ടെഹ്‌റാൻ: ഇറാന്റെ യുറേനിയം സമ്പുഷ്ടീകരണം നിർത്താൻ അമേരിക്ക ശ്രമിച്ചാൽ ആണവ കരാറുണ്ടാകില്ലെന്ന് ഇറാൻ വിദേശകാര്യ മന്ത്രി സെയ്ദ് അബ്ബാസ് അരഗ്ചി പറഞ്ഞു. വെള്ളിയാഴ്ച റോമിൽ ഇറാനിയൻ, യുഎസ് പ്രതിനിധികൾ തമ്മിലുള്ള അഞ്ചാം റൗണ്ട് പരോക്ഷ ആണവ ചർച്ചകൾക്ക് മുന്നോടിയായി വ്യാഴാഴ്ച സർക്കാർ നടത്തുന്ന ഐആർഐബി ടിവിക്ക് നൽകിയ തത്സമയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
“നമ്മൾക്കിടയിൽ ഇപ്പോഴും അടിസ്ഥാനപരമായ വ്യത്യാസങ്ങൾ നിലനിൽക്കുന്നുണ്ട്. ഇറാനിലെ യുറേനിയം സമ്പുഷ്ടീകരണത്തിൽ അമേരിക്ക വിശ്വസിക്കുന്നില്ല. ഇതാണ് അവരുടെ നിലപാടെങ്കില്‍, ഒരു കരാറും ഉണ്ടാകില്ല,” ടെഹ്‌റാൻ സ്വന്തം മണ്ണിലെ യുറേനിയം സമ്പുഷ്ടീകരണം പൂർണ്ണമായും നിർത്തണമെന്ന യുഎസ് ഉദ്യോഗസ്ഥരുടെ സമീപകാല ആവശ്യങ്ങളോട് പ്രതികരിക്കവേയാണ് അരാഗ്ചി ഇത് പറഞ്ഞത്.
“എന്നാല്‍, ഇറാൻ ആണവായുധങ്ങളിലേക്ക് നീങ്ങുന്നത് തടയാൻ അവർ ശ്രമിച്ചാൽ, അത് നേടിയെടുക്കാൻ കഴിയും. ഞങ്ങൾ ആണവായുധങ്ങൾ തേടുന്നില്ല,” അദ്ദേഹം കൂട്ടിച്ചേർത്തു.
2015-ൽ ഇറാനും മറ്റ് നിരവധി രാജ്യങ്ങളും തമ്മിൽ ഒപ്പുവച്ച ആണവ കരാർ ഇനി ഫലപ്രദമല്ലെന്ന് അരഗ്ചി ചൂണ്ടിക്കാട്ടി, “എന്നാൽ കരാർ മരിച്ചുവെന്ന് അർത്ഥമാക്കുന്നില്ല”, ഔദ്യോഗികമായി സംയുക്ത സമഗ്ര പ്രവർത്തന പദ്ധതി എന്നറിയപ്പെടുന്ന കരാർ പുനരുജ്ജീവിപ്പിക്കാൻ കഴിയുമെന്ന് അദ്ദേഹം കൂട്ടിച്ചേർത്തു.
എന്തുതന്നെയായാലും, യുറേനിയം സമ്പുഷ്ടീകരണം ഉൾപ്പെടെയുള്ള ആണവ പദ്ധതികൾ ഇറാൻ ഉപേക്ഷിക്കില്ലെന്ന് അരഗ്ചി ഊന്നിപ്പറഞ്ഞു.
ഏപ്രിൽ മുതൽ ഇറാനും യുഎസും ടെഹ്‌റാന്റെ ആണവ പദ്ധതിയെക്കുറിച്ചും യുഎസ് ഉപരോധങ്ങൾ നീക്കുന്നതിനെക്കുറിച്ചും നാല് റൗണ്ട് പരോക്ഷ ചർച്ചകൾ നടത്തി.
