ഗുരുവായൂർ: ചിങ്ങമാസത്തിലെ അവസാന ഞായറാഴ്ച ഗുരുവായൂർ ക്ഷേത്രത്തിൽ കല്യാണമേളം. ഒറ്റ ദിവസം 420 വിവാഹങ്ങൾ നടന്നതോടെ ക്ഷേത്രത്തിലെ പ്രതിദിന വിവാഹങ്ങളുടെ എണ്ണത്തിൽ പുതിയ റെക്കോർഡ് പിറന്നു. ഞായറാഴ്ചയ്ക്കായി ആകെ 443 വിവാഹങ്ങളാണ് മുൻകൂട്ടി ബുക്ക് ചെയ്തിരുന്നത്.
ഓഗസ്റ്റ് 23-ന് നടന്ന 416 വിവാഹങ്ങളായിരുന്നു ഇതുവരെയുള്ള റെക്കോർഡ്. 420 ദമ്പതികൾ വിവാഹിതരായതോടെ ആ റെക്കോർഡ് മറികടന്നു.
പുലർച്ചെ നാലുമണി മുതൽ വിവാഹച്ചടങ്ങുകൾ ആരംഭിച്ചു. വൻതിരക്ക് കണക്കിലെടുത്ത് വിവാഹങ്ങൾ തടസ്സമില്ലാതെ നടത്തുന്നതിനും ഭക്തർക്ക് സുഗമമായി ദർശനം നടത്തുന്നതിനുമായി ഗുരുവായൂർ ദേവസ്വം വിപുലമായ ക്രമീകരണങ്ങളാണ് ഒരുക്കിയത്. വിവാഹച്ചടങ്ങുകൾക്കായി ആറ് മണ്ഡപങ്ങൾ സജ്ജീകരിച്ചിരുന്നു.
തിരക്ക് നിയന്ത്രിക്കാനും സുരക്ഷ ഉറപ്പാക്കാനും കൂടുതൽ പോലീസുകാരെ വിന്യസിച്ചു. അടിയന്തര സാഹചര്യങ്ങൾ നേരിടുന്നതിനായി ഫയർഫോഴ്സ്, ആംബുലൻസ് സേവനങ്ങളും സജ്ജമാക്കി. ഓരോ വിവാഹസംഘത്തിലും പരമാവധി 25 പേർക്കാണ് പ്രവേശനം അനുവദിച്ചത്.
നൂറുകണക്കിന് വിവാഹങ്ങൾ ഒരേ ദിവസം നടന്നിട്ടും കാര്യമായ പരാതികളോ തടസ്സങ്ങളോ ഉണ്ടായില്ല. കൃത്യമായ ആസൂത്രണവും കാര്യക്ഷമമായ ക്രമീകരണങ്ങളുമാണ് വിവാഹച്ചടങ്ങുകൾ സുഗമമായി പൂർത്തിയാക്കാൻ സഹായിച്ചതെന്ന് ദേവസ്വം ചെയർമാൻ എ. വി. ഗോപിനാഥ് പറഞ്ഞു.
