തിരുവനന്തപുരം: ലഹരിയുടെ പിടിയിലകപ്പെട്ടവരെ അതിൽനിന്ന് മോചിപ്പിച്ച് സാധാരണ ജീവിതത്തിലേക്ക് തിരിച്ചുകൊണ്ടുവരിക എന്നത് സർക്കാരിന്റെയോ ആരോഗ്യവകുപ്പിന്റെയോ മാത്രം ഉത്തരവാദിത്വമല്ലെന്നും സമൂഹത്തിലെ ഓരോ വ്യക്തിയും ഏറ്റെടുക്കേണ്ട സാമൂഹിക കടമയാണെന്നും ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു. ലഹരിക്ക് അടിമപ്പെട്ടവരെ കുറ്റപ്പെടുത്തുകയോ സമൂഹത്തിൽനിന്ന് ഒറ്റപ്പെടുത്തുകയോ ചെയ്യുന്നതിനുപകരം ആവശ്യമായ ചികിത്സയും മാനസിക പിന്തുണയും പുനരധിവാസ സൗകര്യങ്ങളും ഉറപ്പാക്കി അവരെ ജീവിതത്തിലേക്ക് മടക്കിക്കൊണ്ടുവരാനാണ് ശ്രമിക്കേണ്ടതെന്നും അദ്ദേഹം വ്യക്തമാക്കി.
ലഹരിവിമുക്ത സമൂഹം സൃഷ്ടിക്കുകയെന്ന ലക്ഷ്യത്തോടെ നടപ്പാക്കുന്ന ‘ഓപ്പറേഷൻ തൂഫാൻ’ പദ്ധതിയുടെ പ്രധാന ഘടകമായ ‘തൂഫാൻ കെയർ’ പദ്ധതിയുമായി സഹകരിക്കാൻ സന്നദ്ധത അറിയിച്ച ആശുപത്രികളുടെ പ്രതിനിധികളുമായി നടത്തിയ ചർച്ചയിൽ സംസാരിക്കുകയായിരുന്നു മന്ത്രി. തിരുവനന്തപുരം തൈക്കാട് ഗസ്റ്റ് ഹൗസിൽ നടന്ന യോഗത്തിൽ സംസ്ഥാനത്തെ വിവിധ ജില്ലകളിൽനിന്നുള്ള നാൽപ്പതോളം ആശുപത്രികളുടെ പ്രതിനിധികൾ പങ്കെടുത്തു.
ലഹരിവസ്തുക്കളുടെ ഉപയോഗം മൂലം ശാരീരികവും മാനസികവുമായ ബുദ്ധിമുട്ടുകൾ നേരിടുന്നവർക്ക് സമയബന്ധിതവും ശാസ്ത്രീയവുമായ ചികിത്സ ലഭ്യമാക്കേണ്ടത് അത്യന്താപേക്ഷിതമാണെന്ന് മന്ത്രി ചൂണ്ടിക്കാട്ടി. കൃത്യമായ വൈദ്യപരിശോധന, കൗൺസലിംഗ്, തുടർചികിത്സ, ആവശ്യമായ പുനരധിവാസ നടപടികൾ എന്നിവയിലൂടെ ലഹരിക്ക് അടിമപ്പെട്ടവർക്ക് പുതിയ ജീവിതം നൽകാൻ സാധിക്കും. ഈ പ്രവർത്തനങ്ങളിൽ സർക്കാർ ആശുപത്രികൾക്കൊപ്പം സ്വകാര്യ ആശുപത്രികളും സജീവമായി പങ്കാളികളാകണമെന്നും അദ്ദേഹം ആവശ്യപ്പെട്ടു.
ലഹരിക്കെതിരായ പ്രവർത്തനങ്ങൾ ശക്തിപ്പെടുത്തുന്നതിനൊപ്പം ലഹരിയുടെ ഇരകളായവരെ കണ്ടെത്തി ചികിത്സയിലേക്കും പുനരധിവാസത്തിലേക്കും എത്തിക്കുകയെന്ന ലക്ഷ്യത്തോടെയാണ് ‘തൂഫാൻ കെയർ’ പദ്ധതി ആവിഷ്കരിച്ചിരിക്കുന്നത്. ലഹരിക്ക് അടിമപ്പെട്ടവരെ കണ്ടെത്തുക, അവരുടെ ആരോഗ്യസ്ഥിതി വിലയിരുത്തുക, അനുയോജ്യമായ ചികിത്സാ സംവിധാനങ്ങളുമായി ബന്ധിപ്പിക്കുക, ആവശ്യമായവർക്ക് കൗൺസലിംഗും പുനരധിവാസവും ഉറപ്പാക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.
