ഉക്രെയിന്‍: ഫെബ്രുവരി 24-ന് റഷ്യ നടത്തിയ അധിനിവേശത്തിൽ ആദ്യ യുദ്ധക്കുറ്റ വിചാരണയിൽ നിരായുധനായ ഒരു സാധാരണക്കാരനെ കൊലപ്പെടുത്തിയതിന് ഒരു റഷ്യൻ സൈനികനെ ഉക്രേനിയൻ കോടതി തിങ്കളാഴ്ച ജീവപര്യന്തം തടവിന് ശിക്ഷിച്ചു.
ഫെബ്രുവരി 28 ന് വടക്കുകിഴക്കൻ ഉക്രേനിയൻ ഗ്രാമമായ ചുപഖിവ്കയിൽ വെച്ച് 62 കാരനായ ഒലെക്‌സാണ്ടർ ഷെലിപോവിനെ വെടിവച്ചുകൊന്ന 21 കാരനായ ടാങ്ക് കമാൻഡറായ വാഡിം ഷിഷിമാരിൻ കുറ്റസമ്മതം നടത്തിയിരുന്നു.
ഉയർന്ന റാങ്കിലുള്ള ഒരു സൈനികന്റെ “ക്രിമിനൽ ഉത്തരവ്” നടപ്പിലാക്കിക്കൊണ്ട്, ഷിഷിമാരിൻ ഓട്ടോമാറ്റിക് ഗണ്‍ ഉപയോഗിച്ച് നിരായുധനായ ഇരയുടെ തലയ്ക്ക് നേരെ നിരവധി തവണ വെടിയുതിർക്കുകയായിരുന്നുവെന്ന് ജഡ്ജി സെർഹി അഗഫോനോവ് പറഞ്ഞു.
“ഷിഷിമാരിൻ വാഡിം എവ്ജെനിവിച്ച് … കുറ്റക്കാരനാണെന്ന് ഈ കോടതി കണ്ടെത്തി … അയാള്‍ക്ക് ഈ കോടതി ജീവപര്യന്തം
ശിക്ഷ വിധിക്കുന്നു.”
ചെയ്ത കുറ്റകൃത്യം സമാധാനത്തിനും സുരക്ഷയ്ക്കും മാനവികതയ്ക്കും അന്താരാഷ്ട്ര നിയമവ്യവസ്ഥയ്ക്കും എതിരായ കുറ്റകൃത്യമായതിനാൽ … ഷിഷിമാരിന് ഒരു നിശ്ചിത കാലയളവിലേക്ക് (ചെറിയ) തടവ് ശിക്ഷ വിധിക്കുന്നതിനുള്ള സാധ്യത കോടതി കാണുന്നില്ല എന്നും ശിക്ഷ വിധിച്ചുകൊണ്ട് കോടതി പ്രസ്താവിച്ചു.
ഷിഷിമാരിൻ, നീലയും ചാരനിറത്തിലുള്ള ഹുഡ് ഷർട്ടും ധരിച്ച്, കോടതിമുറിയിലെ ഗ്ലാസ് ബോക്സിൽ നിന്ന് നിശ്ശബ്ദമായി നടപടികൾ വീക്ഷിച്ചു. വിധി വായിച്ചപ്പോൾ നിര്‍‌വ്വികാരനായാണ് കാണപ്പെട്ടത്. കൂടുതല്‍ സമയവും ഗ്ലാസ് ബോക്സിന് പുറത്ത് രണ്ട് ഗാർഡുകളോടൊപ്പം നിന്നിരുന്ന ഒരു പരിഭാഷകൻ പറയുന്നത് കേട്ട് തല കുനിച്ചു നിന്നു.
അതേസമയം, സിവിലിയന്മാരെ ലക്ഷ്യം വയ്ക്കുന്നതോ യുദ്ധക്കുറ്റങ്ങളിൽ പങ്കാളിത്തമോ റഷ്യ നിഷേധിച്ചു.
വിധിയെക്കുറിച്ച് ക്രെംലിൻ ഉടൻ പ്രതികരിച്ചില്ല. വിചാരണയെക്കുറിച്ച് തങ്ങൾക്ക് ഒരു വിവരവുമില്ലെന്നും യുക്രെയ്‌നിൽ ഒരു നയതന്ത്ര കാര്യാലയത്തിന്റെ അഭാവം സഹായം നൽകാനുള്ള തങ്ങളുടെ കഴിവിനെ പരിമിതപ്പെടുത്തുന്നുവെന്നും റഷ്യ നേരത്തെ പറഞ്ഞിരുന്നു.
ഷിഷിമാരിനും മറ്റ് നാല് റഷ്യൻ സൈനികരും തങ്ങളെ ഉക്രേനിയൻ സേന ലക്ഷ്യമാക്കുന്നുണ്ടെന്ന് മനസ്സിലാക്കി രക്ഷപ്പെടാൻ സ്വകാര്യ ഉടമസ്ഥതയിലുള്ള ഒരു കാർ മോഷ്ടിച്ചതായി ഉക്രേനിയൻ സ്റ്റേറ്റ് പ്രോസിക്യൂട്ടർമാർ പറഞ്ഞു. തുടർന്ന് സൈനികർ ചുപഖിവ്ക ഗ്രാമത്തിലേക്ക് പ്രവേശിക്കുകയും, അവിടെ ഷെലിപോവ് സൈക്കിളിൽ സഞ്ചരിക്കുന്നതും ഫോണിൽ സംസാരിക്കുന്നതും കണ്ടു.
റഷ്യക്കാരുടെ സാന്നിധ്യത്തെക്കുറിച്ച് റിപ്പോർട്ട് ചെയ്യുന്നത് തടയാൻ സിവിലിയനെ കൊല്ലാൻ മറ്റൊരു സൈനികൻ ഷിഷിമാരിനോട് ഉത്തരവിട്ടതായും, ഷെലിപോവിന്റെ തലയ്ക്ക് നേരെ റൈഫിൾ ഉപയോഗിച്ച് കാറിന്റെ തുറന്ന ജനാലയിലൂടെ നിരവധി തവണ വെടിയുതിർത്തതായും പ്രോസിക്യൂട്ടർമാർ പറഞ്ഞു. ഷെലിപോവ് സംഭവസ്ഥലത്തുവെച്ചു തന്നെ മരിച്ചു.
കഴിഞ്ഞയാഴ്ച കോടതിയിൽ, ഷിഷിമാരിൻ താൻ കുറ്റക്കാരനാണെന്ന് സമ്മതിക്കുകയും ഇരയുടെ വിധവ കാതറീന ഷെലിപോവയോട് ക്ഷമ ചോദിക്കുകയും ചെതു.
