കാനഡയിൽ സംഘടിത കുറ്റകൃത്യ സംഘങ്ങളുടെ ഭീഷണി വീണ്ടും ചർച്ചയാകുന്നു. ലോറൻസ് ബിഷ്ണോയി ഗാങ് കനേഡിയൻ അധികൃതർക്ക് അയച്ചതായി റിപ്പോർട്ട് ചെയ്യപ്പെട്ട കത്തിൽ “We will rule in CANADA now” എന്ന് ഭീഷണിപ്പെടുത്തിയതായി CBC News റിപ്പോർട്ട് ചെയ്തു. കാനഡയിൽ 5,000 അംഗങ്ങളും പൊലീസിനേക്കാൾ കൂടുതൽ തോക്കുകളും ഉണ്ടെന്ന അവകാശവാദവും കത്തിൽ സംഘം ഉന്നയിച്ചിട്ടുണ്ട്.
അബോട്ട്സ്ഫോർഡ് പൊലീസിനും അയച്ച കത്ത്, Immigration and Refugee Board (IRB) നടപടികളുമായി ബന്ധപ്പെട്ട രേഖകളിലൂടെയാണ് പുറത്തുവന്നത്.
അതേസമയം, കാനഡയിലെ കുറ്റകൃത്യങ്ങളുടെ ചിത്രം എല്ലാ മേഖലകളിലും ഒരുപോലെയല്ല. 2025-ൽ വാഹനമോഷണം 16%യും വീടുകയറ്റ മോഷണം 11% യും കുറഞ്ഞപ്പോൾ, 5,000 ഡോളറിൽ താഴെയുള്ള shoplifting 11% വർധിച്ചു.
സംഘടിത കുറ്റകൃത്യങ്ങൾ, അതിർത്തി കടന്നുള്ള വാഹനമോഷണം, പണം തട്ടൽ തുടങ്ങിയ വെല്ലുവിളികൾ കണക്കിലെടുത്ത് കാനഡയിലെ നിയമപാലനവും അതിർത്തി സുരക്ഷയും കൂടുതൽ ശക്തിപ്പെടുത്തേണ്ടതിന്റെ ആവശ്യകതയാണ് ഈ സംഭവങ്ങൾ വീണ്ടും ഉയർത്തിക്കാട്ടുന്നത്.
സുരക്ഷിതവും സമാധാനാന്തരീക്ഷം നിറഞ്ഞതുമായ ജീവിതം തേടി ലോകത്തിന്റെ വിവിധ ഭാഗങ്ങളിൽ നിന്ന് ലക്ഷക്കണക്കിന് ആളുകൾ ചേക്കേറിയ രാജ്യമാണ് കാനഡ. എന്നാൽ, സമീപകാലത്തായി ഇവിടുത്തെ കുടിയേറ്റ-അഭയാർത്ഥി സംവിധാനങ്ങളിലുള്ള ഗുരുതരമായ പാകപിഴവുകളും, അതിന്റെ തുടർച്ചയെന്നോണം അരങ്ങേറുന്ന ക്രമസമാധാന തകർച്ചയും രാജ്യത്ത് വലിയ സുരക്ഷാ വെല്ലുവിളികളാണ് സൃഷ്ടിച്ചുകൊണ്ടിരിക്കുന്നത്. നിയമപരമായ അർഹതയും യഥാർത്ഥത്തിൽ പീഡനങ്ങൾക്കിരയാകുന്നവരും അഭയാർത്ഥി പദവി അർഹിക്കുമ്പോൾ, കൃത്യമായ ബാക്ക്ഗ്രൗണ്ട് പരിശോധനകളോ കർശന മാനദണ്ഡങ്ങളോ പാലിക്കപ്പെടാതെ പലരും ഈ പഴുതുകൾ ദുരുപയോഗം ചെയ്ത് രാജ്യത്തേക്ക് കടന്നുവരുന്നു എന്ന ആക്ഷേപം ശക്തമാണ്.
അഭയാർത്ഥി സ്വീകരണം എന്നത് മാനുഷിക പരിഗണന നൽകേണ്ട ഒന്നാണെന്നതിൽ തർക്കമില്ല. എന്നാൽ, അർഹതപ്പെട്ടവർക്ക് മാത്രം ലഭിക്കേണ്ട ഈ സംവിധാനം സ്വാധീനമുള്ളവരും പശ്ചാത്തല പരിശോധനകളിൽ നിന്ന് രക്ഷപ്പെടുന്നവരും കൈക്കലാക്കുമ്പോൾ, അത് യഥാർത്ഥ അർഹതപ്പെട്ടവരെ അവഗണിക്കുന്നതിന് തുല്യമാണ്. ലോകത്തിന്റെ വിവിധ കോണുകളിൽ—പ്രത്യേകിച്ച് അഫ്ഗാനിസ്ഥാൻ പോലുള്ള സംഘർഷ ബാധിത മേഖലകളിൽ—ജീവഭയന്ന് പലായനം ചെയ്യുന്ന യഥാർത്ഥ ഇരകൾ അർഹമായ സുരക്ഷ ലഭിക്കാതെ ബുദ്ധിമുട്ടുമ്പോൾ, മറ്റൊരുവശത്ത് നിയമത്തിന്റെ പഴുതുകൾ ചൂഷണം ചെയ്യുന്നവർ കാനഡയിൽ സ്വാധീനം ഉറപ്പിക്കുന്നു.