ലഹരിവിരുദ്ധ നടപടികൾ നിയമപാലനത്തിൽ മാത്രം ഒതുങ്ങരുതെന്നും ലഹരിയുടെ പിടിയിലായവരുടെ ജീവിതത്തിൽ ക്രിയാത്മകമായ മാറ്റം സൃഷ്ടിക്കാൻ കഴിയണമെന്നും മന്ത്രി അഭിപ്രായപ്പെട്ടു. ചികിത്സയിലൂടെ ലഹരിമുക്തി നേടിയവർ വീണ്ടും ലഹരിയിലേക്ക് മടങ്ങിപ്പോകാതിരിക്കാനുള്ള തുടർപരിചരണത്തിനും പ്രാധാന്യം നൽകേണ്ടതുണ്ട്.
പദ്ധതിയുടെ പ്രവർത്തനങ്ങൾ ജില്ലാതലത്തിൽ ഏകോപിപ്പിക്കുന്നതിനായി തൂഫാൻ കെയർ കമ്മിറ്റികൾ പ്രവർത്തനം ആരംഭിച്ചതായി മന്ത്രി അറിയിച്ചു. ഈ കമ്മിറ്റികളുടെ നേതൃത്വത്തിൽ വിവിധ ജില്ലകളിൽ തൂഫാൻ കെയർ ക്യാമ്പുകൾ സംഘടിപ്പിക്കാൻ നിർദേശം നൽകിയിട്ടുണ്ട്. ലഹരിബാധിതരെ കണ്ടെത്തുന്നതിനും ആവശ്യമായ ചികിത്സാ സേവനങ്ങളിലേക്ക് എത്തിക്കുന്നതിനും ഇത്തരം ക്യാമ്പുകൾ സഹായകരമാകുമെന്നാണ് പ്രതീക്ഷിക്കുന്നത്.
തൂഫാൻ കെയർ പദ്ധതിയുടെ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിന്റെ ഭാഗമായി സഹകരിക്കാൻ തയ്യാറായ സ്വകാര്യ ആശുപത്രികളെ ഉൾപ്പെടുത്തി ജില്ലാതല ചികിത്സാ ശൃംഖല രൂപീകരിക്കാൻ യോഗത്തിൽ ധാരണയായി. ഈ ശൃംഖലയുടെ പ്രവർത്തനങ്ങൾ ജില്ലാ തൂഫാൻ കെയർ കമ്മിറ്റികളുമായി ഏകോപിപ്പിക്കുന്നതിനായി പ്രത്യേക നോഡൽ ഓഫീസറെ നിയോഗിക്കും.
ഓരോ ആശുപത്രിക്കും പ്രതിമാസം നൽകാൻ കഴിയുന്ന ഔട്ട്പേഷ്യന്റ് (ഒപി), ഇൻപേഷ്യന്റ് (ഐപി) ചികിത്സാ സൗകര്യങ്ങൾ, ഡോക്ടർമാരുടെ കൺസൾട്ടേഷനുകൾ, കൗൺസലിംഗ് സെഷനുകൾ എന്നിവ സംബന്ധിച്ച വിശദമായ വിവരങ്ങൾ തയ്യാറാക്കും. ഇതിലൂടെ ഓരോ ജില്ലയിലും ലഭ്യമായ ചികിത്സാ സംവിധാനങ്ങളെക്കുറിച്ച് വ്യക്തമായ ധാരണയുണ്ടാക്കാനും ആവശ്യക്കാർക്ക് അനുയോജ്യമായ ആശുപത്രികളിൽ ചികിത്സ ഉറപ്പാക്കാനും സാധിക്കും.
പോലീസും ജില്ലാ തൂഫാൻ കെയർ കമ്മിറ്റികളും കണ്ടെത്തി ആശുപത്രികളിലേക്ക് അയക്കുന്നവർക്കായി ഏകീകൃത റഫറൽ നടപടിക്രമങ്ങളും തയ്യാറാക്കും. ചികിത്സ ആവശ്യമായ വ്യക്തികളെ അനാവശ്യമായ കാലതാമസമില്ലാതെ ആശുപത്രികളിലെത്തിക്കുന്നതിനും വിവിധ ഏജൻസികൾ തമ്മിലുള്ള ഏകോപനം ശക്തിപ്പെടുത്തുന്നതിനുമാണ് ഈ സംവിധാനം ലക്ഷ്യമിടുന്നത്.
