റിയാദ്: ഗാസയുടെ പുനർനിർമ്മാണത്തിനായി യുഎസ് പ്രസിഡന്റ് ഡൊണാൾഡ് ട്രംപ് മുന്നോട്ടു വെച്ച നിര്‍ദ്ദേശം അറബ് രാഷ്ട്രങ്ങള്‍ നിരസിച്ചു. പലസ്തീനികൾ ഒഴിഞ്ഞുപോകണമെന്നും, അമേരിക്കയുടെ സഹായത്തോടെ ഇസ്രായേല്‍ ഗാസയില്‍ നിര്‍മ്മാണം നടത്തുമെന്നുമായിരുന്നു ട്രംപിന്റെ നിര്‍ദ്ദേശം. എന്നാല്‍, ഈ നിര്‍ദ്ദേശമാണ് അറബ് രാഷ്ട്രങ്ങളെ രോഷാകുലരാക്കിയത്.
ഈജിപ്തും ജോർദാനും ട്രംപിന്റെ പദ്ധതി ഇതിനകം നിരസിച്ചു കഴിഞ്ഞു. അതേസമയം, പലസ്തീനികളുടെ കാര്യത്തിൽ ഒരു തരത്തിലുള്ള വിട്ടുവീഴ്ചയ്ക്കും തയ്യാറല്ലെന്ന് സൗദി അറേബ്യയും അറിയിച്ചു. ഗാസയുടെ ഭാവിക്കായി ഒരു പദ്ധതി വികസിപ്പിക്കാനുള്ള അറബ് രാജ്യങ്ങളുടെ ശ്രമങ്ങൾക്ക് സൗദി അറേബ്യ നേതൃത്വം നൽകുന്നുണ്ടെന്ന് വൃത്തങ്ങൾ അറിയിച്ചു. ഇതിനർത്ഥം ഗാസയിൽ ട്രംപിന്റെ നിർദ്ദേശം തടയാൻ സൗദി അറേബ്യ ഒരു സംഘത്തെ നയിക്കുന്നു എന്നാണ്. അതായത് മുഹമ്മദ് ബിൻ സൽമാനും ട്രംപും നേര്‍ക്കുനേര്‍ എന്നര്‍ത്ഥം.
ഈ മാസം സൗദി അറേബ്യയുടെ തലസ്ഥാനമായ റിയാദിൽ ഒരു യോഗം നടക്കുമെന്ന് വൃത്തങ്ങൾ അറിയിച്ചു. സൗദി അറേബ്യ, ഈജിപ്ത്, ജോർദാൻ, യുണൈറ്റഡ് അറബ് എമിറേറ്റ്സ് എന്നിവ കൂടാതെ, നിരവധി അറബ് രാജ്യങ്ങളില്‍ നിന്നുള്ള ഉദ്യോഗസ്ഥര്‍ ഈ യോഗത്തില്‍ പങ്കെടുക്കും. ഈ യോഗത്തിൽ ഗാസ മുനമ്പിനെക്കുറിച്ചുള്ള പുതിയ കരട് ചർച്ച ചെയ്യും.
ഗാസയുടെ പുനർനിർമ്മാണത്തിനായി ഗൾഫ് നേതൃത്വം നൽകുന്ന ഫണ്ടും ഹമാസിനെ ആ കരാറിൽ നിന്ന് മാറ്റി നിർത്താനുള്ള നിർദ്ദേശവും നിർദ്ദേശങ്ങളിൽ ഉൾപ്പെടാൻ സാധ്യതയുണ്ടെന്ന് ഈ വിഷയവുമായി പരിചയമുള്ള ഉദ്യോഗസ്ഥർ പറഞ്ഞു.
ഗാസയുടെ നിയന്ത്രണം അമേരിക്ക ഏറ്റെടുക്കുമെന്നും, പലസ്തീനികളെ പുറത്താക്കുമെന്നുമുള്ള ട്രംപിന്റെ നിർദ്ദേശത്തിൽ സൗദി അറേബ്യയും സഖ്യകക്ഷികളും സ്തബ്ധരായി എന്ന് വൃത്തങ്ങള്‍ പറഞ്ഞു. ട്രംപിന്റെ ഈ നിര്‍ദ്ദേശം ദുരുദ്ദേശപരമാണെന്നും, ഇസ്രായേലിനെ പ്രീണിപ്പിക്കാന്‍ പലസ്തീനികളെ എന്നെന്നേക്കുമായി നശിപ്പിക്കാനുള്ള തന്ത്രമാണെന്ന് അറബ് രാജ്യങ്ങൾ വിശ്വസിക്കുന്നു. ട്രംപ് പറയുന്നതനുസരിച്ച്, അവർ ജോർദാനിലേക്കും ഈജിപ്തിലേക്കും നാടുകടത്തപ്പെടും, അവർക്ക് ഒരിക്കലും ഗാസയിലേക്ക് മടങ്ങിവരാന്‍ കഴിയില്ല.
