ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനോട് ആക്രമണങ്ങൾ നിർത്താൻ യുഎസ് പ്രസിഡന്റ് ഡൊണാൾഡ് ട്രംപ് ആവശ്യപ്പെടുകയും, ഇസ്രായേൽ തങ്ങളുടെ പൈലറ്റുമാരെ നാട്ടിലേക്ക് തിരികെ വിളിക്കണമെന്നും ബോംബുകൾ ഇടുന്നത് നിർത്തണമെന്നും നിര്‍ദ്ദേശിച്ചെങ്കിലും ഇസ്രായേല്‍ അത് അവഗണിച്ച് ഇറാന്റെ തലസ്ഥാനമായ ടെഹ്‌റാനിലെ റഡാർ സൈറ്റിൽ വ്യോമാക്രമണം നടത്തിയതായി ഇസ്രായേൽ മാധ്യമങ്ങൾ റിപ്പോർട്ട് ചെയ്തു. ഇസ്രായേൽ ആർമി റേഡിയോ ആക്രമണം സ്ഥിരീകരിച്ചു.
ഇറാനെതിരായ ആക്രമണങ്ങൾ നിർത്തണമെന്ന് യുഎസ് പ്രസിഡന്റ് ഡൊണാൾഡ് ട്രംപ് ഇസ്രായേലിനോട് അഭ്യർത്ഥിച്ച് മണിക്കൂറുകൾക്ക് ശേഷമാണ് ആക്രമണം നടത്തിയതെന്ന് വാർത്താ ഏജൻസിയായ മിസാനും ദിനപത്രമായ ഷാർഗും റിപ്പോർട്ട് ചെയ്തു. ചൊവ്വാഴ്ച പുലർച്ചെ പ്രഖ്യാപിച്ച വെടിനിർത്തലിന് ശേഷമാണ് ആക്രമണം നടത്തിയത്. ഇതിനുപുറമെ, ടെഹ്‌റാനിൽ നിന്ന് ഏകദേശം 200 കിലോമീറ്റർ അകലെ കാസ്പിയൻ കടലിന്റെ തീരത്ത് സ്ഥിതി ചെയ്യുന്ന ബാബോൾ, ബാബോൽസർ നഗരങ്ങളിലും സ്ഫോടന ശബ്ദങ്ങൾ കേട്ടു, അവിടെ വ്യോമ പ്രതിരോധ സംവിധാനം സജീവമാക്കിയിട്ടുണ്ട്.
ചൊവ്വാഴ്ച പുലർച്ചെ, യുഎസ് പ്രസിഡന്റ് ഡൊണാൾഡ് ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിൽ, 12 ദിവസത്തെ യുദ്ധത്തിനുശേഷം ഇസ്രായേലും ഇറാനും വെടിനിർത്തലിന് സമ്മതിച്ചതായി പ്രഖ്യാപിച്ചു. ഖത്തർ മധ്യസ്ഥത വഹിച്ച വെടിനിർത്തൽ, മിഡിൽ ഈസ്റ്റിലെ സമാധാനത്തിലേക്കുള്ള ഒരു പ്രധാന ചുവടുവയ്പ്പായി ട്രംപ് അതിനെ വിശേഷിപ്പിച്ചു.
എന്നാല്‍, വെടിനിർത്തൽ കരാര്‍ ആരംഭിച്ച് രണ്ടര മണിക്കൂറിനുശേഷം ഇറാൻ തങ്ങളുടെ നേരെ മിസൈൽ ആക്രമണം നടത്തിയതായി ഇസ്രായേൽ അവകാശപ്പെട്ടതോടെ കരാർ പ്രശ്‌നത്തിലായി. ഈ ആക്രമണങ്ങളിൽ നാല് പേർ കൊല്ലപ്പെട്ടതായി റിപ്പോർട്ടുണ്ട്. മറുപടിയായി, ഇസ്രായേൽ ഇറാനിൽ വ്യോമാക്രമണം നടത്തി, അതിൽ ഒരു പ്രമുഖ ഇറാനിയൻ ആണവ ശാസ്ത്രജ്ഞൻ കൊല്ലപ്പെട്ടതായി അവകാശപ്പെട്ടു.
