ചെന്നൈ/പുതുച്ചേരി: ‘ഫെംഗൽ’ ചുഴലിക്കാറ്റിൻ്റെ ആഘാതത്തിൽ വടക്കൻ തമിഴ്‌നാട്ടിലെയും പുതുച്ചേരിയിലെയും പല ഭാഗങ്ങളിലും ശനിയാഴ്ച കനത്ത മഴ പെയ്തു. ശക്തമായ കാറ്റിൻ്റെ അകമ്പടിയോടെ പെയ്ത മഴ നവംബർ 29-ന് രാത്രി തീരപ്രദേശങ്ങളിൽ ഇടവിട്ടുള്ള മഴയായി തുടങ്ങി, ക്രമേണ സ്ഥിരമായി പല പ്രദേശങ്ങളിലും വെള്ളപ്പൊക്കത്തിലേക്ക് നയിച്ചു.
ചെന്നൈ വിമാനത്താവളത്തിൻ്റെ പ്രവർത്തനം ഉച്ചയ്ക്ക് 12.30നും വൈകിട്ട് ഏഴിനും ഇടയിൽ നിർത്തിവച്ചു. അയൽ കേന്ദ്രഭരണ പ്രദേശമായ പുതുച്ചേരിയിൽ താഴ്ന്ന പ്രദേശങ്ങളിൽ താമസിക്കുന്നവരെ ഒഴിപ്പിച്ചതായി ജില്ലാ കളക്ടർ എ കുലോത്തുംഗൻ പറഞ്ഞു.
‘ഫെംഗൽ’ വൈകുന്നേരത്തോടെ പുതുച്ചേരിയില്‍ ആഞ്ഞടിക്കാന്‍ സാധ്യതയുള്ളതിനാൽ ജാഗ്രത പാലിക്കാൻ മുന്നറിയിപ്പ് നൽകി 12 ലക്ഷത്തോളം താമസക്കാർക്ക് SMS അലേർട്ടുകൾ അയച്ചു.
ചെന്നൈയിൽ, തമിഴ്‌നാട് മുഖ്യമന്ത്രി എംകെ സ്റ്റാലിൻ, സ്റ്റേറ്റ് എമർജൻസി ഓപ്പറേഷൻസ് സെൻ്ററിലെ സ്ഥിതിഗതികൾ ഉന്നത ഉദ്യോഗസ്ഥരുമായി അവലോകനം ചെയ്യുകയും പിന്നീട് മാധ്യമ പ്രവർത്തകരോട് സംസാരിക്കുകയും ചെയ്തു. എല്ലാ മുൻകരുതൽ നടപടികളും ഇതിനകം സ്വീകരിച്ചിട്ടുണ്ടെന്നും ദുർബല പ്രദേശങ്ങളിലെ ആളുകൾക്കായി ക്യാമ്പുകൾ തുറന്നിട്ടുണ്ടെന്നും, അവർക്കുള്ള ഭക്ഷണവും വിതരണം ചെയ്തതായി അദ്ദേഹം പറഞ്ഞു.
നഗരത്തിൻ്റെ പല ഭാഗങ്ങളിലും വെള്ളം കയറുകയും മരങ്ങൾ കടപുഴകി വീഴുകയും ചെയ്തു. എൻജിനീയർമാരും ഉദ്യോഗസ്ഥരും സാനിറ്ററി തൊഴിലാളികളും ഉൾപ്പെടെ 22,000 പേർ ജോലിയിലുണ്ടെന്നും 25-എച്ച്പി, 100-എച്ച്പി ഉൾപ്പെടെ വിവിധ ശേഷിയുള്ള 1,686 മോട്ടോർ പമ്പുകൾ ഉപയോഗത്തിലുണ്ടെന്നും ഗ്രേറ്റർ ചെന്നൈ കോർപ്പറേഷൻ (ജിസിസി) അധികൃതർ അറിയിച്ചു. 484 ട്രാക്ടർ ഘടിപ്പിച്ച ഹെവി ഡ്യൂട്ടി പമ്പുകളും 100 എച്ച്പി ശേഷിയുള്ള 137 പമ്പുകളും വിന്യസിച്ചിട്ടുണ്ട്.
