ഗുരുഗ്രാം: വനിതാ ബൈക്ക് യാത്രികയെ കാറിടിച്ച സംഭവത്തിൽ അന്വേഷണം നടത്തുന്ന പ്രത്യേക അന്വേഷണ സംഘം (എസ്ഐടി) നിർണായക വിവരങ്ങൾ കണ്ടെത്തി. പൊലീസ് കസ്റ്റഡി കാലാവധി പൂർത്തിയായതിനെ തുടർന്ന് കേസിലെ പ്രധാന പ്രതികളെ കോടതിയിൽ ഹാജരാക്കി. കോടതി ഇവരെ ജുഡീഷ്യൽ കസ്റ്റഡിയിൽ ജയിലിലേക്ക് അയച്ചു.
അറസ്റ്റിലായ പ്രധാന പ്രതികളായ കല്യാൺ ബൈൻസ്ലയും ലവ്നിഷും ചോദ്യം ചെയ്യലിനിടെ പൊലീസിനെ പലതവണ തെറ്റിദ്ധരിപ്പിച്ചതായി എസ്ഐടി കോടതിയെ അറിയിച്ചു. പ്രാഥമിക ചോദ്യം ചെയ്യലിൽ മറ്റു കൂട്ടാളികൾ എവിടെയാണെന്ന വിവരം മറച്ചുവച്ച പ്രതികൾ അന്വേഷണ സംഘത്തിന് തെറ്റായ വിവരങ്ങൾ നൽകിയതായാണ് പൊലീസ് പറയുന്നത്. വിശദമായ ചോദ്യം ചെയ്യലിനൊടുവിലാണ് കൂട്ടാളികളുടെ ശരിയായ വിലാസങ്ങൾ ഇവർ വെളിപ്പെടുത്തിയത്.
ഇതിന്റെ അടിസ്ഥാനത്തിലാണ് ഫരീദാബാദ് സെക്ടർ 37 സ്വദേശിയായ ശ്രീനാഥ് വിശ്വകർമയിലേക്കും പൽവൽ സ്വദേശിയായ അനൂപ് കുമാർ അവസ്തിയിലേക്കും പൊലീസ് എത്തിയത്.
എസ്ഐടി മേധാവി എസിപി (CAW) സുശീല ദേവിയുടെ നേതൃത്വത്തിൽ ശ്രീനാഥ് വിശ്വകർമയെയും അനൂപ് കുമാർ അവസ്തിയെയും വിശദമായി ചോദ്യം ചെയ്തു. എന്നാൽ, ഇതുവരെയുള്ള അന്വേഷണത്തിൽ ഇരുവരെയും അറസ്റ്റ് ചെയ്യാൻ തക്ക വ്യക്തമായ തെളിവുകളൊന്നും ലഭിച്ചിട്ടില്ലെന്ന് പൊലീസ് അറിയിച്ചു. നിലവിൽ ഇവരുടെ പങ്ക് സംശയാസ്പദമാണെന്ന് വിലയിരുത്തിയെങ്കിലും കേസിൽ മറ്റ് തരത്തിലുള്ള പങ്കാളിത്തം തെളിയിക്കുന്ന തെളിവുകളൊന്നും കണ്ടെത്താനാകാത്തതിനാൽ കർശന മുന്നറിയിപ്പ് നൽകി ഇരുവരെയും വിട്ടയച്ചു. ഭാവിയിൽ ഇവർക്കെതിരെ എന്തെങ്കിലും തെളിവുകൾ ലഭിച്ചാൽ നിയമനടപടി സ്വീകരിക്കുമെന്നും പൊലീസ് വ്യക്തമാക്കി.
ഞായറാഴ്ച രാവിലെയാണ് കേസിനാസ്പദമായ സംഭവം നടന്നത്. വനിതാ ബൈക്ക് യാത്രികയായ സിയ സുഹൃത്തുക്കൾക്കൊപ്പം ഗോൾഫ് കോഴ്സ് റോഡിലൂടെ സഞ്ചരിക്കുകയായിരുന്നു. ഇതിനിടെ വെള്ള നിറത്തിലുള്ള സിയാസ് കാറിലുണ്ടായിരുന്ന യുവാക്കൾ ഇവരെ പിന്തുടർന്നുവെന്നാണ് ആരോപണം. ഇതിനെ എതിർത്തപ്പോൾ യുവാക്കൾ മനഃപൂർവം ഇവരുടെ ബൈക്കിൽ കാറിടിച്ചതായും ഇതേത്തുടർന്ന് ബൈക്ക് യാത്രികർക്ക് ഗുരുതരമായി പരിക്കേറ്റതായും ആരോപണമുണ്ട്.
സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതിന് പിന്നാലെ തിങ്കളാഴ്ച സെക്ടർ 56 പൊലീസ് സ്റ്റേഷനിൽ ഭാരതീയ ന്യായ സംഹിത (BNS)യിലെ 281, 125, 3(5) വകുപ്പുകൾ പ്രകാരം ആദ്യം എഫ്ഐആർ രജിസ്റ്റർ ചെയ്തു.
പിന്നീട് സിസിടിവി ദൃശ്യങ്ങൾ വിശദമായി പരിശോധിച്ചതിനെ തുടർന്ന് കൊലപാതകശ്രമവുമായി ബന്ധപ്പെട്ട BNS 109(1) വകുപ്പും കേസിൽ ഉൾപ്പെടുത്തി.
ഡൽഹിയിലെത്തി പരിക്കേറ്റ വനിതാ ബൈക്ക് യാത്രികയായ ശിവാനി എന്ന സിയയുടെ വിശദമായ മൊഴി പൊലീസ് രേഖപ്പെടുത്തി. ഈ മൊഴിയുടെ അടിസ്ഥാനത്തിൽ ഭാരതീയ ന്യായ സംഹിത (BNS)യിലെ 78, 79 വകുപ്പുകളും കേസിൽ ഉൾപ്പെടുത്തിയതായി റിപ്പോർട്ടിൽ പറയുന്നു.
സംഭവവുമായി ബന്ധപ്പെട്ട് ഇരുവിഭാഗവും വീഡിയോകൾ പുറത്തുവിട്ടതോടെ സംഭവങ്ങളുടെ യഥാർഥ ക്രമവും ലഭ്യമായ തെളിവുകളുടെ ആധികാരികതയും സ്ഥിരീകരിക്കുകയെന്നത് പൊലീസിന് വലിയ വെല്ലുവിളിയായി മാറിയിരിക്കുകയാണ്. ഇക്കാര്യങ്ങൾ വിശദമായി പരിശോധിച്ച് സംഭവത്തിന്റെ യഥാർഥ വസ്തുതകൾ കണ്ടെത്താനുള്ള ശ്രമത്തിലാണ് എസ്ഐടി.