ഈ സുരക്ഷാ വീഴ്ചകളുടെ ഏറ്റവും വലിയ ഉദാഹരണമാണ് അടുത്തിടെ പുറത്തുവന്ന ഞെട്ടിക്കുന്ന വിവരങ്ങൾ. കാനഡയിലെ ബിസിനസുകാരിൽ നിന്നും പ്രവാസികളിൽ നിന്നും വ്യാപകമായി പണം തട്ടുന്ന കുപ്രസിദ്ധ ഗുണ്ടാസംഘമായ ലോറൻസ് ബിഷ്ണോയി ഗാങ്, ബ്രിട്ടീഷ് കൊളംബിയയിലെ അബോട്ട്സ്ഫോർഡ് പൊലീസ് വകുപ്പിന് അയച്ച ഭീഷണി കത്ത് മുഖ്യധാരാ മാധ്യമമായ സിബിസി ന്യൂസ് (CBC News) പുറത്തുവിട്ടിട്ടുണ്ട്. കാനഡയിലെ ഇമിഗ്രേഷൻ ആൻഡ് റീഫ്യൂജി ബോർഡിന്റെ (IRB) നടപടിക്രമങ്ങളുമായി ബന്ധപ്പെട്ട രേഖകളിലൂടെയാണ് പൊലീസ് ഈ ഭീഷണികൾ ഔദ്യോഗികമായി സ്ഥിരീകരിച്ചത്. “കാനഡയിൽ ഇനി ഞങ്ങൾ ഭരിക്കും” എന്ന് പ്രഖ്യാപിച്ചുകൊണ്ട് ഭരണസംവിധാനങ്ങളെയും പൊലീസിനെയും വെല്ലുവിളിക്കുന്ന ഈ സംഘം, രാജ്യത്തെ ബിസിനസ് സ്ഥാപനങ്ങൾ ഇനി മുതൽ നിർബന്ധമായും ‘പ്രൊട്ടക്ഷൻ ടാക്സ്’ നൽകണമെന്ന് കത്തിൽ ആവശ്യപ്പെടുന്നു.
കൂടാതെ, കാനഡയിൽ വ്യാപകമായിക്കൊണ്ടിരിക്കുന്ന മറ്റ് കുറ്റകൃത്യങ്ങളും രാജ്യത്തിന്റെ പ്രതിച്ഛായയെ സാരമായി ബാധിക്കുന്നുണ്ട്. അനേകം കാറുകൾ കൂട്ടത്തോടെ തട്ടിക്കൊണ്ടുപോകുന്നതും, പുതിയ വാഹനങ്ങൾ അടിച്ചുമാറ്റുന്നതുമായ സംഭവങ്ങൾ ഇന്ന് നിത്യസംഭവമായി മാറിയിരിക്കുന്നു. ഇതുപോലെ തന്നെ വീടുകൾ തല്ലിത്തകർക്കുന്നതും, ആളുകളുടെ വീടുകൾ കൊള്ളയടിക്കുന്നതും വർധിച്ചുവരികയാണ്. കാനഡയിലുടനീളം കളവും മോഷണവും ഉയർന്നത് ജനങ്ങളെ വലിയ ആശങ്കയിലാഴ്ത്തിയിട്ടുണ്ട്.
ഈ കുറ്റകൃത്യങ്ങളുടെ വർധനവ് കാനഡയ്ക്ക് ഉള്ളിൽ മാത്രം ഒതുങ്ങുന്നില്ല; അത് അയൽരാജ്യമായ അമേരിക്കയ്ക്കും വലിയൊരു സുരക്ഷാ വെല്ലുവിളിയായി മാറിക്കൊണ്ടിരിക്കുകയാണ്. കൃത്യമായ പശ്ചാത്തല പരിശോധനകളില്ലാതെ അഭയാർത്ഥികളെയും മറ്റും രാജ്യത്തേക്ക് കയറ്റിവിടുന്നത് ക്രിമിനൽ സംഘങ്ങൾക്കും കുറ്റവാളികൾക്കും സുരക്ഷിത താവളമാകുന്നു. ഈ സാഹചര്യങ്ങൾ കാരണം, കാനഡയിൽ നിന്ന് അമേരിക്കയിലേക്ക് കടക്കുമ്പോൾ പരിശോധനകളും സുരക്ഷാ നടപടികളും വൻതോതിൽ കർശനമാക്കിയിരിക്കുകയാണ്. ഇരു രാജ്യങ്ങൾക്കുമിടയിലെ അതിർത്തികളിൽ പരിശോധനകൾ കടുപ്പിക്കാൻ ഇത് കാരണമായത് യാത്രാസൗകര്യങ്ങളെയും സാധാരണക്കാരെയും കാര്യമായി ബാധിക്കുന്നുണ്ട്.
ഈ സാഹചര്യങ്ങൾ കാനഡയെക്കുറിച്ച് പുറംലോകത്തുള്ള ധാരണകളെയും സാരമായി ബാധിക്കുകയാണ്. കാനഡയിലേക്ക് കുടിയേറാൻ ആഗ്രഹിക്കുന്ന യഥാർത്ഥ പ്രതിഭകളും പ്രൊഫഷണലുകളും നിലവിലെ ക്രമസമാധാന തകർച്ചയും വർധിച്ചുവരുന്ന ഗുണ്ടാ ഭീഷണികളും കണ്ട് ഇവിടേക്ക് വരാൻ മടിക്കുന്ന അവസ്ഥയാണ് ഇന്നുള്ളത്. കാനഡയുടെ സാമ്പത്തിക വളർച്ചയ്ക്കും സാംസ്കാരിക വൈവിധ്യത്തിനും മുതൽക്കൂട്ടാകേണ്ട യഥാർത്ഥ പ്രതിഭകൾ പിന്മാറുന്നതും, സുരക്ഷാ പ്രശ്നങ്ങൾ വർധിക്കുന്നതും രാജ്യത്തിന്റെ പ്രതിച്ഛായയെ ബാധിക്കുന്നുണ്ട്.
