തിരഞ്ഞെടുപ്പ് തോൽവിക്ക് ഭരണഘടനാ സ്ഥാപനങ്ങളെ പ്രതിക്കൂട്ടിലാക്കുന്നത് ശരിയല്ലെന്ന് യുപി മുഖ്യമന്ത്രി; എസ്ഐആർ പുതിയ നടപടിയല്ലെന്നും മുൻകാലങ്ങളിലും സമാന പരിഷ്കരണങ്ങൾ നടന്നിട്ടുണ്ടെന്നും വിശദീകരണം
ലഖ്നൗ: വോട്ടർ പട്ടികയുടെ സ്പെഷ്യൽ ഇന്റൻസീവ് റിവിഷനെ (എസ്ഐആർ) ചൊല്ലിയുള്ള രാഷ്ട്രീയ വിവാദം ശക്തമാകുന്നതിനിടെ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾക്കെതിരെ രൂക്ഷ വിമർശനവുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. തിരഞ്ഞെടുപ്പിൽ വിജയിക്കുമ്പോൾ അതിനെ സ്വന്തം രാഷ്ട്രീയ മികവിന്റെ ഫലമായി അവതരിപ്പിക്കുകയും ജനങ്ങൾ നിരസിക്കുമ്പോൾ ഇവിഎമ്മിനെയും തിരഞ്ഞെടുപ്പ് കമ്മീഷനെയും കുറ്റപ്പെടുത്തുകയും ചെയ്യുന്ന സമീപനം എത്രത്തോളം ന്യായമാണെന്ന് യോഗി ചോദിച്ചു.
ലഖ്നൗവിൽ നടത്തിയ വാർത്താസമ്മേളനത്തിലാണ് എസ്ഐആർ, ഇവിഎം, തിരഞ്ഞെടുപ്പ് കമ്മീഷന്റെ പ്രവർത്തനം തുടങ്ങിയ വിഷയങ്ങളിൽ പ്രതിപക്ഷത്തിന്റെ നിലപാടിനെ യോഗി ചോദ്യം ചെയ്തത്. രാഷ്ട്രീയ താൽപര്യങ്ങൾക്കായി ഭരണഘടനാ സ്ഥാപനങ്ങളുടെ വിശ്വാസ്യതയെ ചോദ്യം ചെയ്യുന്നത് ജനാധിപത്യ മൂല്യങ്ങൾക്ക് ദോഷകരമാണെന്നായിരുന്നു അദ്ദേഹത്തിന്റെ വാദം.
കോൺഗ്രസും മറ്റ് പ്രതിപക്ഷ പാർട്ടികളും ഇവിഎമ്മിനെതിരെ ഉയർത്തുന്ന വിമർശനങ്ങളെയും യോഗി ചോദ്യം ചെയ്തു. ഇതേ ഇവിഎം സംവിധാനം ഉപയോഗിച്ച് നടന്ന തിരഞ്ഞെടുപ്പുകളിലൂടെയാണ് കോൺഗ്രസ് കേന്ദ്രത്തിലും വിവിധ സംസ്ഥാനങ്ങളിലും അധികാരത്തിലെത്തിയിട്ടുള്ളതെന്ന് അദ്ദേഹം ചൂണ്ടിക്കാട്ടി. അതേ സംവിധാനത്തെ പിന്നീട് ‘ബ്ലാക്ക് ബോക്സ്’ എന്ന് വിശേഷിപ്പിച്ച് ഇന്ത്യയുടെ തിരഞ്ഞെടുപ്പ് സംവിധാനത്തിന്റെ വിശ്വാസ്യതയെ സംശയത്തിന്റെ നിഴലിലാക്കുന്നത് ദൗർഭാഗ്യകരമാണെന്നും യോഗി പറഞ്ഞു.
തിരഞ്ഞെടുപ്പ് ഫലം അനുകൂലമാകുമ്പോൾ ജനവിധിയെ ആഘോഷിക്കുകയും തിരിച്ചടി നേരിടുമ്പോൾ തിരഞ്ഞെടുപ്പ് കമ്മീഷന്റെയും ഇവിഎമ്മിന്റെയും വിശ്വാസ്യത ചോദ്യം ചെയ്യുകയും ചെയ്യുന്നത് വൈരുദ്ധ്യമാണെന്നാണ് യോഗിയുടെ വിമർശനം.
വോട്ടർ പട്ടികയുടെ സ്പെഷ്യൽ ഇന്റൻസീവ് റിവിഷനെതിരെ ഉയരുന്ന വിമർശനങ്ങളെയും മുഖ്യമന്ത്രി തള്ളി. ഇപ്പോഴത്തെ തിരഞ്ഞെടുപ്പ് കമ്മീഷനാണ് ആദ്യമായി ഇത്തരമൊരു നടപടി സ്വീകരിക്കുന്നതെന്ന പ്രചാരണം ശരിയല്ലെന്നും മുൻകാലങ്ങളിലും സമാനമായ തീവ്ര വോട്ടർപട്ടിക പരിഷ്കരണങ്ങൾ നടന്നിട്ടുണ്ടെന്നും അദ്ദേഹം പറഞ്ഞു.
