ടൊറന്റോ: കാനഡയിലെ ടൊറന്റോയിൽ 30 കാരിയായ ഇന്ത്യൻ വംശജയായ ഹിമാൻഷി ഖുറാനയുടെ കൊലപാതകത്തിന് ഏകദേശം ഏഴ് മാസങ്ങൾക്ക് ശേഷം, ഒളിവിൽ പോയ അവരുടെ കൂട്ടാളി അബ്ദുൾ ഗഫൂരി ടൊറന്റോ വിമാനത്താവളത്തിൽ അറസ്റ്റിലായി. ഗാർഹിക പീഡനവുമായി ബന്ധപ്പെട്ട കേസിൽ ഇയാള്ക്കെതിരെ ഫസ്റ്റ് ഡിഗ്രി കൊലപാതകക്കുറ്റം ചുമത്തിയിട്ടുണ്ടെന്ന് പോലീസ് പറഞ്ഞു. ടൊറന്റോ പോലീസ് ഹോമിസൈഡ് യൂണിറ്റും ഒളിവില് പോയവരെ തിരയുന്ന സംഘവും ഈ കേസിൽ ദേശീയ, അന്തർദേശീയ ഏജൻസികളുമായി സഹകരിച്ച് പ്രവർത്തിച്ചതാണ് അറസ്റ്റിന് വഴിയൊരുക്കിയത്.
ഏഴ് മാസത്തോളം നീണ്ട അന്വേഷണത്തിൽ, ഇന്റർപോളിന്റെയും മറ്റ് ഏജൻസികളുടെയും സഹായത്തോടെ ഗഫൂരിയുടെ നീക്കങ്ങൾ പോലീസ് നിരീക്ഷിച്ചുകൊണ്ടിരുന്നു. കാനഡയിലേക്ക് മടങ്ങിയെത്തിയ ഗഫൂരിയെ വെള്ളിയാഴ്ച ടൊറന്റോ വിമാനത്താവളത്തിൽ വെച്ച് അറസ്റ്റ് ചെയ്തതായി പോലീസ് പറഞ്ഞു. എന്നാല്, കൊലപാതകത്തിന് ശേഷം ഗഫൂരി ഇത്രയും കാലം ഒളിവിൽ കഴിഞ്ഞിരുന്ന രാജ്യം അന്വേഷണ ഏജൻസികൾ ഇതുവരെ വെളിപ്പെടുത്തിയിട്ടില്ല.
ഈ കേസ് 2025 ഡിസംബർ മുതലുള്ളതാണ്. ഡിസംബർ 19 ന് രാത്രി ഏകദേശം 10:41 ന് സ്ട്രാക്കൻ അവന്യൂ, വെല്ലിംഗ്ടൺ സ്ട്രീറ്റ് വെസ്റ്റ് എന്നിവിടങ്ങളിൽ നിന്ന് ഹിമാൻഷിയെ കാണാതായതായി ടൊറന്റോ പോലീസിന് റിപ്പോർട്ട് ലഭിച്ചു. ഉടൻ തന്നെ പോലീസ് അവർക്കായി തിരച്ചിൽ ആരംഭിച്ചു. അടുത്ത ദിവസം, ഡിസംബർ 20 ന്, ഏകദേശം രാവിലെ 6:30 ന്, അതേ പ്രദേശത്തെ ഒരു വീട്ടിൽ നിന്ന് ഹിമാൻഷിയുടെ മൃതദേഹം കണ്ടെടുത്തു. പ്രാഥമിക അന്വേഷണത്തിന് ശേഷം, പോലീസ് ഇത് കൊലപാതകമാണെന്ന നിഗമനത്തിലെത്തി.
അന്വേഷണത്തിൽ, ഹിമാൻഷിയും അബ്ദുൾ ഗഫൂരിയും തമ്മിൽ ബന്ധമുണ്ടെന്ന് പോലീസ് കണ്ടെത്തി. സംഭവത്തിന് ശേഷം ഗഫൂരിയെ കണ്ടെത്താനായില്ല. പോലീസ് അറസ്റ്റ് വാറണ്ട് പുറപ്പെടുവിക്കുകയും അയാളുടെ ഫോട്ടോ പുറത്തുവിടുകയും പൊതുജനങ്ങളോട് അയാളെക്കുറിച്ചുള്ള വിവരങ്ങൾ അഭ്യർത്ഥിക്കുകയും ചെയ്തു.
ഹിമാൻഷിയുടെ കൊലപാതക വാർത്തയെ തുടർന്ന് ടൊറന്റോയിലെ ഇന്ത്യൻ കോൺസുലേറ്റും അനുശോചനം രേഖപ്പെടുത്തി. ഇന്ത്യൻ പൗരയായ യുവതിയുടെ കൊലപാതകത്തിൽ അതീവ ദുഃഖമുണ്ടെന്നും ഈ ദുഷ്കരമായ സമയത്ത് കുടുംബത്തോടൊപ്പമുണ്ടെന്നും എംബസി സോഷ്യൽ മീഡിയ പ്ലാറ്റ്ഫോമായ ‘എക്സിൽ’ അറിയിച്ചു. കുടുംബത്തിന് സാധ്യമായ എല്ലാ സഹായവും നൽകുമെന്നും കേസ് അന്വേഷിക്കുന്ന പ്രാദേശിക പോലീസുമായി ബന്ധം തുടരുമെന്നും എംബസി പ്രതിജ്ഞയെടുത്തു. ഗഫൂരിയുടെ അറസ്റ്റോടെ അന്വേഷണം മുന്നോട്ട് പോകുമെന്ന് പ്രതീക്ഷിക്കുന്നു.
