ന്യൂഡൽഹി: ലൈവ്-ഇൻ പങ്കാളിയായ ശ്രദ്ധ വാക്കറിനെ കൊലപ്പെടുത്തി ശരീരം ഒന്നിലധികം കഷണങ്ങളാക്കിയ കേസിൽ പ്രതിയായ അഫ്താബ് അമിൻ പൂനാവാലയെ പോളിഗ്രാഫ് പരിശോധനയ്ക്കായി തിങ്കളാഴ്ച വീണ്ടും രോഹിണിയിലെ ഫോറൻസിക് സയൻസ് ലബോറട്ടറിയിലേക്ക് (എഫ്എസ്എൽ) കൊണ്ടുപോകും. ഞായറാഴ്ച എഫ്എസ്എല്ലിൽ എത്തിച്ചെങ്കിലും പോളിഗ്രാഫ് പരിശോധന പൂർത്തിയാക്കാനായില്ല.
ശേഷിക്കുന്ന പോളിഗ്രാഫ് പരിശോധന തിങ്കളാഴ്ച നടത്തും. കുറച്ച് കാര്യങ്ങൾ ഇനിയും പൂർത്തിയാക്കാനുണ്ട്. ഒരു നാർക്കോ ടെസ്റ്റിന് പോളിഗ്രാഫ് ടെസ്റ്റ് നിർബന്ധമാണ്, ”രോഹിണി എഫ്എസ്എൽ അസിസ്റ്റന്റ് പിആർഒ രജനീഷ് കുമാർ സിംഗ് പറഞ്ഞു.
ചൊവ്വാഴ്ചയാണ് അഫ്താബിന്റെ പോളിഗ്രാഫ് പരിശോധന ആരംഭിച്ചത്. എന്നാൽ, ആരോഗ്യസ്ഥിതി കണക്കിലെടുത്ത് പരിശോധന മാറ്റിവച്ചു.
കൊലപാതക ഗൂഢാലോചന മുഴുവനായും പുറത്തെടുക്കാൻ അഫ്താബിനോട് പോലീസ് 50 ഓളം ചോദ്യങ്ങൾ ചോദിക്കുന്നുണ്ടെന്നാണ് റിപ്പോർട്ട്. ശനിയാഴ്ച ഡൽഹി കോടതി അഫ്താബിനെ 14 ദിവസത്തെ ജുഡീഷ്യൽ കസ്റ്റഡിയിൽ വിട്ടിരുന്നു.
നവംബർ 22 ന് നടന്ന അവസാന വാദത്തിനിടെ, വാക്കർ തന്നെ പ്രകോപിപ്പിച്ചതായി അഫ്താബ് കോടതിയെ അറിയിച്ചിരുന്നുവെങ്കിലും അതിനുശേഷം നിശബ്ദനായി.
“അന്വേഷണത്തോട് താൻ സഹകരിക്കുന്നുണ്ടെന്ന് അഫ്താബ് കോടതിയെ അറിയിച്ചു. എന്നാൽ, തനിക്ക് എല്ലാം ഒറ്റയടിക്ക് ഓർക്കാൻ കഴിയുന്നില്ലെന്നും പ്രകോപിതനായതിനാലാണ് ശ്രദ്ധയെ കൊലപ്പെടുത്തേണ്ടി വന്നതെന്നും ജഡ്ജിയോട് പറഞ്ഞു,” അഫ്താബിന്റെ അഭിഭാഷകൻ അവിനാഷ് കുമാർ പറഞ്ഞു.
2018ൽ ബംബിൾ എന്ന ഡേറ്റിംഗ് ആപ്പ് വഴിയാണ് ശ്രദ്ധയും അഫ്താബും കണ്ടുമുട്ടിയത്. ഈ വർഷം മെയ് 8 ന് അവർ ഡൽഹിയിലേക്ക് വന്നു. മെയ് 15 ന് ഛത്തർപൂർ മേഖലയിലേക്ക് താമസം മാറി. മെയ് 18 ന്, അഫ്താബ് ശ്രദ്ധയെ കൊലപ്പെടുത്തിയ ശേഷം ശരീരം 35 കഷണങ്ങളാക്കി 18 ദിവസത്തിനുള്ളിൽ വിവിധ സ്ഥലങ്ങളിൽ സംസ്കരിച്ചു എന്നാണ് കുറ്റം.
ഇരട്ട ജീവിതം നയിക്കുന്ന, നരഹത്യ പ്രവണതയുള്ള ഒരു മനുഷ്യന്റെ കഥ പറയുന്ന അമേരിക്കൻ ക്രൈം ഷോയായ ‘ഡെക്‌സ്റ്റർ’
അഫ്താബിനെ പ്രചോദിപ്പിച്ചതായി റിപ്പോർട്ടുണ്ട്.
