ന്യൂഡൽഹി: 2008 നവംബർ 26 ലെ മുംബൈ ഭീകരാക്രമണത്തിലെ പ്രതിയും ഗൂഢാലോചനക്കാരനുമായ തഹാവൂർ റാണയെ ഡൽഹി പട്യാല ഹൗസ് കോടതി 18 ദിവസത്തെ എൻഐഎ കസ്റ്റഡിയിൽ വിട്ടു. അഡീഷണൽ സെഷൻസ് ജഡ്ജി ചന്ദർ ജീത് സിംഗാണ് ഇയാളെ എൻഐഎ കസ്റ്റഡിയിൽ വിടാൻ ഉത്തരവിട്ടത്.
ഇന്നലെ രാത്രി (ഏപ്രിൽ 10) ഏകദേശം 10 മണിയോടെയാണ് എൻഐഎ തഹാവൂർ റാണയെ പട്യാല ഹൗസ് കോടതിയിൽ ഹാജരാക്കിയത്. ഇന്നലെ വൈകുന്നേരം അമേരിക്കയില്‍ നിന്ന് ഡൽഹിയിലെ പാലം വ്യോമസേനാ വിമാനത്താവളത്തില്‍ വന്നിറങ്ങിയ ഉടനെ എൻഐഎ തഹാവൂറിനെ അറസ്റ്റ് ചെയ്തു. വ്യോമസേനാ താവളത്തിൽ നിന്ന് പട്യാല ഹൗസ് കോടതിയിലേക്ക് കവചിത വാഹനത്തിലാണ് തഹാവൂർ റാണയെ കൊണ്ടുവന്നത്.
എൻ‌ഐ‌എയ്ക്ക് വേണ്ടി മുതിർന്ന അഭിഭാഷകൻ ദയാൻ കൃഷ്ണനും സ്‌പെഷ്യൽ പബ്ലിക് പ്രോസിക്യൂട്ടർ നരേന്ദ്ര മാനും 20 ദിവസത്തെ എൻഐഎ കസ്റ്റഡി ആവശ്യപ്പെട്ടു. തഹാവൂർ റാണയെ തെളിവുകൾ സഹിതം ചോദ്യം ചെയ്യണമെന്ന് എൻഐഎ പറഞ്ഞു. ഈ ഭീകരാക്രമണത്തിന് പിന്നിലെ ഗൂഢാലോചന പുറത്തുകൊണ്ടുവരാൻ ചോദ്യം ചെയ്യൽ ആവശ്യമാണെന്ന് എൻഐഎ പറഞ്ഞു. ഡൽഹി ലീഗൽ സർവീസസ് അതോറിറ്റിയിലെ അഭിഭാഷകൻ പിയൂഷ് സച്ച്ദേവയാണ് തഹാവൂർ റാണയ്ക്ക് വേണ്ടി കോടതിയിൽ ഹാജരായത്.
ഡൽഹി പോലീസ് സ്‌പെഷ്യൽ വെപ്പൺസ് ആൻഡ് ടാക്‌റ്റിക്‌സ് (സ്വാറ്റ്) യുടെയും മറ്റ് സുരക്ഷാ ഉദ്യോഗസ്ഥരുടെയും കനത്ത സുരക്ഷയുള്ള വാഹനവ്യൂഹത്തിൽ പട്യാല ഹൗസ് കോടതി സമുച്ചയത്തിൽ നിന്ന് എൻഐഎ ആസ്ഥാനത്തേക്ക് കൊണ്ടുവന്നു.
സിജിഒ കോംപ്ലക്സിലെ തീവ്രവാദ വിരുദ്ധ ഏജൻസിയുടെ ആസ്ഥാനത്തിനുള്ളിലെ ഉയർന്ന സുരക്ഷാ സെല്ലിലാണ് റാണയെ പാർപ്പിക്കുന്നതെന്ന് ഉദ്യോഗസ്ഥർ പറഞ്ഞു. “18 ദിവസം റാണ എൻഐഎ കസ്റ്റഡിയിൽ തുടരും, ഈ കാലയളവിൽ 2008 ലെ മാരകമായ ആക്രമണത്തിന് പിന്നിലെ മുഴുവൻ ഗൂഢാലോചനയും പുറത്തുകൊണ്ടുവരുന്നതിനായി ഏജൻസി അദ്ദേഹത്തെ വിശദമായി ചോദ്യം ചെയ്യും. മൊത്തം 166 പേർ കൊല്ലപ്പെടുകയും 238 ലധികം പേർക്ക് പരിക്കേൽക്കുകയും ചെയ്ത ആക്രമണമാണിത്.” ഏജൻസി ഉദ്യോഗസ്ഥർ പറഞ്ഞു.
