വാഷിംഗ്ടൺ: ഗാസ മുനമ്പ് വീണ്ടും കൈവശപ്പെടുത്താനുള്ള ഇസ്രായേലിന്റെ ഏത് നീക്കവും “വലിയ അബദ്ധം” ആയിരിക്കുമെന്ന് യുഎസ് പ്രസിഡന്റ് ജോ ബൈഡൻ ഞായറാഴ്ച സിബിഎസ് ന്യൂസിന് നല്‍കിയ അഭിമുഖത്തില്‍ പറഞ്ഞു. ഇസ്രായേൽ സൈനികർ കര ആക്രമണത്തിന് തയ്യാറെടുക്കുന്നു എന്ന റിപ്പോര്‍ട്ടിന് പ്രതികരിക്കുകയായിരുന്നു ബൈഡന്‍.
ഒക്ടോബർ 7 ന് ഹമാസിന്റെ ആക്രമണത്തിന് പ്രതികാരം ചെയ്യുന്ന ഇസ്രായേൽ, തീവ്രവാദ ഗ്രൂപ്പിനെതിരെ യുദ്ധം പ്രഖ്യാപിക്കുകയും നിരന്തരമായ ബോംബാക്രമണം നടത്തുകയും വടക്കൻ ഗാസയിലെ ഒരു ദശലക്ഷത്തിലധികം ആളുകൾക്ക് ഓപ്പറേഷന് മുന്നോടിയായി തെക്കോട്ട് നീങ്ങാൻ മുന്നറിയിപ്പ് നൽകുകയും ചെയ്തു.
ഇസ്രയേലിന്റെ സഖ്യ കക്ഷിയായ അമേരിക്ക ഗാസയിൽ ഏതെങ്കിലും അധിനിവേശത്തെ പിന്തുണയ്ക്കുമോ എന്ന് സിബിഎസ് ന്യൂസ് പ്രോഗ്രാം 60 മിനിറ്റ് ചോദിച്ചപ്പോഴാണ് ബൈഡന്‍ മറുപടി പറഞ്ഞത്. “അതൊരു വലിയ തെറ്റായിരിക്കുമെന്ന് ഞാൻ കരുതുന്നു” എന്നായിരുന്നു അദ്ദേഹത്തിന്റെ മറുപടി. ഹമാസ് “എല്ലാ ഫലസ്തീൻ ജനതയെയും പ്രതിനിധീകരിക്കുന്നില്ല” എന്നും അദ്ദേഹം കൂട്ടിച്ചേര്‍ത്തു.
എന്നാൽ, ആക്രമണം നടത്തി “തീവ്രവാദികളെ തുരത്തുക” എന്നത് ആവശ്യമായ നടപടിയാണെന്നും അദ്ദേഹം പറഞ്ഞു.
ഹമാസ് ആക്രമണത്തിൽ 1400-ലധികം ആളുകളെ വെടിവച്ചും കുത്തിയും കത്തിച്ചും കൊന്നു, അവരിൽ ഭൂരിഭാഗവും സാധാരണക്കാരാണ്. പിന്നീടുള്ള ദിവസങ്ങളിൽ ഇസ്രായേലിന്റെ പ്രതികാര ആക്രമണങ്ങൾ വ്യാപിക്കുകയും ഗാസയിൽ ഭൂരിഭാഗം സാധാരണ ഫലസ്തീനുകാരായ 2,670 പേരെയെങ്കിലും കൊല്ലുകയും ചെയ്തു.
