100 മില്യൺ ഡോളർ വിലമതിക്കുന്ന ഹാർവാർഡ് സർവകലാശാലയുമായുള്ള എല്ലാ ഫെഡറൽ കരാറുകളും റദ്ദാക്കാൻ യുഎസ് പ്രസിഡന്റ് ഡൊണാൾഡ് ട്രംപ് പദ്ധതിയിടുന്നു. അന്താരാഷ്ട്ര വിദ്യാർത്ഥികളുടെ വിവരങ്ങൾ പങ്കുവെക്കാത്തതും ട്രംപ് ഭരണകൂടത്തിന്റെ എതിർപ്പും മൂലമാണ് ഈ തീരുമാനം. ഹാര്‍‌വാര്‍ഡില്‍ വംശീയ വിവേചനവും ലിബറൽ അജണ്ടയും ഉണ്ടെന്ന് ട്രംപ് ആരോപിച്ചു. ഇതിന് മറുപടിയായി, അക്കാദമിക് സ്വാതന്ത്ര്യത്തിനു നേരെയുള്ള ആക്രമണം ജനാധിപത്യത്തിന് ഭീഷണിയാണെന്ന് പറഞ്ഞുകൊണ്ട് ഹാർവാർഡ് നിയമനടപടി ആരംഭിച്ചു.
വാഷിംഗ്ടണ്‍: അമേരിക്കൻ രാഷ്ട്രീയത്തിലും വിദ്യാഭ്യാസത്തിലും ഒരു പ്രധാന വഴിത്തിരിവായി, പ്രസിഡന്റ് ഡൊണാൾഡ് ട്രംപ് ഹാർവാർഡ് സർവകലാശാലയുമായുള്ള ശേഷിക്കുന്ന എല്ലാ ഫെഡറൽ കരാറുകളും റദ്ദാക്കാൻ തീരുമാനിച്ചതായി റിപ്പോര്‍ട്ട്. ട്രംപ് ഭരണകൂടവും ഹാർവാർഡ് സർവകലാശാലയും തമ്മിലുള്ള സംഘർഷം നിലനിൽക്കുന്നതിനാലാണ് ഈ നടപടി സ്വീകരിക്കുന്നതെന്ന് മാധ്യമ റിപ്പോർട്ടുകൾ പറയുന്നു. ഈ കരാറുകളുടെ ആകെ കണക്കാക്കുന്ന തുക 100 മില്യൺ ഡോളറാണെന്ന് പറയപ്പെടുന്നു, ഇത് ശാസ്ത്ര ഗവേഷണം, വിദ്യാഭ്യാസ പരിപാടികൾ, മറ്റ് സേവനങ്ങൾ എന്നിവയുമായി ബന്ധപ്പെട്ടതാണ്.
ഹാർവാർഡ് സർവകലാശാലയുമായുള്ള എല്ലാ ബിസിനസ്, അക്കാദമിക് കരാറുകളും അവസാനിപ്പിക്കുന്നതായി ചൊവ്വാഴ്ച ഫെഡറൽ ഏജൻസികൾക്ക് അയച്ച സർക്കാർ കത്തിൽ സൂചിപ്പിച്ചു. ഏതൊക്കെ സേവനങ്ങളാണ് നിർത്തലാക്കാൻ കഴിയുക, ഏതൊക്കെ സേവനങ്ങളാണ് മറ്റ് വെണ്ടർമാർക്ക് കൈമാറേണ്ടത് എന്നതിനെക്കുറിച്ച് ജൂൺ 6-നകം ബന്ധപ്പെട്ട ഏജൻസികൾ റിപ്പോർട്ട് ചെയ്യണമെന്ന് കത്തിൽ പ്രത്യേകം പറഞ്ഞിട്ടുണ്ട്. “ഭാവിയിലെ ഒരു സാധ്യതയുള്ള സേവന ദാതാവായി നിങ്ങൾ ഹാർവാർഡിനെ പരിഗണിക്കുന്നുണ്ടെങ്കില്‍, മറിച്ച് ചിന്തിച്ച് മറ്റ് ഓപ്ഷനുകൾ പരിഗണിക്കൂ,” കത്തിൽ പറയുന്നു.
