ന്യൂഡൽഹി: 27 വർഷത്തിനുശേഷം അധികാരത്തിലെത്തിയ ബിജെപി ഡൽഹി തെരഞ്ഞെടുപ്പിൽ ആകെ 57.65 കോടി രൂപ ചെലവഴിച്ചപ്പോൾ ആം ആദ്മി പാർട്ടി 14.51 കോടി രൂപ ചെലവഴിച്ചു. കോൺഗ്രസ് ആകെ 46.19 കോടി രൂപ ചെലവഴിച്ചു. തിരഞ്ഞെടുപ്പ് കമ്മീഷന് സമർപ്പിച്ച ചെലവ് റിപ്പോർട്ടിൽ നിന്നാണ് ഈ വിവരങ്ങൾ പുറത്തുവന്നിരിക്കുന്നത്.
ബിജെപിയുടെ ചെലവ് റിപ്പോർട്ട് അനുസരിച്ച്, തിരഞ്ഞെടുപ്പ് പ്രക്രിയയിൽ പാർട്ടിയുടെ കേന്ദ്ര ആസ്ഥാനത്തിന് 87.79 കോടി രൂപ ലഭിച്ചു. ബിജെപി ചെലവഴിച്ച 57.65 കോടി രൂപയിൽ 39.15 കോടി രൂപ പാർട്ടി പ്രചാരണത്തിനും 18.51 കോടി രൂപ പാർട്ടി സ്ഥാനാർത്ഥികൾക്കുമായി ചെലവഴിച്ചു. അതേസമയം, പത്ത് വർഷത്തെ ഭരണത്തിന് ശേഷം അധികാരത്തിൽ നിന്ന് പുറത്തായ ആം ആദ്മി പാർട്ടിക്ക് തിരഞ്ഞെടുപ്പ് സമയത്ത് ആകെ 16.10 കോടി രൂപ ലഭിച്ചു.
ആം ആദ്മി പാർട്ടി ആകെ 14.51 കോടി രൂപ ചെലവഴിച്ചു, അതിൽ 12.12 കോടി രൂപ പാർട്ടി പ്രചാരണത്തിനും 2.39 കോടി രൂപ സ്ഥാനാർത്ഥികൾക്കുമായി ചെലവഴിച്ചു. മറുവശത്ത്, തുടർച്ചയായ രണ്ടാം തവണയും പൂജ്യത്തിൽ തുടരുന്ന കോൺഗ്രസ് ആകെ 46.19 കോടി രൂപ ചെലവഴിച്ചു, അതിൽ 40.13 കോടി രൂപ പ്രചാരണത്തിനായി പൊതു ചെലവായും 6.06 കോടി രൂപ പാർട്ടി സ്ഥാനാർത്ഥികൾക്കായി ചെലവഴിച്ചു.
2025 ലെ ഡൽഹി നിയമസഭാ തെരഞ്ഞെടുപ്പിൽ ബിജെപി 70 ൽ 48 സീറ്റുകൾ നേടി. അതേസമയം, ആം ആദ്മി പാർട്ടി 22 സീറ്റുകൾ നേടി. കോൺഗ്രസിന് ഒരു സീറ്റ് പോലും ലഭിച്ചില്ല.