1952, 1957, 1961, 1965-66, 2003 വർഷങ്ങളിൽ സമാനമായ നടപടികൾ നടന്നിട്ടുണ്ടെന്നാണ് യോഗി വാർത്താസമ്മേളനത്തിൽ ചൂണ്ടിക്കാട്ടിയത്. ഇതിൽ പലതും കോൺഗ്രസ് ഭരണകാലത്തായിരുന്നുവെന്നും അദ്ദേഹം പറഞ്ഞു. അതിനാൽ ഇപ്പോഴത്തെ എസ്ഐആറിനെ മാത്രം രാഷ്ട്രീയ ലക്ഷ്യത്തോടെയുള്ള നടപടിയായി ചിത്രീകരിക്കുന്നതിനെ അദ്ദേഹം വിമർശിച്ചു.
എസ്ഐആറുമായി ബന്ധപ്പെട്ട ആശങ്കകളിൽ തിരഞ്ഞെടുപ്പ് കമ്മീഷൻ വിശദീകരണം നൽകിയിട്ടുണ്ടെന്നും യോഗി ചൂണ്ടിക്കാട്ടി. എസ്ഐആർ ഉൾപ്പെടെയുള്ള വിഷയങ്ങളിൽ തീരുമാനങ്ങൾ ഏകകണ്ഠമായിരുന്നുവെന്നാണ് കമ്മീഷൻ അടുത്തിടെ വ്യക്തമാക്കിയത്. അതേസമയം, കമ്മീഷനിലെ രണ്ട് അംഗങ്ങൾ ചില നടപടികളിൽ നേരത്തെ എതിർപ്പുകൾ രേഖപ്പെടുത്തിയെന്ന റിപ്പോർട്ടുകളാണ് പുതിയ രാഷ്ട്രീയ വിവാദത്തിന് വഴിവച്ചത്.
എസ്ഐആർ നടപടിക്രമങ്ങളെക്കുറിച്ച് ആശയക്കുഴപ്പം സൃഷ്ടിക്കുകയാണ് കോൺഗ്രസ്, സമാജ്വാദി പാർട്ടി, ആർജെഡി തുടങ്ങിയ പ്രതിപക്ഷ കക്ഷികളെന്നാണ് യോഗിയുടെ ആരോപണം. അർഹരായ വോട്ടർമാർ പട്ടികയിൽനിന്ന് പുറത്താകാതിരിക്കാനുള്ള നടപടികളെക്കുറിച്ചും കമ്മീഷൻ വ്യക്തത വരുത്തിയിട്ടുണ്ടെന്ന് അദ്ദേഹം പറഞ്ഞു.
തിരഞ്ഞെടുപ്പ് കമ്മീഷനിൽ മാത്രം ഒതുങ്ങുന്നതല്ല കോൺഗ്രസിന്റെ സമീപനമെന്നും രാജ്യത്തെ മറ്റ് സ്ഥാപനങ്ങളെയും പാർട്ടി മുമ്പ് ചോദ്യം ചെയ്തിട്ടുണ്ടെന്നും യോഗി ആരോപിച്ചു. റഫാൽ വിഷയവുമായി ബന്ധപ്പെട്ട സിഎജി റിപ്പോർട്ടിനെ ചൊല്ലിയുണ്ടായ രാഷ്ട്രീയ തർക്കങ്ങളും അദ്ദേഹം പരാമർശിച്ചു. വിദേശ വേദികളിൽ ഇന്ത്യയിലെ സ്ഥാപനങ്ങളെക്കുറിച്ച് കോൺഗ്രസ് നേതാക്കൾ നടത്തിയ വിമർശനങ്ങളെയും യോഗി ചോദ്യം ചെയ്തു.
രാഷ്ട്രീയ നേട്ടത്തിനായി ഭരണഘടനാ സ്ഥാപനങ്ങളിലുള്ള പൊതുജന വിശ്വാസം ദുർബലപ്പെടുത്തരുതെന്നും രാഷ്ട്രീയ പാർട്ടികൾ ഉത്തരവാദിത്തത്തോടെ പ്രവർത്തിക്കണമെന്നും യോഗി ആവശ്യപ്പെട്ടു.
അതേസമയം, എസ്ഐആറുമായി ബന്ധപ്പെട്ട തിരഞ്ഞെടുപ്പ് കമ്മീഷന്റെ നടപടികളിൽ പ്രതിപക്ഷം ഇപ്പോഴും ചോദ്യങ്ങൾ ഉയർത്തുന്നുണ്ട്. കമ്മീഷന്റെ ആഭ്യന്തര തീരുമാനങ്ങളുമായി ബന്ധപ്പെട്ട റിപ്പോർട്ടുകൾ പുറത്തുവന്നതോടെയാണ് വിവാദം കൂടുതൽ ശക്തമായത്. തിരഞ്ഞെടുപ്പ് കമ്മീഷനാകട്ടെ, അഭിപ്രായവ്യത്യാസങ്ങളും ആഭ്യന്തര പരിശോധനകളും ഒരു ബഹുഅംഗ ഭരണഘടനാ സ്ഥാപനത്തിലെ സാധാരണ നടപടിക്രമങ്ങളുടെ ഭാഗമാണെന്നും എസ്ഐആർ സംബന്ധിച്ച അന്തിമ തീരുമാനങ്ങൾ ഏകകണ്ഠമായിരുന്നുവെന്നും വ്യക്തമാക്കിയിട്ടുണ്ട്.