വ്യാഴാഴ്ച വൈകുന്നേരം ലോസ് ഏഞ്ചൽസിൽ നിന്ന് പ്രത്യേക വിമാനത്തിലാണ് റാണയെ ന്യൂഡൽഹിയിലേക്ക് കൊണ്ടുവന്നത്. മുതിർന്ന ഉദ്യോഗസ്ഥർ ഉൾപ്പെടെയുള്ള എൻ‌എസ്‌ജി, എൻഐഎ ടീമുകൾ അകമ്പടി സേവിച്ചു. യുഎസ് സുപ്രീം കോടതിക്ക് മുമ്പാകെയുള്ള അടിയന്തര അപേക്ഷ ഉൾപ്പെടെ റാണയുടെ വിവിധ കേസുകളും അപ്പീലുകളും തള്ളിയതിന് ശേഷമാണ് ഒടുവിൽ അദ്ദേഹത്തെ നാടുകടത്തൽ നടന്നത്.
കൈമാറുന്നതിനെതിരായ റാണയുടെ ഹർജി യുഎസ് സുപ്രീം കോടതി തള്ളിയതിനെത്തുടർന്ന്, ഇന്ത്യൻ ഏജൻസികളുടെ ഒരു സംഘം അദ്ദേഹത്തെ കൊണ്ടുവരാൻ അമേരിക്കയിലേക്ക് പോയി. പാക്കിസ്താന്‍ വംശജനായ കനേഡിയൻ പൗരനാണ് തഹാവൂർ റാണ. 2008-ലെ മുംബൈ ഭീകരാക്രമണത്തിന്റെ പ്രധാന ഗൂഢാലോചനക്കാരിൽ ഒരാളുടെ അടുത്ത അനുയായിയാണ് ദാവൂദ് ഗിലാനി എന്ന അമേരിക്കൻ പൗരനായ ഡേവിഡ് കോൾമാൻ ഹെഡ്‌ലി.
64 വയസ്സുള്ള തഹാവൂർ റാണയുടെ പിന്തുണ കാരണം ആ സമയത്ത് ഇന്ത്യയിൽ ഹെഡ്‌ലിയുടെ നീക്കം എളുപ്പമായിരുന്നു. പാകിസ്ഥാൻ വംശജനായ തഹാവൂർ റാണയും ഡേവിഡ് കോൾമാൻ ഹെഡ്‌ലിയും ബാല്യകാല സുഹൃത്തുക്കളായിരുന്നു, ഇരുവരും ഒരേ സൈനിക സ്‌കൂളിൽ പഠിച്ചവരായിരുന്നു. ഡേവിഡ് കോൾമാൻ ഹെഡ്‌ലിയെ സഹായിക്കാൻ തഹാവൂർ റാണ മുംബൈയിൽ ഒരു ഏജൻസി തുറന്നിരുന്നു.
അതേസമയം, തഹാവൂർ റാണയുടെ ഹാജരാകൽ സമയത്ത് ജുഡീഷ്യൽ പ്രവർത്തനങ്ങളിൽ ഒരു തടസ്സവും ഉണ്ടാകില്ലെന്ന് പട്യാല ഹൗസ് കോടതിയിലെ ബാർ അസോസിയേഷൻ, ന്യൂഡൽഹി ബാർ അസോസിയേഷൻ അറിയിച്ചു. പട്യാല ഹൗസ് കോടതിയിൽ തഹാവൂർ റാണയെ ഹാജരാക്കുമ്പോൾ കർശന സുരക്ഷാ ക്രമീകരണങ്ങളാണ് ഒരുക്കിയിരുന്നത്. കോടതി പരിസരം ഒരു കോട്ടയാക്കി മാറ്റി.
