Year: 2022

പടപ്പറമ്പ : ‘ഹഖിലേക്കണയാം’ തലക്കെട്ടിൽ പത്താം ക്ലാസ് പരീക്ഷയെഴുതിയ വിദ്യാർഥികൾക്ക് എസ്‌.ഐ.ഒ മക്കരപ്പറമ്പ്, പടപ്പറമ്പ് ഏരിയകൾ സംയുക്തമായി സംഘടിപ്പിച്ച ടീൻസ് മീറ്റ് പടപ്പറമ്പ് അൽഫാറൂഖ് സ്കൂളിൽ തുടങ്ങി. എസ്‌.ഐ.ഒ മലപ്പുറം ജില്ല ജോ സെക്രട്ടറി അസ്ലം പടിഞ്ഞാറ്റുമുറി പതാക ഉയർത്തി. എസ്‌.ഐ.ഒ സംസ്ഥാന സെക്രട്ടറി വാഹിദ് ചുള്ളിപ്പാറ ഉദ്ഘാടനം ചെയ്തു. എസ്‌.ഐ.ഒ മക്കരപ്പറമ്പ് ഏരിയ പ്രസിഡന്റ് റബീ ഹുസൈൻ തങ്ങൾ അദ്ധ്യക്ഷത വഹിച്ചു. ജമാഅത്തെ ഇസ്ലാമി മക്കരപ്പറമ്പ് ഏരിയ പ്രസിഡന്റ് കുഞ്ഞിമുഹമ്മദ് മുരിങ്ങേക്കൽ, സോളിഡാരിറ്റി പടപ്പറമ്പ് ഏരിയ പ്രസിഡന്റ് ഹാരിസ് രാമപുരം, എസ്‌.ഐ.ഒ പടപ്പറമ്പ് ഏരിയ പ്രസിഡന്റ് അജ്മൽ ഷഹീൻ, ടി ഫർഹാൻ, ടീൻസ് മീറ്റ് കൺവീനർ അബ്ദുൽ ബാരിഹ് എന്നിവർ സംസാരിച്ചു. വിവിധ സെഷനുകൾക്ക് എസ്‌.ഐ.ഒ ജില്ല സെക്രട്ടറി മുബാരിസ് വളാഞ്ചേരി, ജില്ല ജോ. സെക്രട്ടറി സഹൽബാസ്, ഫയാസ് ഹബീബ്, നൂറുദ്ദീൻ മമ്പാട്, അദീബ് കൊടുവള്ളി…

തൃശൂർ: സ്വർണക്കടത്ത് വിവാദത്തിൽ സുരക്ഷ വർധിപ്പിക്കുന്നതിന്റെ ഭാഗമായി തൃശൂരിൽ മുഖ്യമന്ത്രിയുടെ സുരക്ഷ വർധിപ്പിച്ചു. കോട്ടയത്തും കൊച്ചിയിലും പൊതുപരിപാടികൾക്ക് വൻ സുരക്ഷ ഏർപ്പെടുത്തിയതിന് സമാനമാണ് തൃശ്ശൂരിലെ സുരക്ഷാ വിന്യാസം. മുഖ്യമന്ത്രി താമസിക്കുന്ന രാമനിലയം ഗസ്റ്റ് ഹൗസിന് കനത്ത പോലീസ് കാവലാണ് ഏർപ്പെടുത്തിയിരിക്കുന്നത്. ജലപീരങ്കി ഉൾപ്പെടെയുള്ള സൗകര്യങ്ങളും ഇവിടെ ഒരുക്കിയിട്ടുണ്ട്. പ്രതിഷേധ മാർച്ചുകളും ഹോറിംഗും ഉൾപ്പെടെയുള്ള പ്രതിഷേധങ്ങളുടെ സുരക്ഷ കണക്കിലെടുത്താണ് സുരക്ഷ വർധിപ്പിച്ചതെന്ന് പോലീസ് അറിയിച്ചു.

