അബുദാബി: കൃത്രിമബുദ്ധി മേഖലയിലെ സഹകരണം കൂടുതൽ ശക്തമാക്കുമെന്ന് പ്രതീക്ഷിക്കുന്ന യുണൈറ്റഡ് അറബ് എമിറേറ്റ്‌സിലേക്കുള്ള സന്ദർശന വേളയിൽ പ്രസിഡന്റ് ഡൊണാൾഡ് ട്രംപ്, യു എ ഇയുമായുള്ള യുഎസ് ബന്ധം ശക്തിപ്പെടുത്തുമെന്ന് പ്രതിജ്ഞയെടുത്തു.
സമ്പന്ന ഗൾഫ് രാഷ്ട്രങ്ങൾ സന്ദർശിച്ചതിന്റെ അവസാന ഘട്ടമെന്ന നിലയിൽ, ഖത്തർ സന്ദർശന വേളയിൽ യുഎസ് സൈനിക കേന്ദ്രത്തിൽ 10 ബില്യൺ ഡോളർ നിക്ഷേപിക്കാനുള്ള ദോഹയുടെ പദ്ധതികളെ പ്രശംസിച്ചതിനു ശേഷമാണ് ട്രംപ് യുഎഇ സന്ദർശനം ആരംഭിച്ചത്.
“ബന്ധം കൂടുതൽ വലുതും മികച്ചതുമായി മാറുമെന്നതിൽ എനിക്ക് യാതൊരു സംശയവുമില്ല,” യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായുള്ള കൂടിക്കാഴ്ചയിൽ ട്രംപ് പറഞ്ഞു.
“നിങ്ങളുടെ അത്ഭുതകരമായ സഹോദരൻ ഏതാനും ആഴ്ചകൾക്ക് മുമ്പ് വാഷിംഗ്ടണിൽ വന്നു, 1.4 ട്രില്യൺ ഡോളറിനെക്കുറിച്ചുള്ള നിങ്ങളുടെ ഉദാരമായ പ്രസ്താവനയെക്കുറിച്ച് അദ്ദേഹം ഞങ്ങളോട് പറഞ്ഞു,” 10 വർഷത്തിനുള്ളിൽ യുഎസിൽ 1.4 ട്രില്യൺ ഡോളർ നിക്ഷേപിക്കാനുള്ള യുഎഇ പ്രതിജ്ഞയെ പരാമർശിച്ചുകൊണ്ട് ട്രംപ് പറഞ്ഞു.
ഷെയ്ഖ് മുഹമ്മദിന്റെ സഹോദരനും യുഎഇയുടെ ദേശീയ സുരക്ഷാ ഉപദേഷ്ടാവും അബുദാബിയിലെ രണ്ട് സോവറിൻ വെൽത്ത് ഫണ്ടുകളുടെ ചെയർമാനുമായ ഷെയ്ഖ് തഹ്നൂൺ ബിൻ സായിദ് അൽ നഹ്യാനെക്കുറിച്ചാണ് ട്രംപ് പരാമർശിച്ചത്. “എനിക്ക് പറയാനുള്ളത് വളരെ നന്ദി എന്നാണ്” എന്ന് ട്രംപ് കൂട്ടിച്ചേർത്തു.
അതിന് അർഹത നേടാൻ ഞങ്ങൾ വളരെയധികം പരിശ്രമിക്കുമെന്നും, ഇരു രാജ്യങ്ങളുടെയും ജനങ്ങളുടെയും പ്രയോജനത്തിനായി ഈ സൗഹൃദം തുടരാനും ശക്തിപ്പെടുത്താനും യുഎഇ ആഗ്രഹിക്കുന്നു എന്നും ഷെയ്ഖ് മുഹമ്മദ് ട്രംപിനോട് പറഞ്ഞു.
