മൊബൈൽ ആപ്പിൽ ലൈംഗിക ബന്ധം ലൈവ് സ്ട്രീം ചെയ്തതായി ആരോപിച്ച് ദമ്പതികളെ ഹൈദരാബാദ് പോലീസ് വ്യാഴാഴ്ച അറസ്റ്റ് ചെയ്തു. വെള്ളിയാഴ്ച നടന്ന ചോദ്യം ചെയ്യലിൽ, സാമ്പത്തിക ബുദ്ധിമുട്ടുകളും പെൺമക്കളുടെ കോളേജ് ഫീസ് അടയ്ക്കാനുമാണ് തങ്ങളെ ഈ കടുത്ത നടപടിയിലേക്ക് തള്ളിവിട്ടതെന്ന് ദമ്പതികൾ പറഞ്ഞു. ആംബർപേട്ടിലെ മല്ലികാർജുന നഗറിലെ അവരുടെ വീട്ടിൽ നിന്ന് ഹൈ-ഡെഫനിഷൻ ക്യാമറകൾ ഉൾപ്പെടെ നിരവധി വസ്തുക്കൾ പോലീസ് പിടിച്ചെടുത്തു.
പഠനത്തിൽ മിടുക്കികളായ രണ്ട് പെൺമക്കളുടെ കോളേജ് ഫീസ് അടയ്ക്കാൻ ദമ്പതികൾക്ക് കഴിഞ്ഞില്ലെന്ന് റിപ്പോർട്ട് പറയുന്നു. ഒരു മകൾ ബി.ടെക് രണ്ടാം വർഷവും, മറ്റേ മകൾ അടുത്തിടെ ഇന്റർമീഡിയറ്റ് പരീക്ഷയിൽ 470 ൽ 468 മാർക്ക് നേടി കോളേജിൽ പ്രവേശനം നേടാൻ തയ്യാറെടുക്കുകയുമാണ്. ഓട്ടോ ഡ്രൈവറായ 41 വയസ്സുള്ള ഭര്‍ത്താവും വീട്ടമ്മയായ 37 വയസ്സുള്ള ഭാര്യയും ലൈംഗിക ബന്ധത്തിലേര്‍പ്പെട്ട് തത്സമയ സംപ്രേക്ഷണം ചെയ്യുന്ന സമയത്ത് മുഖംമൂടി ധരിച്ച് തങ്ങളുടെ വ്യക്തിത്വം മറച്ചുവെച്ചതായി പോലീസ് പറഞ്ഞു.
പോലീസ് പറയുന്നതനുസരിച്ച്, ദമ്പതികൾ ലൈവ് സ്ട്രീം 2,000 രൂപയ്ക്കും റെക്കോർഡു ചെയ്‌ത വീഡിയോകൾ 500 രൂപയ്ക്കും വിറ്റു. ഇതില്‍ നിന്ന് ഓട്ടോ ഡ്രൈവറായ ഭർത്താവിന്റെ ജോലിയേക്കാൾ കൂടുതൽ സമ്പാദിച്ചു എന്ന് പോലീസ് പറഞ്ഞു. ഭർത്താവ് ഹൈ-ഡെഫനിഷൻ ക്യാമറകൾ ഉപയോഗിച്ച് വീഡിയോകൾ റെക്കോർഡുചെയ്‌തു, തന്റെ ഐഡന്റിറ്റി മറയ്ക്കാൻ മുഖംമൂടി ധരിച്ചിരുന്നു. ഒരു റിപ്പോർട്ട് അനുസരിച്ച്, കഴിഞ്ഞ കുറച്ച് മാസങ്ങളായി ഇവര്‍ ഇത്തരത്തിലുള്ള വീഡിയോകള്‍ നിര്‍മ്മിച്ചു വരികയായിരുന്നു, ജൂൺ 17 ന് ലൈവ് സ്ട്രീമിംഗ് നടത്തുന്നതിനിടെയാണ് ദമ്പതികൾ പിടിക്കപ്പെട്ടത്.
ചോദ്യം ചെയ്യലിൽ, പെട്ടെന്ന് പണം സമ്പാദിക്കാനാണ് ഈ വഴി തിരഞ്ഞെടുത്തതെന്ന് ദമ്പതികൾ സമ്മതിച്ചു. ലഭിച്ച വിവരങ്ങളുടെ അടിസ്ഥാനത്തിൽ, അർദ്ധനഗ്നരായി തത്സമയ സംപ്രേഷണത്തിന് തയ്യാറെടുക്കുകയായിരുന്ന അവരുടെ വീട് ഈസ്റ്റ് സോൺ ടാസ്‌ക് ഫോഴ്‌സ് റെയ്ഡ് ചെയ്തു. ഫോണുകൾ, ട്രൈപോഡുകൾ, പണമിടപാട് രേഖകൾ എന്നിവ പോലീസ് പിടിച്ചെടുത്തു. വിവരസാങ്കേതിക നിയമത്തിലെ പ്രസക്തമായ വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ട്, വീഡിയോ വാങ്ങിയവർക്ക് നോട്ടീസ് അയച്ചിട്ടുണ്ട്.
