ചെന്നൈ: സാവധാനത്തിൽ നീങ്ങുന്ന ഫെംഗൽ ചുഴലിക്കാറ്റ് ശനിയാഴ്ച ഉച്ചയോടെ ചെന്നൈയ്ക്ക് സമീപം കരയിൽ പതിക്കുമെന്ന് ചെന്നൈ റീജിയണൽ മെറ്റീരിയോളജിക്കൽ സെൻ്റർ (ആർഎംസി) അറിയിച്ചു. ചുഴലിക്കാറ്റ് പുതുച്ചേരിക്ക് സമീപം കടക്കുമെന്ന് പ്രതീക്ഷിക്കുന്നതിനാൽ സ്കൂളുകളും കോളേജുകളും അടച്ചിടുകയും മത്സ്യത്തൊഴിലാളികളോട് കടലില്‍ പോകരുതെന്ന് നിര്‍ദ്ദേശം നല്‍കുകയും ചെയ്തു.
ശനിയാഴ്ച കനത്തതോ അതിശക്തമായതോ ആയ മഴയ്ക്ക് സാധ്യതയുള്ള ചെന്നൈ, ചെങ്കൽപട്ട്, കാഞ്ചീപുരം, തിരുവള്ളൂർ, കടലൂർ, വില്ലുപുരം, കല്ലുറിച്ചി, മയിലാടുതുറൈ എന്നിവയുൾപ്പെടെ തമിഴ്‌നാട്ടിലെ എട്ട് ജില്ലകളിലാണ് റെഡ് അലർട്ട് പ്രഖ്യാപിച്ചിരിക്കുന്നത്.
ചുഴലിക്കാറ്റിൻ്റെ ആഘാതം കണക്കിലെടുത്ത് ഈ ജില്ലകളിലെ എല്ലാ സ്‌കൂളുകൾക്കും കോളേജുകൾക്കും തമിഴ്‌നാട് സർക്കാർ അവധി പ്രഖ്യാപിച്ചു. കനത്ത മഴയുടെ മുന്നറിയിപ്പുള്ള പ്രദേശങ്ങളിൽ തമിഴ്‌നാട് റവന്യൂ, ദുരന്തനിവാരണ വകുപ്പ് 2,229 ദുരിതാശ്വാസ കേന്ദ്രങ്ങൾ തുറന്നിട്ടുണ്ട്.
നിലവിൽ തിരുവാരൂർ, നാഗപട്ടണം ജില്ലകളിലെ 164 കുടുംബങ്ങളിലെ 471 പേരെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു.
ആവശ്യമെങ്കിൽ കൂടുതൽ ഒഴിപ്പിക്കലുകൾക്ക് തയ്യാറാണെന്ന് വകുപ്പ് അറിയിച്ചു.
കനത്ത മഴയും കാറ്റും പ്രവചിച്ചതോടെ ചെന്നൈ അന്താരാഷ്ട്ര വിമാനത്താവളം നഗരത്തിലേക്കും തിരിച്ചുമുള്ള 18 വിമാനങ്ങൾ റദ്ദാക്കി. കൂടാതെ, സംസ്ഥാന സർക്കാർ പൊതു സുരക്ഷാ ഉപദേശം പുറപ്പെടുവിച്ചു. ജീവനക്കാരെ വീട്ടിലിരുന്ന് ജോലി ചെയ്യാൻ അനുവദിക്കണമെന്ന് ഐടി കമ്പനികളോട് സർക്കാർ അഭ്യർത്ഥിച്ചു.
ഈസ്റ്റ് കോസ്റ്റ് റോഡ് (ഇസിആർ), പഴയ മഹാബലിപുരം റോഡ് (ഒഎംആർ) എന്നിവിടങ്ങളിലെ പൊതുഗതാഗത സേവനങ്ങൾ ശനിയാഴ്ച ഉച്ച മുതൽ താൽക്കാലികമായി നിർത്തിവയ്ക്കും.
അത്യാവശ്യമല്ലാതെ വീടിനുള്ളിൽ തന്നെ കഴിയാൻ താമസക്കാരോട് ആവശ്യപ്പെട്ടിട്ടുണ്ട്.
ബീച്ചുകൾ, അമ്യൂസ്‌മെൻ്റ് പാർക്കുകൾ, വിനോദ പരിപാടികൾ എന്നിവ സന്ദർശിക്കുന്നത് ഒഴിവാക്കണമെന്ന് തമിഴ്‌നാട് സ്റ്റേറ്റ് ഡിസാസ്റ്റർ മാനേജ്‌മെൻ്റ് അതോറിറ്റി (ടിഎൻഡിഎംഎ) നിർദ്ദേശിച്ചു.
ചുഴലിക്കാറ്റും അതുമായി ബന്ധപ്പെട്ട കനത്ത മഴയും നേരിടാൻ പൗരസമിതി പൂർണ സജ്ജമാണെന്ന് ഗ്രേറ്റർ ചെന്നൈ കോർപ്പറേഷൻ (ജിസിസി) മേയർ ആർ.പ്രിയ പൊതുജനങ്ങൾക്ക് ഉറപ്പ് നൽകി. ചെന്നൈയിലും സമീപ ജില്ലകളിലും പാർക്കുകളും ബീച്ചുകളും ഇന്നും അടഞ്ഞുകിടക്കും.
കനത്ത മഴയിൽ മരങ്ങൾക്ക് താഴെ വാഹനങ്ങൾ പാർക്ക് ചെയ്യുന്നതിനോ വാഹനങ്ങൾ നിര്‍ത്തുന്നതിനോ എതിരെ ജിസിസി പ്രത്യേക മുന്നറിയിപ്പ് നൽകിയിട്ടുണ്ട്.
മഴക്കെടുതിയുമായി ബന്ധപ്പെട്ട പരാതികൾ പരിഹരിക്കാൻ 200 വാർഡുകളിലും 10 തൊഴിലാളികളെ വീതം അധികമായി നിയോഗിച്ച് 28,000 തൊഴിലാളികളെയാണ് കോർപ്പറേഷൻ മഴ ദുരിതാശ്വാസ പ്രവർത്തനങ്ങൾക്കായി നിയോഗിച്ചിരിക്കുന്നത്.
ഭക്ഷണവിതരണം, രക്ഷാപ്രവർത്തനം എന്നിവയിലും ഈ തൊഴിലാളികൾ സഹായിക്കും.
പൗരസമിതിയുമായി ആശയവിനിമയം നിലനിർത്താൻ സന്നദ്ധപ്രവർത്തകരെ അണിനിരത്തിയിട്ടുണ്ട്, അടിയന്തര വിന്യാസത്തിനായി 36 ബോട്ടുകൾ സജ്ജമാണ്.
