റിയാദ് (സൗദി അറേബ്യ): പ്രവാസി മലയാളികൾക്കായി കേരള സർക്കാർ നടപ്പാക്കിയ നോർക്ക കെയർ ആരോഗ്യ ഇൻഷുറൻസ് പദ്ധതിയുടെ പ്രീമിയം തുക കുത്തനെ വർധിപ്പിച്ചതിനെതിരെ പ്രതിഷേധവുമായി റിയാദിലെ കേളി കലാസാംസ്കാരിക വേദി. വർധിപ്പിച്ച പ്രീമിയം നിരക്ക് പിൻവലിച്ച് സാധാരണക്കാരായ പ്രവാസികൾക്കും താങ്ങാനാകുന്ന ചെലവിൽ ആരോഗ്യ ഇൻഷുറൻസ് പരിരക്ഷ ഉറപ്പാക്കണമെന്നാവശ്യപ്പെട്ട് കേളിയുടെ നേതൃത്വത്തിൽ വിപുലമായ ജനകീയ ഒപ്പുശേഖരണത്തിന് തുടക്കമായി.
പ്രവാസികളുടെയും അവരുടെ കുടുംബാംഗങ്ങളുടെയും ആരോഗ്യസുരക്ഷയും സാമ്പത്തിക ഭദ്രതയും ലക്ഷ്യമിട്ട് ആരംഭിച്ച പദ്ധതിയുടെ പ്രീമിയം വർധിപ്പിച്ചത് വലിയൊരു വിഭാഗം പ്രവാസികൾക്ക് തിരിച്ചടിയാകുമെന്നാണ് സംഘടനയുടെ വിലയിരുത്തൽ. ഉയർന്ന പ്രീമിയം അടയ്ക്കാൻ കഴിയാത്തവർക്ക് പദ്ധതിയിൽ ചേരാനോ പരിരക്ഷ തുടരാനോ സാധിക്കാത്ത സാഹചര്യം ഉണ്ടാകുമെന്ന ആശങ്കയും കേളി ഉയർത്തുന്നു.
പ്രവാസികളുടെ വരുമാനവും ജീവിതച്ചെലവും സാമ്പത്തിക പരിമിതികളും വേണ്ടത്ര പരിഗണിക്കാതെയുള്ള പ്രീമിയം വർധന നീതീകരിക്കാനാവില്ലെന്ന് സംഘടന ചൂണ്ടിക്കാട്ടി. വിദേശ രാജ്യങ്ങളിൽ കഠിനാധ്വാനം ചെയ്ത് സ്വന്തം കുടുംബങ്ങളെ സംരക്ഷിക്കുന്നതിനൊപ്പം കേരളത്തിന്റെ സമ്പദ്‌വ്യവസ്ഥയ്ക്കും നിർണായക സംഭാവന നൽകുന്ന പ്രവാസികൾക്ക് മിതമായ നിരക്കിൽ ആരോഗ്യപരിരക്ഷ ലഭ്യമാക്കേണ്ടത് സർക്കാരിന്റെ ഉത്തരവാദിത്വമാണെന്നും കേളി വ്യക്തമാക്കി.
ചികിത്സാച്ചെലവുകൾ അനുദിനം വർധിക്കുന്ന സാഹചര്യത്തിൽ പ്രവാസികൾക്ക് സാമ്പത്തിക ആശ്വാസം നൽകേണ്ട ആരോഗ്യ ഇൻഷുറൻസ് പദ്ധതി അധിക ബാധ്യതയായി മാറരുത്. പ്രത്യേകിച്ച് കുറഞ്ഞ വേതനത്തിൽ ജോലി ചെയ്യുന്ന സാധാരണക്കാരായ പ്രവാസികൾക്കും അവരുടെ കുടുംബങ്ങൾക്കും ഇൻഷുറൻസ് പരിരക്ഷ അനിവാര്യമാണ്. പ്രീമിയം വർധന മൂലം ഇത്തരം വിഭാഗങ്ങൾ പദ്ധതിയിൽനിന്ന് പുറത്താകുന്ന സാഹചര്യം ഒഴിവാക്കാൻ സർക്കാർ അടിയന്തരമായി ഇടപെടണമെന്നും സംഘടന ആവശ്യപ്പെട്ടു.