134 സ്ഥലങ്ങളിലെ വെള്ളക്കെട്ട് നീക്കാനുള്ള ‘യുദ്ധകാലാടിസ്ഥാനത്തിൽ’ ജോലികൾ പുരോഗമിക്കുകയാണെന്നും, കടപുഴകി വീണ 9 മരങ്ങളിൽ 5 എണ്ണം വെട്ടിമാറ്റിയതായും ജിസിസി അറിയിച്ചു. 22 സബ്‌വേകളിൽ 21 എണ്ണത്തിലും ഗതാഗതം സുഗമമാണ്. റെയിൽവേ പാലം പണിയുമായി ബന്ധപ്പെട്ട ജോലികൾക്കായി ഗണേശപുരം സബ്‌വേ നേരത്തേ അടച്ചിരുന്നു.
നഗരത്തിൻ്റെ കുടിവെള്ള ആവശ്യങ്ങൾ നിറവേറ്റുന്ന ചെമ്പരമ്പാക്കം, പൂണ്ടി തുടങ്ങിയ ജലസംഭരണികളിൽ വൻതോതിൽ ഒഴുക്ക് ലഭിച്ചു.
താഴ്ന്ന മടിപ്പാക്കം നിവാസികൾ പലരും തങ്ങളുടെ കാറുകൾ സമീപത്തെ വേളാച്ചേരി മേൽപ്പാലത്തിൻ്റെ ഇരുവശങ്ങളിലും പാർക്ക് ചെയ്തു.
സമാനമായ അപകടസാധ്യതയുള്ള പ്രദേശങ്ങളിലെ താമസക്കാരും അവരുടെ വാഹനങ്ങൾ സുരക്ഷിത സ്ഥലങ്ങളിൽ പാർക്ക് ചെയ്തു. റോഡുകൾ വിജനമായിരുന്നു, അപകടസാധ്യതയുള്ള സ്ഥലങ്ങളിൽ വിന്യസിച്ചിരിക്കുന്ന പൗര പ്രവർത്തകർ, പോലീസ്, ഫയർ ആൻഡ് റെസ്ക്യൂ ഉദ്യോഗസ്ഥർ എന്നിവർ മഴയുമായി ബന്ധപ്പെട്ട ദുരിതാശ്വാസ/രക്ഷാപ്രവർത്തനങ്ങൾ നടത്തി.
ചെന്നൈയിലും സമീപ പ്രദേശങ്ങളിലും സർക്കാർ നിയന്ത്രണത്തിലുള്ള ട്രാൻസ്പോർട്ട് കോർപ്പറേഷനുകൾ പരിമിതമായ രീതിയില്‍ സേവനങ്ങൾ നടത്തി. ചെന്നൈ ഡിവിഷനിലെ എല്ലാ സബർബൻ സെക്‌ഷനുകളിലെയും ഇഎംയു ട്രെയിൻ സർവീസുകൾ ഇനിയൊരു അറിയിപ്പ് ഉണ്ടാകുന്നതുവരെ കുറഞ്ഞ ആവൃത്തിയിൽ പ്രവർത്തിക്കുമെന്ന് റെയിൽവേ അധികൃതർ അറിയിച്ചു. അൽപ്പം കാലതാമസം നേരിട്ടെങ്കിലും വലിയതോതിൽ ട്രെയിൻ (എക്‌സ്‌പ്രസ്/സൂപ്പർഫാസ്റ്റ് ഉൾപ്പെടെ) സർവീസുകളെ ബാധിച്ചിട്ടില്ലെന്ന് ഒരു ഉദ്യോഗസ്ഥൻ പറഞ്ഞു.
