ജർമ്മൻ സർക്കാരിന്റെ അന്താരാഷ്ട്ര വിസിറ്റേഴ്സ് പ്രോഗ്രാമിലേക്ക് ഇന്ത്യൻ പരിസ്ഥിതി സ്വതന്ത്ര മാധ്യമ പ്രവർത്തക ജിഷ എലിസബത്തിന് ഔദ്യോഗിക ക്ഷണം

തൃശൂർ: ഫെഡറൽ റിപ്പബ്ലിക് ഓഫ് ജർമ്മനി സംഘടിപ്പിച്ച ഏഴുദിവസത്തെ അന്താരാഷ്ട്ര വിസിറ്റേഴ്സ് പ്രോഗ്രാമിലേക്ക് ഇന്ത്യൻ പരിസ്ഥിതി സ്വതന്ത്ര മാധ്യമപ്രവർത്തക ജിഷ എലിസബത്ത് ഔദ്യോഗിക ക്ഷണിതാവായി തിരഞ്ഞെടുക്കപ്പെട്ടു. കാലാവസ്ഥാ വ്യതിയാനം, ആഗോളതാപനം, പരിസ്ഥിതി സംരക്ഷണം, കാലാവസ്ഥാ പ്രതിസന്ധികളെ നേരിടുന്നതിനുള്ള പ്രതിരോധ സംവിധാനങ്ങൾ തുടങ്ങിയ മേഖലകളിൽ ജർമ്മനി നടപ്പാക്കുന്ന പദ്ധതികളും നയങ്ങളും നേരിട്ട് പഠിക്കുന്നതിനായാണ് സന്ദർശന പരിപാടി സംഘടിപ്പിച്ചത്.

കാലാവസ്ഥാ വ്യതിയാനത്തിന്റെ ആഘാതങ്ങൾ ലഘൂകരിക്കുന്നതിനും പ്രകൃതിവിഭവങ്ങളുടെ സംരക്ഷണം ഉറപ്പാക്കുന്നതിനും ജർമ്മനി സ്വീകരിച്ചുവരുന്ന ശാസ്ത്രീയവും സാങ്കേതികവുമായ സമീപനങ്ങൾ മനസ്സിലാക്കാൻ അന്താരാഷ്ട്ര പ്രതിനിധികൾക്ക് അവസരമൊരുക്കുന്നതായിരുന്നു പരിപാടി. പരിസ്ഥിതി ഗവേഷണം, കാലാവസ്ഥാ നയരൂപീകരണം, സുസ്ഥിര വികസനം, സമുദ്രസംരക്ഷണം, നഗരാസൂത്രണം തുടങ്ങിയ വിഷയങ്ങളിലെ ജർമ്മനിയുടെ അനുഭവങ്ങളും പ്രവർത്തനരീതികളും പ്രതിനിധി സംഘം വിലയിരുത്തി.

അൽബേനിയ, ബൾഗേറിയ, ചൈന, ഹോണ്ടുറാസ്, ഇന്ത്യ, കെനിയ, കൊറിയ, പാകിസ്ഥാൻ, ഫിലിപ്പീൻസ്, പോർച്ചുഗൽ, ദക്ഷിണാഫ്രിക്ക, തായ്‌ലൻഡ്, ടുണീഷ്യ, തുർക്കി, വിയറ്റ്നാം എന്നീ 15 രാജ്യങ്ങളിൽ നിന്നുള്ള പ്രതിനിധികളാണ് പരിപാടിയിൽ പങ്കെടുത്തത്. കാലാവസ്ഥാ ശാസ്ത്രജ്ഞർ, സർവകലാശാലാ അധ്യാപകർ, ഗവേഷകർ, പരിസ്ഥിതി വിഷയങ്ങളിലെ വിദഗ്ധർ, മാധ്യമപ്രവർത്തകർ തുടങ്ങിയ വിവിധ മേഖലകളിൽ പ്രവർത്തിക്കുന്നവരായിരുന്നു സംഘത്തിലുണ്ടായിരുന്നത്.

വിവിധ രാജ്യങ്ങൾ നേരിടുന്ന കാലാവസ്ഥാ വെല്ലുവിളികൾ, പരിസ്ഥിതി സംരക്ഷണത്തിനുള്ള നയപരമായ ഇടപെടലുകൾ, ഗവേഷണ രംഗത്തെ പുരോഗതി, കാലാവസ്ഥാ പ്രതിസന്ധികളെ അതിജീവിക്കുന്നതിനുള്ള മാർഗങ്ങൾ എന്നിവ സംബന്ധിച്ച് ആശയവിനിമയം നടത്തുന്നതിനും സന്ദർശനം അവസരമൊരുക്കി.