പ്രവാസിക്ഷേമവും അവകാശസംരക്ഷണവും മുൻഗണനയായി കാണേണ്ട സർക്കാർ, ആരോഗ്യ ഇൻഷുറൻസ് പദ്ധതി കൂടുതൽ ജനകീയവും എല്ലാവർക്കും പ്രാപ്യവുമാക്കുന്നതിനുള്ള നടപടികളാണ് സ്വീകരിക്കേണ്ടതെന്ന് കേളി അഭിപ്രായപ്പെട്ടു. പ്രീമിയം നിരക്കുകൾ വർധിപ്പിച്ച തീരുമാനം പുനഃപരിശോധിക്കുകയും പ്രവാസികളുടെ സാമ്പത്തിക സാഹചര്യങ്ങൾക്കനുസൃതമായി ഇൻഷുറൻസ് പരിരക്ഷ ഉറപ്പാക്കുകയും വേണം.
വർധിപ്പിച്ച പ്രീമിയം പിൻവലിച്ച് മുൻനിരക്ക് പുനഃസ്ഥാപിക്കുകയോ സാധാരണക്കാരായ പ്രവാസികൾക്ക് താങ്ങാനാകുന്ന പുതിയ നിരക്ക് നിശ്ചയിക്കുകയോ ചെയ്യണമെന്നതാണ് കേളിയുടെ പ്രധാന ആവശ്യം. ഈ ആവശ്യം കേരള സർക്കാരിന്റെ ശ്രദ്ധയിൽപ്പെടുത്തുന്നതിനും തീരുമാനത്തിൽ പുനഃപരിശോധന ഉറപ്പാക്കുന്നതിനുമാണ് മാസ് പെറ്റീഷൻ എന്ന പേരിൽ വിപുലമായ ഒപ്പുശേഖരണ പ്രചാരണം സംഘടിപ്പിക്കുന്നത്.
കക്ഷിരാഷ്ട്രീയ വ്യത്യാസങ്ങൾക്കതീതമായി ലോകത്തിന്റെ വിവിധ ഭാഗങ്ങളിലുള്ള പ്രവാസി മലയാളികളെ ഒരുമിപ്പിച്ചുകൊണ്ടുള്ള ജനകീയ ഇടപെടലാണ് കേളി ലക്ഷ്യമിടുന്നത്. സൗദി അറേബ്യയിൽ മാത്രമല്ല, മറ്റു രാജ്യങ്ങളിലുള്ള പ്രവാസികൾക്കും പ്രവാസി സംഘടനകൾക്കും സാമൂഹിക, സാംസ്കാരിക പ്രവർത്തകർക്കും പൊതുപ്രവർത്തകർക്കും പ്രചാരണത്തിന്റെ ഭാഗമാകാൻ അവസരമുണ്ട്.
പ്രവാസികളുടെ ആരോഗ്യസുരക്ഷയുമായി ബന്ധപ്പെട്ട വിഷയത്തിൽ പരമാവധി ജനപങ്കാളിത്തം ഉറപ്പാക്കി സർക്കാരിന്റെ ശ്രദ്ധ ക്ഷണിക്കാനാണ് സംഘടനയുടെ ശ്രമം. പ്രവാസികളുടെ ന്യായമായ ആവശ്യങ്ങൾ അധികാരികളുടെ മുന്നിലെത്തിക്കുന്നതിനും ഇൻഷുറൻസ് പ്രീമിയം സംബന്ധിച്ച തീരുമാനം പുനഃപരിശോധിക്കാൻ സർക്കാരിനോട് ആവശ്യപ്പെടുന്നതിനും കൂട്ടായ ഇടപെടൽ അനിവാര്യമാണെന്ന് കേളി വ്യക്തമാക്കി.
പ്രവാസികളുടെ സാമ്പത്തിക സുരക്ഷയും ആരോഗ്യപരിരക്ഷയും ഉറപ്പാക്കുന്നതിനുള്ള ഈ ജനകീയ മുന്നേറ്റത്തിൽ എല്ലാ പ്രവാസികളും പങ്കാളികളാകണമെന്ന് സംഘടന അഭ്യർഥിച്ചു. മാസ് പെറ്റീഷനിൽ ഒപ്പുവെച്ച് പ്രചാരണത്തിന് പിന്തുണ നൽകണമെന്നും പ്രവാസി സമൂഹത്തിന്റെ ആവശ്യങ്ങൾ സർക്കാരിന്റെ ശ്രദ്ധയിൽ ശക്തമായി എത്തിക്കാൻ സഹകരിക്കണമെന്നും കേളി ആവശ്യപ്പെട്ടു.
മാസ് പെറ്റീഷനിൽ ഒപ്പിടാനുള്ള ലിങ്ക്: https://www.keliriyadh.com/keli-for-a-change https://www.keliriyadh.com/keli-for-a-change