ഗാസയിലെ ആക്രമണത്തിന്റെ പ്രത്യാഘാതങ്ങളെക്കുറിച്ച് ഇസ്രായേലിന് ഗുരുതരമായ മുന്നറിയിപ്പുകൾ ലഭിച്ചിട്ടുണ്ട്. മാനുഷിക ദുരന്തത്തെക്കുറിച്ച് മുന്നറിയിപ്പ് നൽകിയ സഹായ ഗ്രൂപ്പുകൾ, സംഘർഷം വർദ്ധിക്കുന്നതിനെക്കുറിച്ചുള്ള ഭയം, ദരിദ്രവും ജനസാന്ദ്രതയുള്ളതുമായ പ്രദേശത്തെ സിവിലിയന്മാരിൽ നിന്ന് തീവ്രവാദികളെ വേർതിരിക്കുന്നതിലെ വെല്ലുവിളികൾ എല്ലാം ഇസ്രായേല്‍ അഭിമുഖീകരിക്കേണ്ടി വരും.
1967 ലെ ആറ് ദിവസത്തെ യുദ്ധത്തിലാണ് ഇസ്രായേൽ ആദ്യമായി ഗാസ പിടിച്ചടക്കിയത്. 2005 ൽ മാത്രമാണ് ഫലസ്തീനുകൾക്ക് പൂർണ്ണമായും ഗാസ തിരികെ ലഭിച്ചത്.
ഒരു വർഷത്തിനുശേഷം, ഈജിപ്തും മെഡിറ്ററേനിയൻ കടലും അതിർത്തി പങ്കിടുന്ന 140 ചതുരശ്ര മൈൽ (362 ചതുരശ്ര കിലോമീറ്റർ) കരയിൽ ഇസ്രായേൽ വായു, കര, കടൽ ഉപരോധം ഏർപ്പെടുത്തി.
2007ൽ ഫലസ്തീൻ പ്രസിഡന്റ് മഹ്മൂദ് അബ്ബാസിന്റെ മതേതര ഫതഹ് പ്രസ്ഥാനത്തിൽ നിന്ന് ഹമാസ് ഗാസയുടെ നിയന്ത്രണം ഏറ്റെടുത്തതോടെ ഇസ്രായേൽ ഉപരോധം ശക്തമാക്കി.
“ഒരു കൂട്ടം ഭീരുക്കൾ” എന്ന് ബൈഡൻ വിശേഷിപ്പിച്ച ഹമാസിനെ പൂർണ്ണമായും ഇല്ലാതാക്കേണ്ടതുണ്ടോ എന്ന് ചോദിച്ചപ്പോൾ അദ്ദേഹം “അതെ” എന്നാണ് മറുപടി പറഞ്ഞത്.
സിബിഎസ് ന്യൂസിന്റെ ’60 മിനിറ്റ്’ പ്രോഗ്രാമില്‍, സ്കോട്ട് പെല്ലി ബൈഡനോട് യുഎസ് സൈനികർ യുദ്ധത്തിൽ ചേരുമോ എന്ന ചോദ്യത്തിന് “അതിന്റെ ആവശ്യമുണ്ടെന്ന് താന്‍ കരുതുന്നില്ല, ” അഫ്ഗാനിസ്ഥാനിൽ നിന്ന് യുഎസ് സൈനികരെ പിൻവലിക്കുകയും റഷ്യൻ അധിനിവേശം തടയാന്‍ ഉക്രെയ്നെ സഹായിക്കാൻ ആരെയും അയക്കില്ലെന്ന് ശഠിക്കുകയും ചെയ്ത ബൈഡൻ മറുപടി നൽകി.
രാജ്യത്തെ ഏറ്റവും മികച്ച പോരാട്ട ശക്തികളിലൊന്നാണ് ഇസ്രായേലിനുള്ളത്. അവർക്ക് ആവശ്യമായതെല്ലാം ഞങ്ങൾ നൽകുമെന്ന് ഞാൻ ഉറപ്പുനൽകുന്നു എന്നും അദ്ദേഹം പറഞ്ഞു.
ഇസ്രായേലിനുള്ള ശക്തമായ പിന്തുണയുമായി കിഴക്കൻ മെഡിറ്ററേനിയനിലേക്ക് അമേരിക്ക ഇതിനകം രണ്ട് വിമാനവാഹിനിക്കപ്പലുകൾ വിന്യസിച്ചിട്ടുണ്ട്.
