ധാക്ക: ബംഗ്ലാദേശിലെ ഇടക്കാല സർക്കാരിന്റെ മുഖ്യ ഉപദേഷ്ടാവായ മുഹമ്മദ് യൂനുസ്, ഹിന്ദുക്കൾക്കെതിരായ അക്രമ സംഭവങ്ങളെ “അതിശയോക്തിപരമായ പ്രചാരണം” എന്ന് ആവർത്തിച്ച് പറഞ്ഞ് തള്ളിക്കളഞ്ഞു. എന്നാൽ, ഐക്യരാഷ്ട്രസഭയുടെ മനുഷ്യാവകാശ ഓഫീസിന്റെ വസ്തുതാന്വേഷണ റിപ്പോർട്ട് ഹിന്ദുക്കളുടെ ആരാധനാലയങ്ങൾക്ക് നേരെയുള്ള ആക്രമണങ്ങൾ ഉൾപ്പെടെയുള്ള അക്രമാസക്തമായ ജനക്കൂട്ട ആക്രമണങ്ങളുടെ തെളിവുകൾ അവതരിപ്പിച്ചുകൊണ്ട് അദ്ദേഹത്തിന്റെ അവകാശവാദങ്ങൾ പൊളിച്ചടുക്കി. യാദൃശ്ചികമായി, യൂനുസിന്റെ ഇടക്കാല സർക്കാരിന്റെ ക്ഷണപ്രകാരമാണ് വസ്തുതാന്വേഷണ സംഘത്തെ ഐക്യരാഷ്ട്ര സഭ ബംഗ്ലാദേശിലേക്ക് അയച്ചത്.
2024 ഓഗസ്റ്റിൽ ഷെയ്ഖ് ഹസീനയെ അധികാരത്തിൽ നിന്ന് പുറത്താക്കി ഒരാഴ്ച കഴിഞ്ഞപ്പോഴാണ് മൂന്നു ദിവസത്തെ അരാജകത്വത്തിൽ അഞ്ച് കൊലപാതകങ്ങൾ ഉൾപ്പെടെ ന്യൂനപക്ഷ ഹിന്ദുക്കൾക്കെതിരെ 200 ലധികം ആക്രമണ സംഭവങ്ങൾ ഉണ്ടായതെന്ന് റിപ്പോര്‍ട്ടുകളുണ്ടായിരുന്നു. എന്നാല്‍, ഇന്ത്യൻ പ്രധാനമന്ത്രി നരേന്ദ്ര മോദിയും അന്നത്തെ യുഎസ് പ്രസിഡന്റ് ജോ ബൈഡനും ബംഗ്ലാദേശിൽ ഹിന്ദുക്കൾക്കെതിരായ ആക്രമണങ്ങളെ വിമർശിച്ചപ്പോൾ, യൂനുസ് ഹിന്ദുക്കൾക്കെതിരായ അക്രമത്തെ കുറച്ചുകാണുകയും രാജ്യത്തെ അസ്ഥിരപ്പെടുത്തുക എന്ന ലക്ഷ്യത്തോടെയുള്ള രാഷ്ട്രീയ ലക്ഷ്യങ്ങളോടെയുള്ള “അതിശയോക്തിപരമായ പ്രചാരണം” എന്ന് വിശേഷിപ്പിക്കുകയും ചെയ്തു.
ഫെബ്രുവരി 12 ന് പുറത്തിറങ്ങിയ യുഎൻ റിപ്പോർട്ടിൽ, ഷെയ്ഖ് ഹസീന ഇന്ത്യയിലേക്ക് പലായനം ചെയ്യുന്നതിന് മുമ്പുതന്നെ ബംഗ്ലാദേശിലെ ഹിന്ദു ന്യൂനപക്ഷങ്ങൾക്കെതിരായ അക്രമാസക്തമായ ആൾക്കൂട്ട ആക്രമണം ആരംഭിച്ചിരുന്നുവെന്നും പറയുന്നു. ബംഗ്ലാദേശിൽ ചിറ്റഗോംഗ് കുന്നിൻ പ്രദേശങ്ങളിൽ താമസിക്കുന്ന ഹിന്ദുക്കളും അഹമ്മദിയ മുസ്ലീങ്ങളും തദ്ദേശീയ വിഭാഗങ്ങളും സമാനമായ അതിക്രമങ്ങൾ നേരിട്ടിട്ടുണ്ടെന്നും റിപ്പോര്‍ട്ടില്‍ വെളിപ്പെടുത്തി.
