കോഴിക്കോട്: പന്തീരാങ്കാവിൽ ഒരു കിലോഗ്രാം എംഡിഎംഎ പിടികൂടിയ കേസിലെ അന്വേഷണം കൂടുതൽ നിർണായക വഴിത്തിരിവിലേക്ക്. മയക്കുമരുന്ന് കടത്ത് ശൃംഖലയിലെ പ്രധാന കണ്ണികളെന്ന് പോലീസ് സംശയിക്കുന്ന രണ്ട് പേരെ കൂടി അന്വേഷണ സംഘം അറസ്റ്റ് ചെയ്തു.
മലപ്പുറം നിലമ്പൂർ സ്വദേശി സി. അജ്മൽ (32), തിരുവനന്തപുരം മലയിൻകീഴ് സ്വദേശിയും നഴ്സിംഗ് വിദ്യാർത്ഥിയുമായ പി. സൂര്യ (23) എന്നിവരാണ് പിടിയിലായത്. ഡൽഹിക്കു സമീപമുള്ള നോയിഡയിലെ ഫ്ലാറ്റിൽ നിന്നാണ് ഇരുവരെയും അന്വേഷണ സംഘം കസ്റ്റഡിയിലെടുത്തത്.
കേസുമായി ബന്ധപ്പെട്ട സാമ്പത്തിക ഇടപാടുകൾ പരിശോധിച്ചപ്പോൾ, കഴിഞ്ഞ നാല് മാസത്തിനിടെ ഏകദേശം അഞ്ച് കോടി രൂപയുടെ ഇടപാടുകൾ നടന്നതായാണ് അന്വേഷണ സംഘത്തിന് ലഭിച്ച വിവരം. നോയിഡയിലെ ആഡംബര അപ്പാർട്ട്മെന്റ് കേന്ദ്രീകരിച്ചായിരുന്നു ഇവരുടെ താമസവും പ്രവർത്തനങ്ങളുമെന്നാണ് പോലീസ് പറയുന്നത്.
പന്തീരാങ്കാവിൽ വൻതോതിൽ എംഡിഎംഎ പിടികൂടിയതിന് പിന്നാലെ നടത്തിയ വിശദമായ അന്വേഷണമാണ് ഇരുവരിലേക്കും എത്തിയത്. ലഹരിമരുന്ന് വിതരണ ശൃംഖലയിൽ ഇവർക്കുള്ള പങ്ക്, സാമ്പത്തിക ഇടപാടുകളുടെ ഉറവിടം, സംഘത്തിലെ മറ്റ് അംഗങ്ങൾ എന്നിവ കണ്ടെത്താൻ പോലീസ് അന്വേഷണം വ്യാപിപ്പിച്ചിട്ടുണ്ട്.
കേസിൽ കൂടുതൽ അറസ്റ്റുകൾ ഉണ്ടാകാനുള്ള സാധ്യതയും അന്വേഷണ സംഘം തള്ളിക്കളയുന്നില്ല.
മെയ് 9-ന് പന്തീരാങ്കാവിലെ കാപ്കോൺ സിറ്റിക്ക് സമീപത്തെ സർവീസ് റോഡിൽ പാർക്ക് ചെയ്തിരുന്ന കാറിൽ നിന്ന് ഒരു കിലോഗ്രാം എംഡിഎംഎ പോലീസ് പിടികൂടിയിരുന്നു. കേസുമായി ബന്ധപ്പെട്ട് മലപ്പുറം സ്വദേശികളായ മുഹമ്മദ് അർഷലാൽ (25), ആദിൽഷ (20), മുഹമ്മദ് ഫർഹാൻ (22) എന്നിവരെ നേരത്തെ അറസ്റ്റ് ചെയ്തിരുന്നു.
അറസ്റ്റിലായവരെ വിശദമായി ചോദ്യം ചെയ്തതോടെയാണ് ഡൽഹിയിൽ നിന്ന് കേരളത്തിലേക്ക് മയക്കുമരുന്ന് എത്തിച്ചിരുന്ന ശൃംഖലയെക്കുറിച്ചും അജ്മലിനും സൂര്യയ്ക്കും ഇതിലുള്ള പങ്കിനെക്കുറിച്ചും നിർണായക വിവരങ്ങൾ പോലീസിന് ലഭിച്ചത്.
ഇതിന്റെ അടിസ്ഥാനത്തിൽ ഡൽഹി കേന്ദ്രീകരിച്ച് അന്വേഷണം വ്യാപിപ്പിച്ച പോലീസ്, സൂര്യയുടെ പേരിൽ രജിസ്റ്റർ ചെയ്ത നോയിഡയിലെ ആഡംബര ഫ്ലാറ്റിൽ നിന്ന് ഇരുവരെയും കസ്റ്റഡിയിലെടുത്തു. ഫ്ലാറ്റിൽ നടത്തിയ പരിശോധനയിൽ മയക്കുമരുന്ന് തൂക്കാൻ ഉപയോഗിച്ചിരുന്ന ഡിജിറ്റൽ സ്കെയിൽ, പാക്കിംഗ് സീലർ, അയ്യായിരത്തിലധികം സിപ്പ്-ലോക്ക് ബാഗുകൾ, കറൻസി എണ്ണൽ യന്ത്രം, നിരവധി എടിഎം കാർഡുകൾ എന്നിവയും പോലീസ് പിടിച്ചെടുത്തു.
കേരളം ഉൾപ്പെടെ വിവിധ സംസ്ഥാനങ്ങളിലേക്ക് ആഴ്ചതോറും പത്ത് കിലോഗ്രാമിലധികം എംഡിഎംഎ എത്തിച്ചിരുന്നതായി ചോദ്യം ചെയ്യലിൽ അവര് സമ്മതിച്ചതായി പോലീസ് അറിയിച്ചു. ഡൽഹിയിൽ നിന്ന് വാങ്ങിയ സെക്കൻഡ് ഹാൻഡ് കാറുകൾ കേരളത്തിലേക്ക് കൊണ്ടുവരുന്നതിന്റെ മറവിലായിരുന്നു മയക്കുമരുന്ന് കടത്തിയിരുന്നതെന്നും അന്വേഷണത്തിൽ കണ്ടെത്തി.
കഴിഞ്ഞ നാല് മാസത്തിനിടെ അഞ്ച് കോടിയിലധികം രൂപയുടെ മയക്കുമരുന്ന് ഇടപാടുകൾ സംഘം നടത്തിയതായും അന്വേഷണത്തിൽ വ്യക്തമായി. അറസ്റ്റിലായ ഇവരെ പിന്നീട് കോടതിയിൽ ഹാജരാക്കി പോലീസ് കസ്റ്റഡിയിൽ വിട്ടു.
