ലോസ് ഏഞ്ചലസ്: ട്രംപ് ഭരണകൂടത്തിന്റെ കുടിയേറ്റ റെയ്ഡിനെതിരെ നടന്ന അക്രമാസക്തമായ പ്രതിഷേധങ്ങളെത്തുടർന്ന് ചൊവ്വാഴ്ച രാത്രി മുതൽ ലോസ് ഏഞ്ചൽസ് ഡൗണ്ടൗൺ പ്രദേശത്ത് ഭാഗിക കർഫ്യൂ ഏർപ്പെടുത്തി. നിരവധി രാത്രികളായി തുടരുന്ന അക്രമം, കൊള്ള, തീവയ്പ്പ്, സ്വത്തുക്കളുടെ നാശനഷ്ടം എന്നിവയ്ക്കിടയിൽ സ്ഥിതിഗതികൾ നിയന്ത്രണാതീതമാകുന്നത് കണ്ടതിനെ തുടർന്നാണ് മേയർ കാരെൻ ബാസ് ഈ നടപടി സ്വീകരിച്ചത്. രാത്രി 8 മുതൽ രാവിലെ 6 വരെ കർഫ്യൂ പ്രാബല്യത്തിൽ ഉണ്ടാകുമെന്ന് മേയർ പ്രഖ്യാപിച്ചു, പ്രദേശവാസികളെയും തൊഴിലാളികളെയും ഇതിൽ നിന്ന് ഒഴിവാക്കിയിട്ടുണ്ട്.
ഗവർണർ ഗാവിൻ ന്യൂസോമിന്റെ അനുമതിയില്ലാതെ പ്രസിഡന്റ് ഡൊണാൾഡ് ട്രംപ് നാഷണൽ ഗാർഡിനെ വിന്യസിച്ചതോടെയാണ് പ്രതിഷേധം പൊട്ടിപ്പുറപ്പെട്ടത്. ഇതിന് മറുപടിയായി ഗവർണർ ന്യൂസോം ഇതിനെ “സംസ്ഥാന പരമാധികാരത്തിന്റെ ഗുരുതരമായ ലംഘനം” എന്ന് വിശേഷിപ്പിക്കുകയും “ട്രംപ് ഇടപെടുന്നതുവരെ ഒരു പ്രശ്നവുമില്ലായിരുന്നു. ഈ നടപടി സംഘർഷങ്ങൾ കൂടുതൽ രൂക്ഷമാക്കും” എന്ന് പറയുകയും ചെയ്തു.
ട്രംപിന്റെ ഇടപെടലിൽ അതൃപ്തി പ്രകടിപ്പിച്ച മേയർ കാരെൻ ബാസ് മാധ്യമങ്ങളോട് സംസാരിക്കവെ, റെയ്ഡുകൾ നിർത്തൂ, ഇതാണ് ഈ അസ്വസ്ഥതയ്ക്കുള്ള പരിഹാരം എന്ന് വ്യക്തമായി പറഞ്ഞു. ട്രംപ് 4,000 നാഷണൽ ഗാർഡിനെയും 700 മറൈൻ സൈനികരെയും അയച്ചതിനെ ചോദ്യം ചെയ്ത അദ്ദേഹം പറഞ്ഞു, “മറൈൻ സൈനികർ ഇവിടെ വന്ന് എന്തുചെയ്യുമെന്ന് ആളുകൾ എന്നോട് ചോദിക്കുന്നു. ഇതൊരു നല്ല ചോദ്യമാണ്, എനിക്കും അറിയില്ല.”
അക്രമത്തിനിടെ, മുഖംമൂടി ധരിച്ച നിരവധി കൊള്ളക്കാർ ഡൗണ്‍‌ടൗണിലെ ഒരു ആപ്പിൾ സ്റ്റോർ ഉൾപ്പെടെയുള്ള കടകൾ നശിപ്പിച്ചു. ജനാലകൾ തകർക്കുകയും ഉൽപ്പന്നങ്ങൾ മോഷ്ടിക്കുകയും ചെയ്തു. മൊത്തം എണ്ണം വ്യക്തമല്ലെങ്കിലും നിരവധി അക്രമികളെ പോലീസ് അറസ്റ്റ് ചെയ്തിട്ടുണ്ട്.
വാരാന്ത്യത്തിൽ 50 ലധികം അറസ്റ്റുകൾ ലോസ് ഏഞ്ചൽസ് പോലീസ് ഡിപ്പാർട്ട്‌മെന്റ് (എൽഎപിഡി) സ്ഥിരീകരിച്ചു. പോലീസിന് നേരെ കൊമേഴ്‌സ്യൽ ഗ്രേഡ് പടക്കങ്ങൾ എറിഞ്ഞ നിരവധി പേരും ഇതിൽ ഉൾപ്പെടുന്നു. ആപ്പിൾ സ്റ്റോർ മോഷണവുമായി ബന്ധപ്പെട്ട് ഒരു സ്ത്രീയെ സംഭവസ്ഥലത്ത് തന്നെ അറസ്റ്റ് ചെയ്തതായും മറ്റ് രണ്ട് പേരെ കസ്റ്റഡിയിലെടുത്തതായും ഓഫീസർ ക്രിസ് മില്ലർ പറഞ്ഞു.
നഗരത്തിലെ ചരിത്രപ്രസിദ്ധമായ കോർ ബിസിനസ് ഇംപ്രൂവ്‌മെന്റ് ഡിസ്ട്രിക്റ്റിൽ കർഫ്യൂ പ്രഖ്യാപിക്കുകയും സ്ഥിതിഗതികൾ നിയന്ത്രിക്കാൻ നാഷണൽ ഗാർഡിന്റെ സഹായം തേടുകയും ചെയ്തു. അതേസമയം, സമാധാനപരമായ പ്രതിഷേധത്തിന്റെ മറവിൽ നടക്കുന്ന അക്രമങ്ങളെയും ക്രിമിനൽ പ്രവർത്തനങ്ങളെയും നഗര ഉദ്യോഗസ്ഥർ അപലപിച്ചു.
വരാനിരിക്കുന്ന സൈനിക പരേഡിനെക്കുറിച്ച് പരാമർശിച്ച് പ്രസിഡന്റ് ട്രംപ് മുന്നറിയിപ്പ് നൽകിയതോടെ സ്ഥിതി കൂടുതൽ പിരിമുറുക്കത്തിലായി. “പ്രകടനം നടത്താൻ ആഗ്രഹിക്കുന്നവർക്ക് വളരെ ശക്തമായ സൈന്യത്തെ നേരിടേണ്ടിവരും” എന്ന് അദ്ദേഹം പറഞ്ഞു.