ട്രംപിന്റെ നിർദ്ദേശം സൗദി അറേബ്യയിൽ നിരാശ വർദ്ധിപ്പിച്ചിട്ടുണ്ടെന്ന് വൃത്തങ്ങൾ വെളിപ്പെടുത്തി. പലസ്തീനികള്‍ക്ക് പ്രത്യേക രാഷ്ട്രം സൃഷ്ടിക്കണമെന്ന തങ്ങളുടെ ആവശ്യം ഈ നിര്‍ദ്ദേശത്തോടെ അവസാനിപ്പിക്കുമെന്ന് സൗദി അറേബ്യ വിശ്വസിക്കുന്നു. ഇതിനുപുറമെ, ഇസ്രായേലുമായുള്ള സൗദി അറേബ്യയുടെ ബന്ധം സാധാരണ നിലയിലാക്കുന്നതിന് ഈ നിര്‍ദ്ദേശം വിലങ്ങുതടിയാകുകയും ചെയ്യും. ഗാസയെക്കുറിച്ച് പുതിയൊരു നിർദ്ദേശം തയ്യാറാക്കി അമേരിക്കൻ പ്രസിഡന്റിന് അയക്കാന്‍ അറബ് രാജ്യങ്ങൾ ശ്രമിക്കുന്നുണ്ട്. അങ്ങനെ അത് ട്രംപിന്റെ നിർദ്ദേശമാണെന്ന് വേണമെങ്കില്‍ വിശേഷിപ്പിക്കാം.
ഹമാസിന്റെ പങ്കാളിത്തമില്ലാതെ ഗാസ ഭരിക്കുന്നതിന് ഒരു ദേശീയ പലസ്തീൻ കമ്മിറ്റി രൂപീകരിക്കണമെന്നാണ് ഈജിപ്തിന്റെ നിർദ്ദേശമെന്ന് ഈജിപ്ഷ്യൻ സുരക്ഷാ വൃത്തങ്ങൾ അറിയിച്ചു. പലസ്തീനികളെ വിദേശത്തേക്ക് മാറ്റിപ്പാർപ്പിക്കാതെയും ദ്വിരാഷ്ട്ര പരിഹാരത്തിലേക്ക് നീങ്ങാതെയും പുനർനിർമ്മാണത്തിൽ അന്താരാഷ്ട്ര പങ്കാളിത്തവും ഇതിൽ ഉൾപ്പെടുന്നു.
ഫെബ്രുവരി 27 ന് നടക്കുന്ന ഉച്ചകോടിയിൽ അവതരിപ്പിക്കുന്നതിന് മുമ്പ് സൗദി അറേബ്യ, ഈജിപ്ത്, ജോർദാൻ, യുണൈറ്റഡ് അറബ് എമിറേറ്റ്സ്, പലസ്തീൻ എന്നീ രാജ്യങ്ങളുടെ പ്രതിനിധികൾ റിയാദിൽ പദ്ധതി അവലോകനം ചെയ്ത് ചർച്ച ചെയ്യുമെന്ന് അറബ് സർക്കാർ വൃത്തങ്ങൾ അറിയിച്ചു. സൗദി അറേബ്യ വളരെക്കാലമായി അമേരിക്കയുടെ ഒരു പ്രധാന പ്രാദേശിക പങ്കാളിയാണ്. അതിനുപുറമെ, ട്രംപും കിരീടാവകാശി മുഹമ്മദ് ബിൻ സൽമാനും തമ്മിൽ വളരെ നല്ല ബന്ധവുമുണ്ട്. അതുകൊണ്ടുതന്നെ, ഗാസയുടെ പുനർനിർമ്മാണത്തിൽ ഇരു നേതാക്കൾ തമ്മിലുള്ള നല്ല ബന്ധം പ്രയോജനപ്പെടുത്താനാണ് അറബ് ഉദ്യോഗസ്ഥർ ശ്രമിക്കുന്നത്.