അന്താരാഷ്ട്ര വിദ്യാർത്ഥികളുമായി ബന്ധപ്പെട്ട വിവരങ്ങൾ ട്രംപ് ഭരണകൂടവുമായി പങ്കിടാൻ ഹാർവാർഡ് സർവകലാശാല വിസമ്മതിച്ചതോടെയാണ് ഈ പിരിമുറുക്കം ആരംഭിച്ചത്. വിദേശ വിദ്യാർത്ഥികൾക്കുള്ള വിസ നിയമങ്ങൾ കർശനമാക്കിയ ട്രംപ് സർക്കാരിന്റെ തീരുമാനത്തിന് എതിരായിരുന്നു ഇത്. തുടർന്ന് ഭരണകൂടം ഹാർവാർഡിനുള്ള 3.2 മില്യൺ ഡോളർ ധനസഹായം നിർത്തലാക്കുകയും അന്താരാഷ്ട്ര വിദ്യാർത്ഥികളുടെ പുതിയ പ്രവേശനം പരിമിതപ്പെടുത്താൻ ശ്രമിക്കുകയും ചെയ്തു.
പ്രസിഡന്റ് ട്രംപ് ഹാർവാർഡിനെതിരെ നിരവധി ഗുരുതരമായ ആരോപണങ്ങൾ ഉന്നയിച്ചിട്ടുണ്ട്. സർവകലാശാലയിൽ സെമിറ്റിക് വിരുദ്ധ പ്രവർത്തനങ്ങൾ പ്രോത്സാഹിപ്പിക്കപ്പെടുന്നുണ്ടെന്നും, സ്ഥാപനം ലിബറൽ അജണ്ടയെ പിന്തുണയ്ക്കുന്നുവെന്നും അദ്ദേഹം പറയുന്നു. വിദ്യാർത്ഥി പ്രവേശനത്തിൽ ഹാർവാർഡ് വംശീയ വിവേചനം കാണിക്കുന്നുണ്ടെന്നും ട്രംപ് ആരോപിച്ചു. സർവകലാശാലകളിൽ ചിന്താ സ്വാതന്ത്ര്യം അടിച്ചമർത്തപ്പെടുകയും തീവ്ര പ്രത്യയശാസ്ത്രം പ്രോത്സാഹിപ്പിക്കപ്പെടുകയും ചെയ്യുന്നുവെന്ന് അദ്ദേഹം അവകാശപ്പെടുന്നു. ഇക്കാരണങ്ങളാലാണ് ട്രംപ് ഭരണകൂടം ഹാർവാർഡുമായുള്ള ബന്ധം പരിമിതപ്പെടുത്താൻ തീരുമാനിച്ചത്.
ട്രംപ് ഭരണകൂടം ധനസഹായം നിർത്തലാക്കാനും കരാറുകൾ റദ്ദാക്കാനുമുള്ള പദ്ധതികൾ വെളിപ്പെടുത്തിയതിനെത്തുടർന്ന് ഹാർവാർഡ് സർവകലാശാലയും കടുത്ത നിലപാട് സ്വീകരിച്ചു. ഈ വിഷയത്തിൽ യൂണിവേഴ്സിറ്റി നിയമപരമായ മാർഗം സ്വീകരിച്ചു, ട്രംപ് ഭരണകൂടത്തിനെതിരെ കേസ് ഫയൽ ചെയ്യുകയും അവരുടെ സാമ്പത്തിക സഹായം പുനഃസ്ഥാപിക്കണമെന്ന് ആവശ്യപ്പെടുകയും ചെയ്തു.
സർവകലാശാലയുടെ സ്വയംഭരണവും അക്കാദമിക് സ്വാതന്ത്ര്യവും സംരക്ഷിക്കുന്നതിന് ഈ നീക്കം ആവശ്യമാണെന്ന് ഹാർവാർഡ് പറയുന്നു. രാഷ്ട്രീയ കാരണങ്ങളാൽ വിദ്യാഭ്യാസ സമ്പ്രദായത്തെ ആക്രമിക്കുന്നത് ജനാധിപത്യത്തിന് നിരക്കാത്തതാണെന്നും, ഭീഷണിപ്പെടുത്തി കാര്യങ്ങള്‍ സാധിപ്പിച്ചെടുക്കാനുള്ള ട്രംപിന്റെ തന്ത്രമാണെന്നും ഹാര്‍‌വാര്‍ഡ് പറയുന്നു.
