൻ ഗുപ്ത, വൻഷിക ഖണ്ഡേൽവാൾ എന്നിവരാണെന്ന് തിരിച്ചറിഞ്ഞിട്ടുണ്ട്. നാലു പേരും സഞ്ചരിച്ചിരുന്ന കാർ മറൈന് ഡ്രൈവ് വഴി പോകുന്നതിനിടെ റോഡിൽ നിർത്തിയിട്ടിരുന്ന ഒരു ട്രക്കിന്റെ പിന്നിലേക്ക് ഇടിച്ചുകയറുകയായിരുന്നു എന്നാണ് പ്രാഥമിക വിവരം.
കൂട്ടിയിടിയുടെ ശക്തിയിൽ കാറിന്റെ മുൻഭാഗം ട്രക്കിന്റെ പിന്നിലേക്ക് ഇടിച്ചുകയറി തകർന്നു. അപകടത്തിന്റെ തീവ്രത കാരണം കാറിനുള്ളിൽ കുടുങ്ങിയവരെ പുറത്തെടുക്കുന്നതും ദുഷ്കരമായി. വിവരം ലഭിച്ചതോടെ പോലീസും രക്ഷാപ്രവർത്തകരും സ്ഥലത്തെത്തി. തകർന്ന കാറിന്റെ ഭാഗങ്ങൾ ഗ്യാസ് കട്ടർ ഉപയോഗിച്ച് മുറിച്ചുമാറ്റിയാണ് മൃതദേഹങ്ങൾ പുറത്തെടുത്തതെന്ന് റിപ്പോർട്ടുകൾ പറയുന്നു.
പ്രാദേശിക റിപ്പോർട്ടുകൾ പ്രകാരം, അപകടത്തിൽപ്പെട്ട ട്രെയിലർ നേരത്തെ തകരാറിലായി റോഡിൽ നിർത്തിയിട്ടിരിക്കുകയായിരുന്നു. അപകടത്തിന് കാരണമായ സാഹചര്യങ്ങൾ സംബന്ധിച്ച് പോലീസ് അന്വേഷണം ആരംഭിച്ചിട്ടുണ്ട്.
പിന്നീട് പുറത്തുവന്ന വിവരങ്ങൾ പ്രകാരം മരിച്ച നാലുപേരും കാർമൽ ജൂനിയർ കോളേജിലെ പന്ത്രണ്ടാം ക്ലാസ് വിദ്യാർത്ഥികളായിരുന്നു. മന്ത്രി ദീപിക പാണ്ഡെ സിംഗിന്റെ ഇളയ മകൾ തൃഷ എന്ന യുവിക സിംഗിന് 18 വയസ്സായിരുന്നു. വൻഷിക ഖണ്ഡേൽവാൾ, നമൻ ഗുപ്ത, സാർഥക് അഗർവാൾ എന്നിവരാണ് അപകടത്തിൽ മരിച്ച മറ്റ് മൂന്ന് വിദ്യാർത്ഥികൾ.
മുഖ്യമന്ത്രി ഹേമന്ത് സോറനും ഗവർണർ സന്തോഷ് കുമാർ ഗാങ്വാറും മരിച്ചവരുടെ കുടുംബങ്ങളെ അനുശോചനം അറിയിച്ചു. സംസ്ഥാന ആരോഗ്യമന്ത്രി ഡോ. ഇർഫാൻ അൻസാരിയും ദീപിക പാണ്ഡെ സിങ്ങിനും കുടുംബത്തിനും അനുശോചനം രേഖപ്പെടുത്തി.
അപകടത്തിന്റെ കൃത്യമായ കാരണം കണ്ടെത്തുന്നതിനുള്ള അന്വേഷണം തുടരുകയാണ്. കാർ അമിതവേഗത്തിലായിരുന്നോ, റോഡിൽ നിർത്തിയിട്ടിരുന്ന ട്രക്കിന് ആവശ്യമായ മുന്നറിയിപ്പ് സംവിധാനങ്ങൾ ഉണ്ടായിരുന്നോ തുടങ്ങിയ കാര്യങ്ങളും അന്വേഷണത്തിൽ വ്യക്തമാകേണ്ടതുണ്ട്.
