റിയാദിൽ സൗദി പ്രതിരോധ മന്ത്രിയും പാക്കിസ്താന് സൈനിക മേധാവിയും കൂടിക്കാഴ്ച നടത്തി; സമീപകാല സൈനിക ആക്രമണങ്ങളും സംയുക്ത പ്രതിരോധ നടപടികളും വിലയിരുത്തി
റിയാദ് (സൗദി അറേബ്യ): സൗദി അറേബ്യയും പാക്കിസ്താനും തമ്മിലുള്ള പ്രതിരോധ സഹകരണവുമായി ബന്ധപ്പെട്ട നിർണായക ഉന്നതതല കൂടിക്കാഴ്ച തലസ്ഥാനമായ റിയാദിൽ നടന്നു. സൗദി പ്രതിരോധ മന്ത്രി പ്രിൻസ് ഖാലിദ് ബിൻ സൽമാനും പാക്കിസ്താൻ സൈനിക മേധാവി മാർഷൽ അസിം മുനീറും 2026 സെപ്റ്റംബർ 25-ന് നടത്തിയ കൂടിക്കാഴ്ചയിൽ രാജ്യസുരക്ഷയും സമീപകാല സൈനിക ആക്രമണങ്ങളും വിശദമായി ചർച്ച ചെയ്തു.
വിശുദ്ധ നഗരമായ മക്കയ്ക്കും രാജ്യത്തെ പ്രധാന സാമ്പത്തിക കേന്ദ്രങ്ങൾക്കും നേരെയുണ്ടായ ആക്രമണങ്ങളെ പ്രതിരോധിക്കുന്നതിനുള്ള നടപടികളായിരുന്നു ചർച്ചയിലെ പ്രധാന വിഷയം. കൂടിക്കാഴ്ച സംബന്ധിച്ച വിവരങ്ങൾ സൗദി പ്രസ് ഏജൻസി (SPA) ഔദ്യോഗികമായി സ്ഥിരീകരിച്ചതായാണ് റിപ്പോർട്ട്.
മക്ക സംയുക്ത പ്രതിരോധ കരാർ (Mecca Joint Defense Agreement–MJDA) പ്രകാരം നടപ്പാക്കിവരുന്ന സംയുക്ത സുരക്ഷാ-പ്രതിരോധ നടപടികളുടെ പുരോഗതിയും ഇരുരാജ്യങ്ങളിലെയും ഉന്നത ഉദ്യോഗസ്ഥർ വിലയിരുത്തി.
2026 ഓഗസ്റ്റ് 7-ന് സൗദി അറേബ്യ, പാക്കിസ്താൻ, തുർക്കിയെ എന്നീ രാജ്യങ്ങൾ ചേർന്നാണ് MJDA നടപ്പാക്കിയത്. കരാറിലെ വ്യവസ്ഥകൾ പ്രകാരം അംഗരാജ്യങ്ങളിൽ ഏതെങ്കിലും ഒന്നിനെതിരായ സായുധ ആക്രമണം എല്ലാ അംഗരാജ്യങ്ങൾക്കുമെതിരായ ആക്രമണമായി കണക്കാക്കപ്പെടും.
2025 സെപ്റ്റംബർ 17-ന് സൗദി അറേബ്യയും പാക്കിസ്താനും ഒപ്പു വെച്ച സ്ട്രാറ്റജിക് മ്യൂച്വൽ ഡിഫൻസ് എഗ്രിമെന്റ് (Strategic Mutual Defence Agreement–SMDA) അടിസ്ഥാനമാക്കിയാണ് പുതിയ സംയുക്ത പ്രതിരോധ സംവിധാനം രൂപപ്പെടുത്തിയിരിക്കുന്നത്.
മേഖലയിൽ സുരക്ഷാ സംഘർഷം വർധിച്ച സാഹചര്യത്തിലാണ് റിയാദിലെ ഉന്നതതല കൂടിക്കാഴ്ച നടന്നത്. അടുത്തിടെ തായിഫ്, യാൻബു മേഖലകളിലേക്ക് തൊടുത്തുവിട്ട ആറ് ബാലിസ്റ്റിക് മിസൈലുകൾ ആകാശത്തുവച്ചുതന്നെ പ്രതിരോധിച്ച് തകർത്തിരുന്നു. സെപ്റ്റംബർ 16-ന് മക്കയ്ക്ക് സമീപം ഒരു ഡ്രോണും വെടിവച്ചിട്ടിരുന്നു.
ഈ സംഭവങ്ങൾക്ക് പിന്നാലെ MJDA അംഗരാജ്യങ്ങളിലെ വിദേശകാര്യ മന്ത്രിമാർ സെപ്റ്റംബർ 24-ന് ഐക്യരാഷ്ട്രസഭാ പൊതുസഭയുടെ ഭാഗമായി ന്യൂയോർക്കിൽ കൂടിക്കാഴ്ച നടത്തി. സംയുക്ത പ്രതിരോധ സംവിധാനത്തിന്റെ സ്ഥാപനപരമായ പുരോഗതി അവർ വിലയിരുത്തുകയും ഐക്യരാഷ്ട്രസഭാ ചാർട്ടറിലെ ആർട്ടിക്കിൾ 51 പ്രകാരം സൗദി അറേബ്യയ്ക്കുള്ള സ്വയംപ്രതിരോധ അവകാശത്തിന് പൂർണ പിന്തുണ അറിയിക്കുകയും ചെയ്തു.
സൗദി അറേബ്യയും പാക്കിസ്താനും തമ്മിലുള്ള പ്രതിരോധ സഹകരണത്തിന്റെ ഭാഗമായി പാക്കിസ്താൻ സൈനികർ, യുദ്ധവിമാനങ്ങൾ, വ്യോമപ്രതിരോധ സംവിധാനങ്ങൾ എന്നിവ സൗദി അറേബ്യയിലേക്ക് തുടർച്ചയായി വിന്യസിക്കുന്നതായും റിപ്പോർട്ടിൽ പറയുന്നു.
ഈ സൈനിക വിന്യാസങ്ങളുടെയും പ്രതിരോധ പ്രവർത്തനങ്ങളുടെയും ചെലവ് സൗദി സർക്കാർ വഹിക്കുന്നതായാണ് വിവരം. രാജ്യത്തിന്റെ അതിർത്തികൾക്കും മക്ക ഉൾപ്പെടെയുള്ള വിശുദ്ധ കേന്ദ്രങ്ങൾക്കും ശക്തമായ സുരക്ഷ ഉറപ്പാക്കുകയാണ് സംയുക്ത പ്രതിരോധ പ്രവർത്തനങ്ങളുടെ പ്രധാന ലക്ഷ്യം.