യുഎഇയിലേക്ക് പോകുന്നതിനുമുമ്പ്, ദോഹയുടെ തെക്കുപടിഞ്ഞാറുള്ള അൽ ഉദൈദ് വ്യോമതാവളത്തിൽ അമേരിക്കന്‍ സൈനികരോട് നടത്തിയ പ്രസംഗത്തിൽ, ഖത്തർ ബുധനാഴ്ച ഒപ്പുവച്ച പ്രതിരോധ വാങ്ങലുകൾ 42 ബില്യൺ ഡോളറിന്റേതാണെന്ന് ട്രംപ് പറഞ്ഞു.
അബുദാബിയിലെ വിമാനത്താവളത്തിൽ വെച്ച് ഷെയ്ഖ് മുഹമ്മദ് അദ്ദേഹത്തെ സ്വീകരിച്ചു, ഉച്ചകഴിഞ്ഞ് മനോഹരമായി അലങ്കരിച്ച ഷെയ്ഖ് സായിദ് ഗ്രാൻഡ് മോസ്കും അതിലെ വെളുത്ത മിനാരങ്ങളും താഴികക്കുടങ്ങളും ഇരു നേതാക്കളും സന്ദർശിച്ചു.
“ഇത് വളരെ മനോഹരമായിരിക്കുന്നല്ലോ,” ട്രംപ് പള്ളിക്കുള്ളിൽ മാധ്യമ പ്രവർത്തകരോട് പറഞ്ഞു. അത് അടച്ചിട്ടിരിക്കുകയായിരുന്നു എന്ന് അദ്ദേഹം പറഞ്ഞു. “ആദ്യമായിട്ടാണ് അവർ അത് അടച്ചത്. ഇത് അമേരിക്കയോടുള്ള ബഹുമാനാർത്ഥമാണ്. എന്നെ ബഹുമാനിക്കുന്നതിനേക്കാൾ നല്ലത് നമുക്കത് രാജ്യത്തിന് നൽകാം. അതൊരു വലിയ ആദരമാണ്,” അദ്ദേഹം പറഞ്ഞു.
തങ്ങളുടെ സമ്പന്ന ഗൾഫ് രാഷ്ട്രത്തെ കൃത്രിമബുദ്ധിയിൽ ആഗോള നേതാവാക്കാൻ യുഎഇ നേതാക്കൾ യുഎസ് സഹായം ആഗ്രഹിക്കുന്നു. ഈ വർഷം മുതൽ പ്രതിവർഷം 500,000 എൻവിഡിയയുടെ ഏറ്റവും നൂതനമായ AI ചിപ്പുകൾ ഇറക്കുമതി ചെയ്യാൻ അനുവദിക്കുന്നതിന് യുഎഇയുമായി യുഎസ് പ്രാഥമിക കരാറിലേർപ്പെട്ടിട്ടുണ്ടെന്ന് റിപ്പോര്‍ട്ടുകള്‍ സൂചിപ്പിക്കുന്നു.
കൃത്രിമബുദ്ധി മോഡലുകൾ വികസിപ്പിക്കുന്നതിന് നിർണായകമായ യുഎഇയുടെ ഡാറ്റാ സെന്ററുകളുടെ നിർമ്മാണത്തിന് ഈ കരാർ ഉത്തേജനം നൽകും. എന്നാൽ, കരാർ യുഎസ് ഗവൺമെന്റിന്റെ മേഖലകളിൽ ദേശീയ സുരക്ഷാ ആശങ്കകൾ സൃഷ്ടിച്ചിട്ടുണ്ടെന്നും നിബന്ധനകൾ മാറിയേക്കാമെന്നും വൃത്തങ്ങൾ പറഞ്ഞു.
പ്രസിഡന്റ് കൊട്ടാരത്തിൽ ട്രംപും, ഷെയ്ഖ് മുഹമ്മദും, എൻവിഡിയ സിഇഒ ജെൻസൻ ഹുവാങ്ങുമായും ചര്‍ച്ച നടത്തിയത് മാധ്യമങ്ങള്‍ റിപ്പോര്‍ട്ട് ചെയ്തു.
