ചെറുതുരുത്തി: ചെറുതുരുത്തിയിലും സമീപപ്രദേശങ്ങളിലുമായി ചൊവ്വാഴ്ച വൈകീട്ട് മൂന്ന് മണിക്കൂറിനിടെ മൂന്ന് വ്യത്യസ്ത വാഹനാപകടങ്ങൾ. വൈകീട്ട് നാലുമുതൽ രാത്രി ഏഴുവരെ നടന്ന അപകടങ്ങളിൽ വിദ്യാർഥിനിയുൾപ്പെടെ മൂന്നുപേർക്ക് പരിക്കേറ്റു. കൊച്ചിൻ പാലത്തിനു സമീപം കാറും ബൈക്കും കൂട്ടിയിടിച്ചതാണ് ആദ്യ അപകടം. തുടർന്ന് ചെറുതുരുത്തി സ്കൂൾ പരിസരത്തും മേലേ വെട്ടിക്കാട്ടിരിയിലുമായി രണ്ട് അപകടങ്ങൾ കൂടി റിപ്പോർട്ട് ചെയ്തു.
ചെറുതുരുത്തി കൊച്ചിൻ പാലത്തിനു സമീപം വൈകീട്ടാണ് ആദ്യ അപകടമുണ്ടായത്. ചെറുതുരുത്തിയിലേക്ക് വരികയായിരുന്ന കാറും തൃശ്ശൂർ ഭാഗത്തുനിന്ന് ഷൊർണൂരിലേക്ക് പോകുകയായിരുന്ന ബൈക്കും കൂട്ടിയിടിക്കുകയായിരുന്നു. അപകടത്തിൽ ബൈക്ക് യാത്രികനായ യുവാവിന് പരിക്കേറ്റു. ഇയാളെ ഉടൻ വാണിയംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു.
കൂട്ടിയിടിയുടെ ആഘാതത്തിൽ കാറിന്റെ മുൻഭാഗം സാരമായി തകർന്നു. അപകടത്തെ തുടർന്ന് സംസ്ഥാനപാതയിൽ വാഹനഗതാഗതം തടസ്സപ്പെടുകയും ഇരുവശത്തും വാഹനങ്ങളുടെ നീണ്ട നിര രൂപപ്പെടുകയും ചെയ്തു. ഏകദേശം ഒരു മണിക്കൂറോളം ഗതാഗതം തടസ്സപ്പെട്ടതോടെ ഇതുവഴിയുള്ള യാത്രക്കാരും ബുദ്ധിമുട്ടിലായി.
ആദ്യ അപകടത്തെ തുടർന്നുള്ള ഗതാഗതക്കുരുക്ക് നിലനിൽക്കുന്നതിനിടെയാണ് ചെറുതുരുത്തി സ്കൂൾ പരിസരത്ത് രണ്ടാമത്തെ അപകടമുണ്ടായത്. റോഡിലൂടെ പോയ ബൈക്ക് വിദ്യാർഥിനിയെ ഇടിക്കുകയായിരുന്നു. പരിക്കേറ്റ വിദ്യാർഥിനിയെ സമീപത്തെ ക്ലിനിക്കിലെത്തിച്ച് പ്രാഥമിക ചികിത്സ നൽകി. പരിക്കിന്റെ ഗുരുതരാവസ്ഥ സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.
രാത്രി ഏഴുമണിയോടെയാണ് മൂന്നാമത്തെ അപകടം. മേലേ വെട്ടിക്കാട്ടിരിയിൽ ബൈക്ക് മുന്നിലൂടെ സഞ്ചരിച്ചിരുന്ന പിക്കപ്പ് വാഹനത്തിന്റെ പിന്നിൽ ഇടിക്കുകയായിരുന്നു. അപകടത്തിൽ ബൈക്ക് യാത്രികനായ യുവാവിന് പരിക്കേറ്റു.
ചുരുങ്ങിയ സമയത്തിനിടെ ചെറുതുരുത്തിയിലും സമീപപ്രദേശങ്ങളിലുമായി മൂന്ന് അപകടങ്ങൾ ഉണ്ടായത് പ്രദേശത്ത് ആശങ്കയ്ക്കിടയാക്കി. വൈകുന്നേരത്തെ തിരക്കേറിയ സമയത്ത് തുടർച്ചയായി അപകടങ്ങൾ സംഭവിച്ചതോടെ സംസ്ഥാനപാതയിലെ ഗതാഗതത്തെയും ബാധിച്ചു.