അടുത്തിടെ, ഇറാൻ യുറേനിയം സമ്പുഷ്ടീകരണ പ്രവർത്തനങ്ങൾ പൂർണ്ണമായും നിർത്തണമെന്ന് യുഎസ് ഉദ്യോഗസ്ഥർ ആവർത്തിച്ച് ആവശ്യപ്പെട്ടിരുന്നു. എന്നാൽ, ടെഹ്‌റാൻ ഈ അഭ്യർത്ഥന ശക്തമായി നിരസിച്ചു, ഈ വിഷയം “ചർച്ചയ്ക്ക് വിധേയമല്ല” എന്ന് വാദിക്കുകയും ചെയ്തു.
ഇറാനുമായുള്ള ഒരു സാധ്യതയുള്ള കരാറിനെക്കുറിച്ച് യുഎസ് പ്രസിഡന്റ് ഡൊണാൾഡ് ട്രംപും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ചർച്ച നടത്തിയതായും അത് ശരിയായ ദിശയിൽ നീങ്ങുന്നുണ്ടെന്ന് പ്രസിഡന്റ് വിശ്വസിക്കുന്നതായും വൈറ്റ് ഹൗസ് നേരത്തെ പറഞ്ഞിരുന്നു.
“പ്രസിഡന്റ് എന്നോട് പറഞ്ഞതുപോലെ, നിങ്ങളോട് എല്ലാവരോടും പറഞ്ഞതുപോലെ, ഇറാനുമായുള്ള ഈ കരാർ രണ്ട് തരത്തിൽ അവസാനിക്കാം. അത് വളരെ പോസിറ്റീവ് നയതന്ത്ര പരിഹാരത്തിൽ അവസാനിച്ചേക്കാം, അല്ലെങ്കിൽ ഇറാന് വളരെ നെഗറ്റീവ് സാഹചര്യത്തിൽ അവസാനിച്ചേക്കാം. അതുകൊണ്ടാണ് ഈ ആഴ്ച അവസാനം ഈ ചർച്ചകൾ നടക്കുന്നത്,” ലീവിറ്റ് പറഞ്ഞു.
2018-ൽ, തന്റെ ആദ്യ ടേമിൽ, പ്രസിഡന്റ് ട്രംപ് ഇറാനും ആറ് ലോകശക്തികളും തമ്മിൽ 2015-ൽ ഉണ്ടാക്കിയ ആണവ കരാറിൽ നിന്ന് അമേരിക്കയെ പിന്‍‌വലിച്ചു.
“മെച്ചപ്പെട്ട” കരാറിനായുള്ള വ്യവസ്ഥകൾ വീണ്ടും ചർച്ച ചെയ്യാൻ ഇറാനെ നിർബന്ധിക്കുന്നതിനായി ട്രംപ് ഭരണകൂടം “പരമാവധി സമ്മർദ്ദം” ചെലുത്തുന്ന ഒരു പ്രചാരണം നടത്തി. എന്നാല്‍, അദ്ദേഹത്തിന്റെ ആദ്യ കാലാവധി അവസാനിക്കുന്നതിന് മുമ്പ് ഇറാനെ ചർച്ചാ മേശയിലേക്ക് തിരികെ കൊണ്ടുവരുന്നതിൽ ആ ശ്രമം വിജയിച്ചില്ല.
ഇപ്പോൾ, വീണ്ടും അധികാരമേറ്റ ശേഷം, ട്രംപ് ഒരു പുതിയ കരാർ ഉണ്ടാക്കാൻ തീവ്രമായി ശ്രമിക്കുകയാണ്. ക്രിയാത്മകമായി ഇടപെടാൻ വിസമ്മതിക്കുന്നത് സൈനിക പ്രത്യാഘാതങ്ങൾക്ക് കാരണമാകുമെന്ന് പറഞ്ഞുകൊണ്ട് അദ്ദേഹം ഇറാനെ ഭീഷണിപ്പെടുത്തുകയാണ്. അതായത് സമ്മര്‍ദ്ദ തന്ത്രവും ഭീഷണിയും ഉപയോഗിച്ച് കാര്യം സാധിപ്പിച്ചെടുക്കുന്ന ട്രം‌പിന്റെ പതിവ് അടവ് നയം.
