190 മില്യൺ പൗണ്ട് വിലമതിക്കുന്ന അൽ-ഖാദിർ ട്രസ്റ്റ് കേസിൽ 2023 ഓഗസ്റ്റ് മുതൽ ജയിലിൽ കഴിയുന്ന ഇമ്രാൻ ഖാനും ഭാര്യ ബുഷ്‌റ ബീബിക്കും എതിരായ ശിക്ഷ താൽക്കാലികമായി നിർത്തിവയ്ക്കണമെന്ന ഹർജി ഇസ്ലാമാബാദ് ഹൈക്കോടതി (ഐഎച്ച്‌സി) ജൂൺ 11 ന് പരിഗണിക്കും.
മുൻ പ്രധാനമന്ത്രി ഇമ്രാൻ ഖാന് ജൂൺ 11 ന് ജാമ്യം ലഭിച്ചേക്കുമെന്ന് മുതിർന്ന പാകിസ്ഥാൻ തെഹ്‌രീക്-ഇ-ഇൻസാഫ് (പിടിഐ) നേതാവ് ഗോഹർ അലി ഖാൻ അവകാശപ്പെട്ടു. ആർമി ചീഫ് ജനറൽ അസിം മുനീർ സമ്മർദ്ദത്തിന് വഴങ്ങിയേക്കാമെന്ന സൂചനകളോടെയാണ് പ്രസ്താവന. 190 മില്യൺ പൗണ്ട് അൽ-ഖാദിർ ട്രസ്റ്റ് കേസിൽ 2023 ഓഗസ്റ്റ് മുതൽ ജയിലിൽ കഴിയുന്ന ഇമ്രാൻ ഖാനും ഭാര്യ ബുഷ്‌റ ബീബിക്കും എതിരായ ശിക്ഷ താൽക്കാലികമായി നിർത്തിവയ്ക്കണമെന്ന ഹർജി ഇസ്ലാമാബാദ് ഹൈക്കോടതി (ഐഎച്ച്‌സി) ജൂൺ 11 ന് പരിഗണിക്കും. “ജൂൺ 11 ഇമ്രാൻ ഖാനും ഭാര്യയ്ക്കും ഒരു പ്രധാന ദിവസമായിരിക്കും” എന്ന് ഗോഹർ അലി ഖാൻ പറഞ്ഞതായി കറാച്ചി ആസ്ഥാനമായ ഒരു മാധ്യമം റിപ്പോര്‍ട്ട് ചെയ്തു.
പി.ടി.ഐയുടെ രക്ഷാധികാരിയായി സ്വയം നിയമിക്കുകയും ജയിലിൽ നിന്ന് രാജ്യവ്യാപകമായി പ്രതിഷേധം നയിക്കുമെന്ന് പ്രതിജ്ഞയെടുക്കുകയും ചെയ്ത ഇമ്രാൻ ഖാൻ അടുത്തിടെ നടത്തിയ പ്രഖ്യാപനത്തിന് പിന്നാലെയാണ് ഗോഹറിന്റെ അവകാശവാദം. സൈനികരെയും സർക്കാർ സംവിധാനങ്ങളെയും “മാൻഡേറ്റ് കള്ളന്മാർ” എന്ന് വിശേഷിപ്പിച്ചുകൊണ്ട് വൻ പ്രക്ഷോഭത്തിന് തയ്യാറെടുക്കാൻ ഖാൻ നിർദ്ദേശിച്ചു. ഭാര്യയുടെ 14 മാസത്തെ തടവിന് ജനറൽ അസിം മുനീർ വ്യക്തിപരമായി പ്രതികാരം ചെയ്തതായി ഇമ്രാൻ ആരോപിച്ചു, “ബുഷ്‌റ ബീബിയുടെ അന്യായമായ തടവിനും ജയിലിൽ മനുഷ്യത്വരഹിതമായ പെരുമാറ്റത്തിനും പിന്നിൽ അസിം മുനീറിന്റെ പ്രതികാര സ്വഭാവമാണ്” എന്ന് ഇമ്രാൻ പറഞ്ഞു. ഖാന്റെ മോചനത്തിനായുള്ള പോരാട്ടം പി.ടി.ഐ ശക്തമാക്കി, ഒരു വിട്ടുവീഴ്ചയും നിരസിച്ചു.
26 പേർ കൊല്ലപ്പെട്ട, ഏപ്രിൽ 22-ലെ പഹൽഗാം ഭീകരാക്രമണത്തിന് മറുപടിയായി പാക്കിസ്താന്‍, പാക് അധീന ജമ്മു കശ്മീരിലെ ഭീകര ക്യാമ്പുകൾക്കു നേരെ ഇന്ത്യ നടത്തിയ ഓപ്പറേഷൻ സിന്ദൂർ, പാക് സൈന്യത്തിന്റെ തന്ത്രപരമായ ബലഹീനതകൾ തുറന്നുകാട്ടുകയും മുനീറിന്റെ പ്രതിച്ഛായയ്ക്ക് മങ്ങലേൽപ്പിക്കുകയും ചെയ്തു. തുടർന്ന് മുനീറിന് ഫീൽഡ് മാർഷൽ പദവി നൽകി, ഇത് പലരും മുഖം രക്ഷിക്കാനുള്ള നീക്കമായി കണക്കാക്കുന്നു. പൊതുജന പിന്തുണയും പി.ടി.ഐ പ്രസ്ഥാനവും സൈന്യത്തിന് മേൽ സമ്മർദ്ദം വർദ്ധിപ്പിച്ചു.
ഗോഹറിന്റെ അവകാശവാദം മുനീറിന്റെ പിൻവാങ്ങലിന്റെ സൂചനയായിരിക്കാം അല്ലെങ്കിൽ അത് ഒരു സൈനിക തന്ത്രത്തിന്റെ ഭാഗമാകാം. റാവൽപിണ്ടിയിലെ അഡിയാല ജയിലിൽ കഴിയുന്ന 72 കാരനായ ഇമ്രാൻ ഖാൻ തന്റെ അറസ്റ്റ് നിയമവിരുദ്ധമാണെന്നാണ് അവകാശപ്പെടുന്നത്. ജൂൺ 11 ന് നടക്കുന്ന വാദം കേൾക്കൽ പാക്കിസ്താന്റെ രാഷ്ട്രീയ ചിത്രം മാറ്റിയേക്കാം.
