വാഷിംഗ്ടന്‍: എപ്സ്റ്റീൻ ഫയലുകളിൽ യുഎസ് പ്രസിഡന്റ് ഡൊണാൾഡ് ട്രംപിന്റെ പേര് ഉൾപ്പെടുത്തിയിട്ടുണ്ടെന്നും അതുകൊണ്ടാണ് അവ പരസ്യമാക്കാത്തതെന്നും ലോൺ മസ്ക് വ്യാഴാഴ്ച അവകാശപ്പെട്ടു. എന്നാല്‍, ഈ അവകാശവാദം അടങ്ങിയ പോസ്റ്റ് ഇപ്പോൾ മസ്ക് ഇല്ലാതാക്കി. “വലിയ വെളിപ്പെടുത്തലിനുള്ള സമയമായി: @realDonaldTrump എപ്സ്റ്റീൻ ഫയലുകളിൽ ഉണ്ട്. അവ പരസ്യമാക്കാത്തതിന്റെ യഥാർത്ഥ കാരണം ഇതാണ്. ശുഭദിനം, ഡിജെടി!” ഈ പോസ്റ്റാണ് മസ്ക് പോസ്റ്റ് ഇപ്പോൾ ഇല്ലാതാക്കിയത്.
ട്രംപിന്റെ ‘ബിഗ് ബ്യൂട്ടിഫുൾ’ ചെലവ് ബില്ലിനെ ടെസ്‌ല, സ്‌പേസ് എക്‌സ് സിഇഒ വിമർശിച്ചതോടെയാണ് മസ്‌കും ഡൊണാൾഡ് ട്രംപും തമ്മിലുള്ള തർക്കം ആരംഭിച്ചത്. ബില്ലിനെ “വെറുപ്പുളവാക്കുന്ന വളച്ചൊടിക്കൽ” എന്നാണ് മസ്ക് വിശേഷിപ്പിച്ചത്. മറുപടിയായി, തന്റെ ഏറ്റവും വലിയ പിന്തുണക്കാരനായ മസ്ക് 2024 നവംബറിലെ തിരഞ്ഞെടുപ്പിൽ ഏകദേശം 300 മില്യൺ ഡോളർ ചെലവഴിച്ചതിൽ തനിക്ക് “നിരാശ”യുണ്ടെന്ന് ട്രംപ് പറഞ്ഞു. തന്റെ സഹായമില്ലായിരുന്നെങ്കിൽ ട്രംപ് തിരഞ്ഞെടുപ്പിൽ തോൽക്കുമായിരുന്നുവെന്ന് മസ്ക് അവകാശപ്പെട്ടിരുന്നു.
മസ്‌കിന്റെ എല്ലാ ഫെഡറൽ കരാറുകളും റദ്ദാക്കുമെന്ന് ട്രംപ് ഭീഷണിപ്പെടുത്തിയതോടെ വിവാദം കൂടുതൽ രൂക്ഷമായി. ഇതിന് മറുപടിയായി, നാസ ഉപയോഗിക്കുന്ന ഫാൽക്കൺ റോക്കറ്റ് ഡീകമ്മീഷന്‍ ചെയ്യുമെന്ന് മസ്ക് ഭീഷണിപ്പെടുത്തി. എന്നാൽ, പിന്നീട് അദ്ദേഹം അത് പിൻവലിച്ചു. തന്റെ സോഷ്യൽ മീഡിയ പ്ലാറ്റ്‌ഫോമായ എക്‌സിൽ ഒരു പുതിയ രാഷ്ട്രീയ പാർട്ടിയുടെ സാധ്യതയെക്കുറിച്ച് മസ്ക് ചർച്ച ചെയ്യാൻ തുടങ്ങി, ഒരു വോട്ടെടുപ്പും നടത്തി. വെള്ളിയാഴ്ച, 80% ആളുകളും ഈ ആശയത്തെ പിന്തുണയ്ക്കുന്നുവെന്ന് അദ്ദേഹം റിപ്പോർട്ട് ചെയ്തു. പുതിയ പാർട്ടിയുടെ പേര് ‘ദി അമേരിക്ക പാർട്ടി’ എന്ന് വിളിക്കുമെന്ന് അദ്ദേഹം പിന്നീട് പ്രഖ്യാപിച്ചു.
വിവാദ ധനകാര്യ വിദഗ്ദ്ധനും ലൈംഗിക കുറ്റവാളിയുമായ ജെഫ്രി എപ്സ്റ്റീനുമായി ബന്ധപ്പെട്ട എപ്സ്റ്റീൻ ഫയലുകൾ, തിരഞ്ഞെടുപ്പ് പ്രചാരണ വേളയിൽ ട്രംപ് പരസ്യമാക്കുമെന്ന് വാഗ്ദാനം ചെയ്തിരുന്നു. മസ്‌കിന്റെ അവകാശവാദവും പോസ്റ്റ് നീക്കം ചെയ്തതും ഈ കേസിൽ പുതിയ വഴിത്തിരിവുണ്ടാക്കിയിരിക്കുകയാണിപ്പോള്‍.
