യുണൈറ്റഡ് നേഷൻസ്: വെള്ളിയാഴ്ച ഗാസയിൽ ആംബുലൻസുകളുടെ വാഹനവ്യൂഹത്തിന് നേരെ ഇസ്രായേൽ സേന നടത്തിയ ആക്രമണത്തിൽ ഐക്യരാഷ്ട്രസഭ സെക്രട്ടറി ജനറല്‍ അന്റോണിയോ ഗുട്ടെറസ് അപലപിച്ചു. ഇത് “ഭയങ്കരവും ക്രൂരവും” ആണെന്നും സംഘർഷം “നിർത്തണം” എന്നും അദ്ദേഹം പ്രസ്താവനയിൽ പറഞ്ഞു.
ഗാസ സിറ്റിയിലെ ആശുപത്രിയുടെ പ്രവേശന കവാടത്തിൽ നിന്ന് ഒരു അടി അകലെ ഇസ്രായേൽ സൈന്യം തൊടുത്തുവിട്ട മിസൈൽ ആംബുലൻസുകളിലൊന്നില്‍ ഇടിച്ചതായി ഫലസ്തീൻ റെഡ് ക്രസന്റ് സൊസൈറ്റി പറഞ്ഞു, ആക്രമണത്തിൽ 15 പേർ കൊല്ലപ്പെടുകയും 60 ലധികം പേർക്ക് പരിക്കേൽക്കുകയും ചെയ്തു.
“അൽ ഷിഫ ആശുപത്രിക്ക് പുറത്ത് ആംബുലൻസ് വാഹനവ്യൂഹത്തിന് നേരെ ഗാസയിൽ റിപ്പോർട്ട് ചെയ്യപ്പെട്ട ആക്രമണം എന്നെ ഭയപ്പെടുത്തുന്നു. ആശുപത്രിക്ക് പുറത്ത് തെരുവിൽ കിടക്കുന്ന മൃതദേഹങ്ങളുടെ ചിത്രങ്ങൾ വേദനിപ്പിക്കുന്നതാണ്,” അന്റോണിയോ ഗുട്ടെറസ് പ്രസ്താവനയിൽ പറഞ്ഞു.
വെള്ളിയാഴ്ച ആക്രമണം നടന്ന സ്ഥലത്തുണ്ടായിരുന്ന ഒരു വിദേശ മാധ്യമ റിപ്പോര്‍ട്ടര്‍ ആശുപത്രിക്ക് പുറത്ത് തകര്‍ന്ന ആംബുലൻസിന് അരികിൽ ഒന്നിലധികം മൃതദേഹങ്ങൾ കണ്ടതായി പറഞ്ഞു. ഇസ്രായേൽ ബോംബിംഗിൽ നിന്ന് അഭയം തേടിയ സാധാരണക്കാരും പരിക്കേറ്റവരില്‍ ഉള്‍പ്പെടുന്നു.
“യുദ്ധമേഖലയിലെ തങ്ങളുടെ സ്ഥാനത്തിന് സമീപം ഹമാസ് ഭീകരസംഘം ഉപയോഗിക്കുന്നതായി സൈന്യം തിരിച്ചറിഞ്ഞ ആംബുലൻസിന്” നേരെ വ്യോമാക്രമണം നടത്തിയതായി ഇസ്രായേൽ സൈന്യം പറഞ്ഞു.
“ഇസ്രായേലിൽ ഹമാസ് നടത്തിയ ഭീകരാക്രമണങ്ങൾ താൻ മറന്നിട്ടില്ല. ഏകദേശം ഒരു മാസമായി ഗാസയിലെ കുട്ടികളും സ്ത്രീകളും ഉൾപ്പെടെയുള്ള സിവിലിയന്മാരെ ആക്രമിക്കുകയും, ഉപരോധിക്കുകയും, സഹായം നിഷേധിക്കുകയും കൊല്ലുകയും ബോംബെറിയുകയും ചെയ്യുകയാണ്. ഇത് നിർത്തണം,” ഗുട്ടെറസ് പറഞ്ഞു.
ഗാസയിലെ മാനുഷിക സാഹചര്യം ഭയങ്കരമാണ്. ഭക്ഷണവും വെള്ളവും മരുന്നും ആവശ്യത്തിന് ഇല്ല. ആശുപത്രികളിലും വാട്ടർ പ്ലാന്റുകളിലും പവർ ചെയ്യാനുള്ള ഇന്ധനം തീർന്നു,” അദ്ദേഹം മുന്നറിയിപ്പ് നൽകി.
“മോർഗുകൾ നിറഞ്ഞു കവിയുന്നു. കടകൾ ശൂന്യമാണ്. ശുചീകരണ സാഹചര്യം പരിതാപകരമാണ്. പ്രത്യേകിച്ച് കുട്ടികളിൽ രോഗങ്ങളും ശ്വാസകോശ സംബന്ധമായ അസുഖങ്ങളും വർദ്ധിക്കുന്നത് നാം കാണുന്നു. ഒരു ജനസമൂഹം മുഴുവൻ ആഘാതത്തിലാണ്. ഒരിടത്തും സുരക്ഷിതമല്ല,” അദ്ദേഹം പറഞ്ഞു.
അന്താരാഷ്ട്ര മാനുഷിക നിയമങ്ങളെ മാനിക്കാനും സാധാരണക്കാരെ സംരക്ഷിക്കാനും എല്ലാ കക്ഷികളോടും ഗുട്ടെറസ് വീണ്ടും ആവശ്യപ്പെട്ടു. എല്ലാവരും യുദ്ധനിയമങ്ങളോടുള്ള ബഹുമാനം ഉറപ്പാക്കാനും അദ്ദേഹം ആഹ്വാനം ചെയ്തു.
