തിരുവനന്തപുരം: സംസ്ഥാനത്തെ നിലവിലെ വൈദ്യുതി പ്രതിസന്ധി ഒക്ടോബർ ഒന്നിനകം പരിഹരിക്കുമെന്ന് മുഖ്യമന്ത്രി പറഞ്ഞു. യൂണിറ്റിന് 30 രൂപ നൽകി വൈദ്യുതി വാങ്ങാൻ തീരുമാനിച്ചിട്ടില്ലെന്നും പ്രതിസന്ധി താൽക്കാലികമാണെന്നും അദ്ദേഹം വ്യക്തമാക്കി.
കഴിഞ്ഞ സെപ്റ്റംബറിനെ അപേക്ഷിച്ച് വൈദ്യുതി ഉപഭോഗം 925 മെഗാവാട്ട് വർധിച്ച് 6,000 മെഗാവാട്ടിലെത്തി. 2030ഓടെ ആവശ്യകത 10,000 മെഗാവാട്ടായി ഉയരുമെന്നാണ് കണക്കാക്കുന്നത്. ആഭ്യന്തര ഉൽപാദനവും ദീർഘകാല വൈദ്യുതി വാങ്ങൽ കരാറുകളും ആവശ്യത്തിന് ഇല്ലാത്തതാണ് നിലവിലെ പ്രതിസന്ധിക്ക് കാരണമായി ചൂണ്ടിക്കാട്ടുന്നത്.
പുനരുപയോഗ ഊർജ്ജ ഉൽപാദനം 6,000 മെഗാവാട്ടായി ഉയർത്താനും പമ്പ്ഡ് സ്റ്റോറേജ് പദ്ധതികളും സ്വകാര്യ നിക്ഷേപവും പ്രോത്സാഹിപ്പിക്കാനും സർക്കാർ ലക്ഷ്യമിടുന്നതായി മുഖ്യമന്ത്രി പറഞ്ഞു. ഉയർന്ന വിലയ്ക്ക് വൈദ്യുതി വാങ്ങിയുള്ള അധിക ബാധ്യത സർചാർജായി ജനങ്ങളുടെ മേൽ ചുമത്തില്ലെന്നും വ്യക്തമാക്കി.
പരിസ്ഥിതി ലോല മേഖലാ വിജ്ഞാപനത്തിൽ നിന്ന് ജനവാസ കേന്ദ്രങ്ങളെ പൂർണമായി ഒഴിവാക്കാനും വില്ലേജുകളുടെ എണ്ണം 131ൽ നിന്ന് 98 ആയി കുറയ്ക്കാനുമാണ് സർക്കാർ ശ്രമം.
ഡാൻസ് വീഡിയോ സമൂഹ മാധ്യമങ്ങളിൽ നിന്ന് നീക്കം ചെയ്തതിൽ മുഖ്യമന്ത്രിയോ ഓഫീസോ ഇടപെട്ടിട്ടില്ലെന്നും നിയമപരമായ പ്രശ്നങ്ങളുടെ അടിസ്ഥാനത്തിലാണ് പൊലീസ് നടപടിയെന്നും മുഖ്യമന്ത്രി വിശദീകരിച്ചു.
പരീക്ഷാ ക്രമക്കേടുമായി ബന്ധപ്പെട്ട എസ്.ഐ.ടി അന്വേഷണവുമായി പി.എസ്.സി ചെയർമാൻ സഹകരിക്കണമെന്നും മുഖ്യമന്ത്രി വ്യക്തമാക്കി. പി.എസ്.സി റാങ്ക് ലിസ്റ്റുകളുടെ കാലാവധി നീട്ടുന്നതുൾപ്പെടെയുള്ള വിഷയങ്ങൾ സർക്കാരിന്റെ പരിഗണനയിലുണ്ട്.
അതേസമയം, ആണവ വൈദ്യുതി ലഭ്യമാക്കുന്നതിനായി മുംബൈയിലെത്തിയ സംസ്ഥാന സംഘത്തിന്റെ ചർച്ചകളിൽ രണ്ട് ദിവസത്തിനകം തീരുമാനമുണ്ടാകുമെന്നാണ് സൂചന.
