ന്യൂഡല്‍ഹി: എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ അറസ്റ്റും കസ്റ്റഡിയും ചോദ്യം ചെയ്ത് ഡൽഹി മുഖ്യമന്ത്രി അരവിന്ദ് കെജ്‌രിവാൾ സമർപ്പിച്ച ഹർജി അടിയന്തരമായി പരിഗണിക്കണമെന്ന ആവശ്യം ഡൽഹി ഹൈക്കോടതി ശനിയാഴ്ച തള്ളി.
എൻഫോഴ്‌സ്‌മെൻ്റ് ഡയറക്‌ടറേറ്റിൻ്റെ അറസ്റ്റിനെതിരെ കെജ്‌രിവാളിൻ്റെ ഹരജി അടിയന്തരമായി പട്ടികപ്പെടുത്തണമെന്നും ആവശ്യപ്പെട്ട് കെജ്‌രിവാളിൻ്റെ അഭിഭാഷക സംഘം കഴിഞ്ഞ ദിവസം ഹൈക്കോടതിയെ സമീപിച്ചിരുന്നു. എന്നാൽ, ഇത് തള്ളിയ ഹൈക്കോടതി വിഷയം ബുധനാഴ്ച വീണ്ടും തുറക്കുമ്പോൾ ലിസ്റ്റ് ചെയ്യുമെന്ന് അറിയിച്ചു.
രണ്ട് മണിക്കൂറോളം നീണ്ട ചോദ്യം ചെയ്യലിന് ശേഷം വ്യാഴാഴ്ച രാത്രിയാണ് ഡൽഹി മുഖ്യമന്ത്രിയെ കേന്ദ്ര അന്വേഷണ ഏജൻസി അറസ്റ്റ് ചെയ്തത്. പിന്നീട്, റോസ് അവന്യൂ കോടതി അദ്ദേഹത്തെ മാർച്ച് 28 വരെ ഇഡിയുടെ കസ്റ്റഡിയിൽ വിട്ടു.
വ്യാഴാഴ്ച രാത്രി അദ്ദേഹത്തിൻ്റെ അറസ്റ്റിനെത്തുടർന്ന് ആം ആദ്മി പാർട്ടി (എഎപി) തലവനും സുപ്രീം കോടതിയിൽ ഹർജി നൽകിയിരുന്നുവെങ്കിലും പിന്നീട് അത് പിൻവലിച്ചു.
ഡൽഹി മുൻ ഉപമുഖ്യമന്ത്രി മനീഷ് സിസോദിയ, എഎപി എംപി സഞ്ജയ് സിംഗ്, ബിആർഎസ് നേതാവ് കെ കവിത എന്നിവർക്ക് ശേഷം ഡൽഹി എക്സൈസ് നയ കേസിൽ അറസ്റ്റിലാകുന്ന നാലാമത്തെ പ്രമുഖ നേതാവാണ് കെജ്രിവാള്‍.
മദ്യനയ കുംഭകോണത്തിൻ്റെ രാജാവ് കെജ്‌രിവാളാണെന്നും ഇപ്പോൾ റദ്ദാക്കിയ എക്സൈസ് നയത്തിൽ ആനുകൂല്യം നൽകുന്നതിന് പകരമായി ‘സൗത്ത് ലോബി’യിൽ നിന്ന് 100 കോടി രൂപ കൈപ്പറ്റിയെന്നും ഇഡി ആരോപിച്ചു.
എന്നാൽ, ആരോപണങ്ങൾ നിഷേധിച്ച ഡൽഹി മുഖ്യമന്ത്രി ലോക്‌സഭാ തെരഞ്ഞെടുപ്പിന് മുന്നോടിയായി ബി.ജെ.പി നടത്തിയ രാഷ്ട്രീയ ഗൂഢാലോചനയാണ് തൻ്റെ അറസ്റ്റെന്ന് പറഞ്ഞു.
