ജനീവ: കൊറോണയ്ക്ക് പിന്നാലെ ചൈനയിൽ വീണ്ടും പുതിയൊരു നിഗൂഢ രോഗം പടര്‍ന്നുപിടിക്കുന്നതായി റിപ്പോര്‍ട്ട്. വടക്കൻ ചൈനയിൽ ന്യുമോണിയ പൊട്ടിപ്പുറപ്പെട്ടതിനെക്കുറിച്ചുള്ള കൂടുതൽ വിവരങ്ങൾക്കായി ലോകാരോഗ്യ സംഘടന (ഡബ്ല്യുഎച്ച്ഒ) ബീജിംഗിനോട് ആവശ്യപ്പെട്ടു. കുട്ടികളെയാണ് രോഗം ഏറ്റവും കൂടുതൽ ബാധിക്കുന്നത്. കുട്ടികളിൽ ശ്വാസകോശ സംബന്ധമായ അസുഖങ്ങളും ന്യുമോണിയ ക്ലസ്റ്ററുകളും വർദ്ധിക്കുന്നതിന്റെ റിപ്പോർട്ടുകളെക്കുറിച്ചുള്ള വിശദമായ വിവരങ്ങൾക്കായി WHO ഔദ്യോഗിക അഭ്യർത്ഥന നടത്തിയതായി യുഎൻ ആരോഗ്യ ഏജൻസി അറിയിച്ചു. റിപ്പോർട്ട് അനുസരിച്ച്, കഴിഞ്ഞ മൂന്ന് വർഷമായി ഡിസംബര്‍ മാസത്തില്‍ ഇൻഫ്ലുവൻസ പോലുള്ള രോഗങ്ങള്‍ വര്‍ദ്ധിക്കുന്നു, അതും സീറോ-കോവിഡ് നയം ഇവിടെ കർശനമായി നടപ്പാക്കിയ സമയത്ത്. കഴിഞ്ഞ വർഷം ഡിസംബറിലാണ് സീറോ-കോവിഡ് നയം ചൈന അവസാനിപ്പിച്ചത്.
ചൈനയിലെ ദേശീയ ആരോഗ്യ കമ്മീഷൻ ഈ മാസമാദ്യം ശ്വാസകോശ സംബന്ധമായ രോഗങ്ങളുടെ എണ്ണം വർദ്ധിച്ചതായ വിവരം നല്‍കിയതായി ലോകാരോഗ്യ സംഘടന അറിയിച്ചു. കോവിഡ്-19 പ്രതിരോധ നടപടികളിലെ അലംഭാവമാണ് ഇതിന് പ്രധാന കാരണം. റിപ്പോർട്ട് അനുസരിച്ച്, കൊവിഡ് നിയന്ത്രണത്തിലുള്ള അയവ്, കോവിഡുമായി ബന്ധപ്പെട്ട അസുഖങ്ങളുടെ വർദ്ധനവിന് മാത്രമല്ല, ഇൻഫ്ലുവൻസ, മൈകോപ്ലാസ്മ ന്യുമോണിയ (സാധാരണയായി ചെറിയ കുട്ടികളെ ബാധിക്കുന്ന ഒരു സാധാരണ ബാക്ടീരിയ അണുബാധ), റെസ്പിറേറ്ററി സിൻസിറ്റിയൽ വൈറസ് തുടങ്ങിയ രോഗങ്ങളിലേക്കും നയിച്ചു.
ഓൺലൈൻ മെഡിക്കൽ കമ്മ്യൂണിറ്റിയായ പ്രോ-മെഡ് 2019 ൽ വുഹാനിൽ പടരുന്ന ഒരു രോഗം കണ്ടെത്തിയിരുന്നു. ഇത് പിന്നീട് കോവിഡ്-19 ആയി തിരിച്ചറിഞ്ഞു. വടക്കൻ ചൈനയിൽ നിന്ന് വരുന്ന അജ്ഞാത ന്യൂമോണിയയുടെ വർദ്ധിച്ചു വരുന്ന മാധ്യമ റിപ്പോർട്ടുകളിലേക്ക് അതേ സംഘം വീണ്ടും ശ്രദ്ധ ആകർഷിച്ചു. ബീജിംഗിലെയും ലിയോണിംഗിലെയും വടക്കന്‍ ചൈനയിലെ മറ്റ് സ്ഥലങ്ങളിലെയും ശിശു ആശുപത്രികൾ രോഗികളായ കുട്ടികളെക്കൊണ്ട് നിറഞ്ഞതായി മാധ്യമ റിപ്പോർട്ടുകൾ പറഞ്ഞു. അതേസമയം, ന്യുമോണിയ ബാധിതരായ കുട്ടികളുടെ മാതാപിതാക്കൾ പകർച്ചവ്യാധി മൂടിവെക്കുന്നുവെന്ന് ചിലർ റിപ്പോർട്ട് ചെയ്തു. സംശയാസ്പദമായ രോഗത്തെക്കുറിച്ചുള്ള വിവരങ്ങൾ ചൈനയ്ക്ക് തീർച്ചയായും അറിയാമെന്ന് പ്രോമെഡ് പറഞ്ഞു. എന്നാൽ, നിലവിലെ സാഹചര്യത്തെക്കുറിച്ചുള്ള കൂടുതൽ വിശദാംശങ്ങൾ ലോകാരോഗ്യ സംഘടന ആവശ്യപ്പെട്ടിട്ടുണ്ട്.
2019 അവസാനത്തോടെ പൊട്ടിപ്പുറപ്പെട്ട കോവിഡ് -19 പകർച്ചവ്യാധിയെ മുമ്പ് അജ്ഞാത ന്യുമോണിയ എന്ന് മുദ്രകുത്തിയിരുന്നു. 2020 ജനുവരിയിൽ ആദ്യത്തെ മരണത്തിന് ശേഷമാണ് രോഗത്തിന്റെ ജനിതക കോഡ് പരസ്യമാക്കിയത്. കോവിഡ് വൈറസിന്റെ ദ്രുതഗതിയിലുള്ള വ്യാപനത്തെക്കുറിച്ചും ബീജിംഗിന്റെ നിഷ്‌ക്രിയത്വത്തെക്കുറിച്ചും 2020 മാർച്ചിൽ WHO ആശങ്ക പ്രകടിപ്പിച്ചിരുന്നു. തൽഫലമായാണ് 2020 മാർച്ചിൽ കോവിഡ് ഒരു പകര്‍ച്ചവ്യാധിയാണെന്ന് WHO പ്രഖ്യാപിച്ചത്.