ജർമ്മനിയിലെ ബെർലിൻ, പോട്സ്ഡാം, കുക്സ്ഹാഫൻ, ഹാംബർഗ് എന്നീ പ്രധാന നഗരങ്ങൾ കേന്ദ്രീകരിച്ചായിരുന്നു ഏഴുദിവസത്തെ പഠനപര്യടനം. സന്ദർശനത്തിന്റെ ഭാഗമായി പരിസ്ഥിതി, കാലാവസ്ഥാ സംരക്ഷണം, പ്രകൃതി സംരക്ഷണം, ആണവ സുരക്ഷ എന്നിവയ്ക്കായുള്ള ഫെഡറൽ മന്ത്രാലയം (BMUV), ഫെഡറൽ ഫോറിൻ ഓഫീസ്, ഫെഡറൽ മറൈൻ ആൻഡ് ഹൈഡ്രോഗ്രാഫിക് ഏജൻസി (BSH) തുടങ്ങിയ ജർമ്മനിയിലെ പ്രധാന സർക്കാർ സ്ഥാപനങ്ങളിലെ പ്രതിനിധികളുമായി സംഘം കൂടിക്കാഴ്ച നടത്തി.

കാലാവസ്ഥാ സംരക്ഷണത്തിനായി സർക്കാർ തലത്തിൽ സ്വീകരിക്കുന്ന നടപടികൾ, പരിസ്ഥിതി നയങ്ങളുടെ രൂപീകരണവും നടപ്പാക്കലും, സമുദ്ര പരിസ്ഥിതിയുടെ സംരക്ഷണം, കാലാവസ്ഥാ വ്യതിയാനവുമായി ബന്ധപ്പെട്ട ശാസ്ത്രീയ വിവരശേഖരണം തുടങ്ങിയ വിഷയങ്ങളിലായിരുന്നു സന്ദർശനത്തിന്റെ പ്രധാന ശ്രദ്ധ.

പോട്സ്ഡാമിലെ ആൽഫ്രഡ് വേഗനർ ഇൻസ്റ്റിറ്റ്യൂട്ട് ഹെൽംഹോൾട്ട്സ് സെന്റർ ഫോർ പോളാർ ആൻഡ് മറൈൻ റിസർച്ച്, ഹാംബർഗിലെ ക്ലൈമറ്റ് സർവീസ് സെന്റർ ജർമ്മനി, പോട്സ്ഡാം ഇൻസ്റ്റിറ്റ്യൂട്ട് ഫോർ ക്ലൈമറ്റ് ഇംപാക്ട് റിസർച്ച് തുടങ്ങിയ അന്താരാഷ്ട്ര പ്രശസ്തിയുള്ള ഗവേഷണ സ്ഥാപനങ്ങളിലെ വിദഗ്ധരുമായും സംഘം ആശയവിനിമയം നടത്തി.

ധ്രുവപ്രദേശങ്ങളിലെയും സമുദ്രങ്ങളിലെയും കാലാവസ്ഥാ മാറ്റങ്ങൾ, ആഗോളതാപനത്തിന്റെ ദീർഘകാല പ്രത്യാഘാതങ്ങൾ, കാലാവസ്ഥാ വിവരങ്ങളുടെ ശാസ്ത്രീയ വിശകലനം, കാലാവസ്ഥാ അപകടസാധ്യതകൾ മുൻകൂട്ടി വിലയിരുത്തുന്നതിനുള്ള ഗവേഷണ സംവിധാനങ്ങൾ തുടങ്ങിയ മേഖലകളിലെ പ്രവർത്തനങ്ങൾ പരിചയപ്പെടാനും സന്ദർശനം സഹായകമായി.

പഠനപരിപാടിയുടെ ഭാഗമായി ജർമ്മനിയിലെ ചരിത്രപ്രാധാന്യമുള്ളതും പരിസ്ഥിതി സംരക്ഷണവുമായി ബന്ധപ്പെട്ടതുമായ നിരവധി കേന്ദ്രങ്ങളും പ്രതിനിധികൾ സന്ദർശിച്ചു.

യുനെസ്കോ ലോക പൈതൃക പട്ടികയിൽ ഉൾപ്പെട്ട പോട്സ്ഡാമിലെ സാൻസൂസി കൊട്ടാരം (Sanssouci Palace), യുനെസ്കോ ലോക പ്രകൃതിദത്ത പൈതൃക കേന്ദ്രമായ വാഡൻ സീയുടെ ഭാഗമായ കുക്സ്ഹാഫനിലെ സംരക്ഷിത തീരപ്രദേശം എന്നിവ സന്ദർശനത്തിലെ പ്രധാന കേന്ദ്രങ്ങളായിരുന്നു.

സമുദ്രതീര ആവാസവ്യവസ്ഥകളുടെ സംരക്ഷണം, ജൈവവൈവിധ്യത്തിന്റെ പ്രാധാന്യം, പ്രകൃതിദത്ത പൈതൃക കേന്ദ്രങ്ങളുടെ പരിപാലനം തുടങ്ങിയ വിഷയങ്ങളിൽ ജർമ്മനി സ്വീകരിക്കുന്ന സമീപനങ്ങൾ മനസ്സിലാക്കുന്നതിനും ഈ സന്ദർശനങ്ങൾ അവസരമൊരുക്കി.

