ഗാസയിൽ ഇസ്രായേൽ നടത്തുന്ന ബോംബാക്രമണം അന്താരാഷ്ട്ര നിയമങ്ങൾക്ക് വിരുദ്ധമാണെന്നും, പതിറ്റാണ്ടുകൾ നീണ്ടുനിൽക്കുന്ന ഒരു ദുരന്തം സൃഷ്ടിക്കാൻ സാധ്യതയുണ്ടെന്നും റഷ്യൻ വിദേശകാര്യ മന്ത്രി സെർജി ലാവ്റോവ് പറഞ്ഞു.
ശനിയാഴ്ച പുറത്തിറക്കിയ ബെലാറഷ്യൻ സ്റ്റേറ്റ് ന്യൂസ് ഏജൻസിയായ ബെൽറ്റയ്ക്ക് നൽകിയ അഭിമുഖത്തിലാണ് ലാവ്റോവ് ഇസ്രായേലിനെ വിമര്‍ശിച്ചത്.
“ഭീകരവാദത്തെ ഞങ്ങൾ അപലപിക്കുമ്പോൾ തന്നെ, ബന്ദികളാക്കപ്പെട്ടവരില്‍ സിവിലിയന്മാർ ഉൾപ്പെടെയുള്ളവരുണ്ടെന്ന് അറിയാവുന്ന ലക്ഷ്യങ്ങൾക്കെതിരെ വിവേചനരഹിതമായി ബലപ്രയോഗം നടത്തുന്നത് ഉൾപ്പെടെയുള്ള അന്താരാഷ്ട്ര മാനുഷിക നിയമത്തിന്റെ മാനദണ്ഡങ്ങൾ ലംഘിച്ചുകൊണ്ട് നിങ്ങൾക്ക് തീവ്രവാദത്തോട് പ്രതികരിക്കാമെന്ന കാര്യത്തിൽ ഞങ്ങൾ വിയോജിക്കുന്നു,” ലാവ്റോവ് പറഞ്ഞു.
ഇസ്രായേൽ പ്രതിജ്ഞ ചെയ്തതുപോലെ ഹമാസിനെ നശിപ്പിക്കുക എന്ന ലക്ഷ്യത്തില്‍ ഗാസയെ അതിലെ ഭൂരിഭാഗം സിവിലിയൻ ജനതയ്‌ക്കൊപ്പം നശിപ്പിക്കാതെ അസാധ്യമാണെന്ന് അദ്ദേഹം കൂട്ടിച്ചേർത്തു.
“ഇസ്രായേലിലും വിദേശത്തുമുള്ള ചില രാഷ്ട്രീയക്കാർ നിർദ്ദേശിക്കുന്നതുപോലെ ഗാസ നശിപ്പിക്കപ്പെടുകയും 2 ദശലക്ഷം നിവാസികളെ പുറത്താക്കുകയും ചെയ്താൽ, അത് നൂറ്റാണ്ടുകളല്ലെങ്കിൽ പതിറ്റാണ്ടുകളോളം ഒരു ദുരന്തം സൃഷ്ടിക്കും,” ലാവ്റോവ് മുന്നറിയിപ്പ് നൽകി. ഇസ്രായേലിന്റെ നടപടി നിർത്തേണ്ടതും ഉപരോധത്തിൻകീഴിൽ ജനങ്ങളെ രക്ഷിക്കാൻ മാനുഷിക പരിപാടികൾ പ്രഖ്യാപിക്കേണ്ടതും ആവശ്യമാണെന്നും അദ്ദേഹം പറഞ്ഞു.
ഇസ്രായേൽ ബോംബാക്രമണം ആരംഭിച്ചതിന് ശേഷം 7,326 ഫലസ്തീനികൾ കൊല്ലപ്പെട്ടതായി ഹമാസിന്റെ നിയന്ത്രണത്തിലുള്ള ഗാസയിലെ ആരോഗ്യ അധികൃതർ വെള്ളിയാഴ്ച അറിയിച്ചു. ഒക്‌ടോബർ 7-ന് ഹമാസ് പോരാളികൾ നടത്തിയ റെയ്ഡിനെ തുടർന്നാണ് 1,400 ഇസ്രായേലികളെ, കൂടുതലും സാധാരണക്കാരെ കൊന്നതെന്ന് ഇസ്രായേൽ പറഞ്ഞു. ഹമാസ് ഇരുന്നൂറിലധികം പേരെ ബന്ദികളാക്കിയിട്ടുണ്ട്.
അടിയന്തര വെടിനിർത്തലിനെയും ദ്വിരാഷ്ട്ര പരിഹാരത്തെയും പിന്തുണയ്ക്കുന്ന റഷ്യ, ഹമാസ് പ്രതിനിധിയെ മോസ്കോയിലേക്ക് ക്ഷണിച്ചുകൊണ്ടാണ് ഇസ്രായേലിനെ വിവരം ധരിപ്പിച്ചത്. റഷ്യയുടെ അഭ്യർഥന മാനിച്ച് എട്ട് ഗാസ ബന്ദികളെ തേടുകയാണെന്ന് ഹമാസ് അറിയിച്ചു.
റഷ്യയും ഇസ്രായേലുമായി അടുത്ത ബന്ധം പുലർത്തുന്നുണ്ടെന്ന് ലാവ്റോവ് പറഞ്ഞു.
“ഞങ്ങൾ ഇസ്രായേലുമായി പൂർണ്ണ സമ്പർക്കം പുലർത്തുന്നു, ഞങ്ങളുടെ അംബാസഡർ അവരുമായി പതിവായി ബന്ധപ്പെടുന്നുമുണ്ട്,” ലാവ്റോവ് പറഞ്ഞു.
ഉക്രെയിലുടനീളം റഷ്യ തന്നെ സിവിലിയന്മാര്‍ക്കെതിരെ ബോംബാക്രമണം നടത്തുമ്പോഴാണ് റഷ്യ ‘മുതലക്കണ്ണീരൊഴുക്കുന്നത്” എന്ന് ഉക്രെയിനും പാശ്ചാത്യ രാജ്യങ്ങളും ആരോപിച്ചു. എന്നാല്‍, മനഃപൂർവം സിവിലിയന്മാരെ ലക്ഷ്യമിടുന്നില്ലെന്നും സൈനിക ലക്ഷ്യങ്ങൾ മാത്രമാണ് ലക്ഷ്യമിടുന്നതെന്നും മോസ്കോ പറയുന്നു.