ലഹരിവിമുക്ത ചികിത്സ സാധാരണക്കാർക്കും സാമ്പത്തികമായി പിന്നാക്കം നിൽക്കുന്നവർക്കും ലഭ്യമാക്കുന്നതിനായി ആശുപത്രികൾ ന്യായമായ നിരക്കിലുള്ള ചികിത്സാ പാക്കേജുകൾ നിർദേശിക്കും. ചികിത്സാച്ചെലവിൽ സാധ്യമായ ഇളവുകൾ അനുവദിക്കുന്നതിനെക്കുറിച്ചും രോഗികളുടെ ആവശ്യങ്ങൾക്കനുസരിച്ച് വിവിധ ചികിത്സാ മാർഗങ്ങൾ ലഭ്യമാക്കുന്നതിനെക്കുറിച്ചും യോഗത്തിൽ ധാരണയായി.
തൂഫാൻ കെയർ പദ്ധതിയിലൂടെ റഫർ ചെയ്യപ്പെടുന്നവരിൽ അടിയന്തര വൈദ്യസഹായം ആവശ്യമായവർക്ക് കാലതാമസമില്ലാതെ ചികിത്സ ലഭ്യമാക്കാനും തീരുമാനിച്ചു. ഗുരുതരമായ ആരോഗ്യപ്രശ്നങ്ങൾ നേരിടുന്നവരെ എത്രയും വേഗം ആവശ്യമായ ചികിത്സാ സംവിധാനങ്ങളിലേക്ക് എത്തിക്കുന്നതിന് പ്രത്യേക പരിഗണന നൽകും.
ചികിത്സ തേടിയെത്തുന്നവരുടെ സ്വകാര്യതയും വ്യക്തിപരമായ മാന്യതയും പൂർണമായി സംരക്ഷിക്കുമെന്നും മന്ത്രി വ്യക്തമാക്കി. രോഗിയുടെ അറിവോടെയുള്ള സമ്മതം ഉറപ്പാക്കിയശേഷമായിരിക്കും ചികിത്സ നൽകുക. ലഹരിബാധിതരോടുള്ള സാമൂഹിക വിവേചനം ചികിത്സ തേടുന്നതിന് തടസ്സമാകാതിരിക്കാനുള്ള സമീപനമാണ് സ്വീകരിക്കേണ്ടതെന്നും അദ്ദേഹം പറഞ്ഞു.
തൂഫാൻ കെയർ പദ്ധതിയുമായി സഹകരിക്കാൻ താൽപ്പര്യം പ്രകടിപ്പിച്ച ആശുപത്രികളെ ഉൾപ്പെടുത്തി ആദ്യഘട്ടത്തിൽ പൈലറ്റ് അടിസ്ഥാനത്തിൽ പ്രവർത്തനങ്ങൾ ആരംഭിക്കാനാണ് തീരുമാനം. ഈ ഘട്ടത്തിൽ ലഭിക്കുന്ന അനുഭവങ്ങളും ചികിത്സാ ഫലങ്ങളും പ്രവർത്തനരീതികളുടെ കാര്യക്ഷമതയും വിലയിരുത്തിയശേഷം പദ്ധതി കൂടുതൽ ആശുപത്രികളിലേക്കും ജില്ലകളിലേക്കും വ്യാപിപ്പിക്കും.
ജില്ലാ പോലീസ് മേധാവികൾ അതത് ജില്ലകളിലെ ആശുപത്രികളുമായും തൂഫാൻ കെയർ കമ്മിറ്റികളുമായും ചേർന്ന് ഏകോപന പ്രവർത്തനങ്ങൾക്ക് നേതൃത്വം നൽകും. ചികിത്സാ സേവനങ്ങൾ ആവശ്യക്കാർക്ക് ലഭ്യമാക്കുന്നതിൽ ഉണ്ടാകുന്ന പ്രായോഗിക ബുദ്ധിമുട്ടുകൾ കണ്ടെത്തി പരിഹരിക്കുന്നതിനും ഈ ഏകോപന സംവിധാനം സഹായകരമാകും.
