സോൾ: അതിർത്തി കടന്നുള്ള റോഡുകൾ തടയുന്നതിനായി ഇരു കൊറിയകളെയും വേർതിരിക്കുന്ന സൈനികരഹിത മേഖലയ്ക്കുള്ളിലെ റോഡിൽ ഉത്തര കൊറിയ കുഴിബോംബുകൾ സ്ഥാപിച്ചതായി ദക്ഷിണ കൊറിയ ആരോപിച്ചു.
സിയോളിൽ നിന്ന് 85 കിലോമീറ്റർ വടക്കുകിഴക്കായി ചിയോർവോണിലെ ആരോഹെഡ് ഹില്ലിന് സമീപമുള്ള ഡിഎംസെഡിനുള്ളിലെ നടപ്പാതയില്ലാത്ത റോഡിൽ ഉത്തരകൊറിയ സ്ഥാപിച്ച കുഴിബോംബുകൾ കഴിഞ്ഞ വർഷം അവസാനം സൈന്യം കണ്ടെത്തിയതായി ഉദ്യോഗസ്ഥനെ ഉദ്ധരിച്ച് മാധ്യമങ്ങള്‍ റിപ്പോർട്ട് ചെയ്തു.
1950 മുതൽ 1953 വരെയുള്ള കൊറിയൻ യുദ്ധത്തിൽ കൊല്ലപ്പെട്ടവരുടെ അവശിഷ്ടങ്ങൾ പുറത്തെടുക്കാനുള്ള സംയുക്ത ശ്രമങ്ങൾക്കായി ദക്ഷിണ കൊറിയയെയും ഉത്തര കൊറിയയെയും ബന്ധിപ്പിക്കുന്നതിനുള്ള 2018 ലെ അന്തർ കൊറിയൻ സൈനിക കരാറിന് കീഴിലാണ് റൂട്ട് സൃഷ്ടിച്ചത്.
കഴിഞ്ഞ മാസം, ഉത്തര കൊറിയ രണ്ട് റോഡുകളിലെയും ഡസൻ കണക്കിന് തെരുവ് വിളക്കുകൾ നീക്കം ചെയ്തതായി ദക്ഷിണ കൊറിയൻ സൈന്യം നിരീക്ഷിച്ചതായി ഉദ്യോഗസ്ഥനെ ഉദ്ധരിച്ച് മാധ്യമങ്ങള്‍ റിപ്പോർട്ട് ചെയ്തു. ദക്ഷിണ കൊറിയയുമായുള്ള ദശാബ്ദങ്ങൾ പഴക്കമുള്ള ഏകീകരണ നയം അവസാനിപ്പിക്കാൻ ഉത്തര കൊറിയൻ നേതാവ് കിം ജോങ് ഉൻ ആഹ്വാനം ചെയ്യുകയും പരസ്പരം ശത്രുതയുള്ള രണ്ട് രാജ്യങ്ങളായി തങ്ങളുടെ ബന്ധത്തെ പുനർനിർവചിക്കുകയും ചെയ്തതിന് പിന്നാലെയാണ് ഈ നീക്കം. അതിർത്തിയിൽ കൊറിയൻ ആശയവിനിമയത്തിനുള്ള എല്ലാ ചാനലുകളും തടയുന്നതിന് കർശന നടപടികൾ സ്വീകരിക്കാൻ ജനുവരിയിൽ കിം ജോങ് ഉൻ നിർദ്ദേശം നൽകിയിരുന്നു.
കഴിഞ്ഞ വർഷം ഉത്തര കൊറിയ ഇരുരാജ്യങ്ങളും തമ്മിലുള്ള എല്ലാ റോഡുകളിലും കുഴിബോംബുകൾ സ്ഥാപിച്ചിട്ടുണ്ടെന്ന് ദക്ഷിണ കൊറിയ പറഞ്ഞു. ജനുവരിയിൽ, ഉത്തര കൊറിയൻ സൈന്യം രണ്ട് അന്തർ-കൊറിയൻ റോഡുകളില്‍ (ദക്ഷിണ കൊറിയയുടെ പടിഞ്ഞാറൻ അതിർത്തി നഗരമായ പജുവിനും ഉത്തരകൊറിയയുടെ കെസോങ്ങിനും ഇടയിലുള്ള ജിയോംഗുയി റോഡും കിഴക്കൻ തീരത്തെ ഡോങ്ഹേ റോഡും) കുഴിബോംബുകൾ സ്ഥാപിക്കുന്നത് കണ്ടതായി ദക്ഷിണ കൊറിയ അവകാശപ്പെട്ടു.