മണിക്കൂറിൽ 65-73 കിലോമീറ്റർ വേഗതയിൽ കാറ്റ് വീശുന്നതിനാൽ, ചെന്നൈ ബീച്ചിനും വേളാച്ചേരിക്കും ഇടയിലുള്ള എംആർടിഎസ് സെക്‌ഷനിലെ സബർബൻ സർവീസുകൾ ഉച്ചയ്ക്ക് 12.15 മുതൽ നിർത്തിവച്ചതായി അധികൃതർ അറിയിച്ചു.
ചെന്നൈ മെട്രോ റെയിൽ തങ്ങളുടെ സേവനങ്ങൾ തടസ്സങ്ങളില്ലാതെ പ്രവർത്തനക്ഷമമാണെന്നും വെള്ളപ്പൊക്കത്തിന് സാധ്യതയുള്ള നിർദ്ദിഷ്ട സ്റ്റേഷനുകളിലെ പാർക്കിംഗ് ഏരിയകളെക്കുറിച്ച് പൊതുജനങ്ങളെ അറിയിച്ചു.
ഉച്ചയ്ക്ക് 12.30 മുതൽ വൈകിട്ട് ഏഴ് വരെ എല്ലാ പ്രവർത്തനങ്ങളും നിർത്തിവെച്ചതായി എയർപോർട്ട് അധികൃതർ അറിയിച്ചു.
ആഭ്യന്തര, അന്താരാഷ്‌ട്ര വിമാനങ്ങളുടെ പുറപ്പെടൽ, എത്തിച്ചേരൽ സമയക്രമത്തെ ബാധിച്ചു. ചില വിമാനങ്ങൾ ബെംഗളൂരുവിലേക്കും തിരുച്ചിറപ്പള്ളിയിലേക്കും തിരിച്ചുവിടുകയും 18 വിമാനങ്ങൾ റദ്ദാക്കുകയും 12 വിമാനങ്ങൾ വൈകുകയും ചെയ്തു.
കടൽ പ്രക്ഷുബ്ധമായതിനാൽ മറീന, മാമല്ലപുരം എന്നിവയുൾപ്പെടെയുള്ള ബീച്ചുകളിലേക്കുള്ള പ്രവേശനം തടയാൻ പോലീസ് ബാരിക്കേഡുകൾ സ്ഥാപിച്ചു. സർക്കാർ നടത്തുന്ന ആവിൻ പാൽ വിതരണത്തെ ബാധിച്ചില്ല, പല പ്രദേശങ്ങളിലും വൈദ്യുതി വിതരണം സാധാരണ നിലയിലായി.
സർക്കാർ നവംബർ 30 വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചിരുന്നു, കൂടാതെ ഐടി സ്ഥാപനങ്ങളോട് അവരുടെ ജീവനക്കാരെ വീട്ടിലിരുന്ന് ജോലി ചെയ്യാൻ അനുവദിക്കണമെന്ന് അഭ്യർത്ഥിച്ചിരുന്നു.
പുതുച്ചേരിയിൽ, ദുരിതാശ്വാസ പുനരധിവാസ പ്രവർത്തനങ്ങളിൽ ഏർപ്പെടാൻ ആരക്കോണത്ത് നിന്ന് ദേശീയ ദുരന്ത നിവാരണ സേന (എൻഡിആർഎഫ്) എത്തി.
ഫെങ്കൽ ചുഴലിക്കാറ്റ് വൈകുന്നേരത്തോടെ തീരം കടക്കുമെന്ന് കരുതിയിരുന്നതായി കലക്ടർ കുലോത്തുങ്കൻ അറിയിച്ചു. കളക്ടറേറ്റിലും ലൈൻ വകുപ്പുകളിലും കൺട്രോൾ റൂമുകൾ തുറന്നിട്ടുണ്ട്.
പൊതുജനങ്ങളുടെ സഞ്ചാരം നിയന്ത്രിക്കുന്നതിനായി ബീച്ച് റോഡിൻ്റെ മുഴുവൻ ഭാഗവും നിരവധി ടൂറിസ്റ്റ് കേന്ദ്രങ്ങളും അടച്ചു. സ്കൂളുകൾക്കും കോളേജുകൾക്കും ഇന്നും അവധിയായിരുന്നു.