പദ്ധതിയുടെ പുരോഗതി വിലയിരുത്തുന്നതിനായി രണ്ടുമാസത്തിലൊരിക്കൽ അവലോകന യോഗം ചേരാനും തീരുമാനിച്ചു. ആശുപത്രികളുടെ പങ്കാളിത്തം, ചികിത്സ ലഭിച്ചവരുടെ എണ്ണം, കൗൺസലിംഗ് സേവനങ്ങൾ, പുനരധിവാസ പ്രവർത്തനങ്ങൾ, പദ്ധതിയുടെ ഫലപ്രാപ്തി തുടങ്ങിയ വിഷയങ്ങൾ അവലോകനത്തിന്റെ ഭാഗമായി വിലയിരുത്തും.
ഓപ്പറേഷൻ തൂഫാനുമായി ബന്ധപ്പെട്ട പ്രവർത്തനങ്ങൾക്ക് യോഗത്തിൽ പങ്കെടുത്ത ആശുപത്രി പ്രതിനിധികളിൽനിന്നും ഡോക്ടർമാരിൽനിന്നും പൂർണ പിന്തുണയാണ് ലഭിച്ചതെന്ന് മന്ത്രി രമേശ് ചെന്നിത്തല അറിയിച്ചു. പൊതുജനാരോഗ്യ സംരക്ഷണത്തിനും ലഹരിവിമുക്ത സമൂഹം കെട്ടിപ്പടുക്കുന്നതിനും സർക്കാർ സംവിധാനങ്ങളും സ്വകാര്യ ആരോഗ്യസ്ഥാപനങ്ങളും കൈകോർക്കുന്നത് നിർണായകമാണെന്നും അദ്ദേഹം അഭിപ്രായപ്പെട്ടു.
തിരുവനന്തപുരം തൈക്കാട് ഗസ്റ്റ് ഹൗസിൽ നടന്ന യോഗത്തിൽ സംസ്ഥാന പോലീസ് മേധാവി റവാഡ ആസാദ് ചന്ദ്രശേഖർ, ഉത്തരമേഖല ഐ.ജിയും തൂഫാൻ നോഡൽ ഓഫീസറുമായ പുട്ട വിമലാദിത്യ, ഇന്ത്യൻ മെഡിക്കൽ അസോസിയേഷൻ (ഐ.എം.എ.) സംസ്ഥാന പ്രസിഡന്റ് ഡോ. പി. ഗോപികുമാർ, തിരുവനന്തപുരം ഡി.സി.പിയും അസിസ്റ്റന്റ് നോഡൽ ഓഫീസറുമായ ഷഹൻഷാ കെ.എസ്., ഡോ. പ്രശാന്ത് എന്നിവർ പങ്കെടുത്തു.
ഇവർക്കുപുറമേ സംസ്ഥാനത്തെ വിവിധ ജില്ലകളിൽനിന്നുള്ള നാൽപ്പതോളം ആശുപത്രികളുടെ പ്രതിനിധികൾ, ഡോക്ടർമാർ, ആശുപത്രി മാനേജ്മെന്റ് പ്രതിനിധികൾ, പോലീസ് ഉദ്യോഗസ്ഥർ, മറ്റ് ബന്ധപ്പെട്ട ഉദ്യോഗസ്ഥർ എന്നിവരും ചർച്ചയിൽ സംബന്ധിച്ചു.
ലഹരിക്കെതിരായ പോരാട്ടത്തിൽ നിയമനടപടികൾക്കൊപ്പം ചികിത്സയ്ക്കും പുനരധിവാസത്തിനും തുല്യപ്രാധാന്യം നൽകുന്ന സമീപനമാണ് തൂഫാൻ കെയർ പദ്ധതിയിലൂടെ ലക്ഷ്യമിടുന്നത്. ലഹരിയുടെ പിടിയിലകപ്പെട്ടവരെ സമൂഹത്തിന്റെ മുഖ്യധാരയിലേക്ക് തിരികെയെത്തിക്കാൻ ആരോഗ്യപ്രവർത്തകരുടെയും പോലീസിന്റെയും കുടുംബങ്ങളുടെയും പൊതുസമൂഹത്തിന്റെയും കൂട്ടായ പരിശ്രമം അനിവാര്യമാണെന്ന സന്ദേശമാണ് യോഗം മുന്നോട്ടു വെച്ചത്.