തിരുവനന്തപുരം: വിജിലൻസ് മേധാവി സ്ഥാനത്ത് നിന്ന് എംആർ അജിത് കുമാറിനെ മാറ്റി. സ്വർണക്കടത്ത് കേസിലെ പ്രതി സ്വപ്ന സുരേഷിന്റെ വെളിപ്പെടുത്തലിനെ തുടർന്നാണ് നടപടി. വിജിലൻസ് ഐജി എച്ച് വെങ്കിടേഷിന് പകരം ചുമതല നല്‍കി. അജിത് കുമാറിന് പുതിയ ചുമതല നല്‍കിയിട്ടില്ല. വിജിലൻസ് മേധാവി എം.ആർ അജിത് കുമാർ, ലോ ആന്‍ഡ് ഓർഡർ എഡിജിപി വിജയ് സാഖറെ എന്നിവരുമായി ഷാജ് കിരൺ നിരന്തരം സംസാരിച്ചെന്ന് സ്വപ്‌ന സുരേഷ് ആരോപിച്ചിരുന്നു. സരിത്തിന്‍റെ ഫോണ്‍ പിടിച്ചെടുത്തതുമായി ബന്ധപ്പെട്ട വിഷയവും അജിത് കുമാറിനെതിരെയുള്ള നടപടിക്ക് കാരണമായെന്നാണ് സൂചന. ഷാജ് കിരണുമായി ഫോണിൽ സംസാരിച്ചെന്ന ആരോപണം എഡിജിപി വിജയ് സാഖറെ തള്ളിയിട്ടുണ്ട്. എന്നാൽ എം.ആർ അജിത് കുമാർ ഇതുവരെ ഇതുസംബന്ധിച്ച് പ്രതികരിച്ചിട്ടില്ല.

കോട്ടയം: മുഖ്യമന്ത്രി പിണറായി വിജയന്റെ വരവിനെ തുടർന്ന് കോട്ടയത്ത് കർശന ഗതാഗത നിയന്ത്രണം ഏർപ്പെടുത്തി. നഗരത്തിനുള്ളിലെ പല റോഡുകളിലും പോലീസ് ബാരിക്കേഡുകൾ സ്ഥാപിച്ചു. കെ കെ റോഡിൽ ജനറൽ ആശുപത്രിക്ക് മുന്നിൽ വാഹനങ്ങൾ തടഞ്ഞതോടെ യാത്രക്കാരും പോലീസും തമ്മിൽ വാക്കേറ്റമുണ്ടായി. കേരള ഗസറ്റഡ് ഓഫിസേഴ്സ് അസോസിയേഷൻ (കെജിഒഎ) സമ്മേളനത്തിൽ പങ്കെടുക്കുന്നതിനാണ് മുഖ്യമന്ത്രി കോട്ടയത്ത് എത്തിയത്. സമ്മേളനത്തിൽ പങ്കെടുക്കുന്നവർ ഒരു മണിക്കൂർ മുൻപു ഹാളിൽ കയറണമെന്നു നിർദേശമുണ്ട്. പരിപാടിക്ക് എത്തുന്ന മാധ്യമപ്രവർത്തകർക്ക് പാസ് വേണമെന്നും നിഷ്കർഷിച്ചിട്ടുണ്ട്. പ്രതിഷേധം ശക്തമായതോടെ മുഖ്യമന്ത്രിക്കും മന്ത്രിമാർക്കും സുരക്ഷ ശക്തമാക്കി. പൊതുചടങ്ങുകൾ കഴിവതും ഒഴിവാക്കാൻ മുഖ്യമന്ത്രിക്ക് ഇന്റലിജന്‍സ് നിര്‍ദ്ദേശിച്ചിരുന്നു. ബോംബ് സ്ക്വാഡ് ഉൾപ്പെടെയുള്ള സുരക്ഷയും ശക്തമാക്കിയിട്ടുണ്ട്.  

കൊല്ലം: വീട്ടുമുറ്റത്ത് കളിച്ചുകൊണ്ടിരിക്കെ കാണാതായ രണ്ടര വയസ്സുകാരനെ കണ്ടെത്തി. കൊല്ലം അഞ്ചലിൽ നിന്നാണ് അൻസാരി ഫാത്തിമ ദമ്പതികളുടെ മകൻ ഫർഹാനെ ഇന്നലെ കാണാതായത്. വീടിന് സമീപത്തെ റബ്ബർ തോട്ടത്തിലാണ് കുട്ടിയെ കണ്ടെത്തിയത്. മലമുകളിലെ റബ്ബർ തോട്ടത്തിൽ കുട്ടി എങ്ങനെ എത്തിയെന്ന് വ്യക്തമല്ല. അന്വേഷണം നടത്തിവരികയാണെന്ന് പോലീസ് പറഞ്ഞു. കുട്ടിയെ പുനലൂർ താലൂക്ക് ആശുപത്രിയിലേക്ക് മാറ്റി. കുട്ടിക്ക് ആരോഗ്യപ്രശ്‌നങ്ങളൊന്നുമില്ലെന്നാണ് പോലീസ് പറയുന്നത്. ഇന്നലെ വൈകിട്ട് അഞ്ചരയോടെയാണ് വീട്ടുമുറ്റത്ത് കളിച്ചുകൊണ്ടിരുന്ന കുട്ടിയെ കാണാതായത്.