കാലാവസ്ഥാ അതിജീവനശേഷിയുള്ള നഗരാസൂത്രണത്തിനും വെള്ളപ്പൊക്ക പ്രതിരോധ സംവിധാനങ്ങൾക്കും പേരുകേട്ട ഹാംബർഗിലെ ഹാഫൻസിറ്റി (HafenCity Hamburg GmbH) പദ്ധതിയും സംഘം സന്ദർശിച്ചു. കാലാവസ്ഥാ വ്യതിയാനത്തിന്റെ പശ്ചാത്തലത്തിൽ നഗരങ്ങളുടെ സുരക്ഷയും സുസ്ഥിര വികസനവും ഉറപ്പാക്കുന്നതിനുള്ള ആസൂത്രണ മാതൃകകൾ പരിചയപ്പെടുന്നതിന് ഈ സന്ദർശനം പ്രാധാന്യമർഹിക്കുന്നതായിരുന്നു.

ഗോയ്‌ഥെ ഇൻസ്റ്റിറ്റ്യൂട്ട് ബെർലിൻ (Mitte) ആണ് ജർമ്മൻ സർക്കാരിന്റെ ഈ അന്താരാഷ്ട്ര സന്ദർശന പരിപാടിക്ക് നേതൃത്വം നൽകിയത്.

തൃശൂർ ജില്ലയിലെ വടക്കാഞ്ചേരി സ്വദേശിയായ ജിഷ എലിസബത്ത് പരിസ്ഥിതി വിഷയങ്ങളിൽ ശ്രദ്ധ കേന്ദ്രീകരിച്ച് പ്രവർത്തിക്കുന്ന സ്വതന്ത്ര മാധ്യമപ്രവർത്തകയാണ്. മാധ്യമപ്രവർത്തന രംഗത്തെ സംഭാവനകൾക്ക് ദേശീയ, സംസ്ഥാന തലങ്ങളിൽ നിരവധി പുരസ്കാരങ്ങളും ഫെല്ലോഷിപ്പുകളും നേടിയിട്ടുണ്ട്.

രാജ്യത്തെ ശ്രദ്ധേയമായ മാധ്യമ ബഹുമതികളിലൊന്നായ രാംനാഥ് ഗോയങ്ക അവാർഡ്, നാഷണൽ മീഡിയ അവാർഡ്, കേരള സർക്കാരിന്റെ ഡോ. അംബേദ്കർ മാധ്യമ പുരസ്കാരം, കേരള സംസ്ഥാന ജൈവവൈവിധ്യ ബോർഡിന്റെ ഗ്രീൻ റിപ്പോർട്ടർ അവാർഡ് എന്നിവ ജിഷയെ തേടിയെത്തിയ അംഗീകാരങ്ങളിൽ ഉൾപ്പെടുന്നു.

കേരള സംസ്ഥാന യുവജനക്ഷേമ ബോർഡിന്റെ സ്വാമി വിവേകാനന്ദ യൂത്ത് അവാർഡ്, എറണാകുളം പ്രസ് ക്ലബിന്റെ ലീല മേനോൻ അവാർഡ്, ഇന്ത്യ പ്രസ് ക്ലബ് ഓഫ് നോർത്ത് അമേരിക്കയുടെ ബഡിങ് ജേണലിസ്റ്റ് അവാർഡ് എന്നിവയും നേടിയിട്ടുണ്ട്.

അന്താരാഷ്ട്ര തലത്തിലും ജിഷയുടെ മാധ്യമപ്രവർത്തനത്തിന് അംഗീകാരങ്ങൾ ലഭിച്ചിട്ടുണ്ട്. എർത്ത് ജേണലിസം നെറ്റ്‌വർക്കിന്റെ രണ്ട് മീഡിയ ഫെല്ലോഷിപ്പുകൾ, ജേണലിസം സെന്റർ ഓൺ ഗ്ലോബൽ ട്രാഫിക്കിങ്ങിന്റെ മീഡിയ ഫെല്ലോഷിപ്പ്, തോംസൺ റോയിട്ടേഴ്സ് ഫൗണ്ടേഷന്റെ ഫെല്ലോഷിപ്പ് എന്നിവയും ജിഷയ്ക്ക് ലഭിച്ചിട്ടുണ്ട്.

പരിസ്ഥിതി സംരക്ഷണവും കാലാവസ്ഥാ വ്യതിയാനവും ആഗോളതലത്തിൽ കൂടുതൽ പ്രാധാന്യം നേടുന്ന സാഹചര്യത്തിൽ, ജർമ്മൻ സർക്കാരിന്റെ അന്താരാഷ്ട്ര പഠനപരിപാടിയിലേക്ക് തിരഞ്ഞെടുക്കപ്പെട്ടത് ജിഷ എലിസബത്തിന്റെ മാധ്യമപ്രവർത്തന ജീവിതത്തിലെ മറ്റൊരു ശ്രദ്ധേയമായ നേട്ടമായി.

പാലക്കാട് സ്വദേശി ജോൺ ആളൂരാണ് ഭർത്താവ്. മകൾ ഇതൾ.