ഹൂസ്റ്റൺ, ടെക്സസ്: ഹൂസ്റ്റൺ സെന്റ് പീറ്റേഴ്സ് മലങ്കര കത്തോലിക്കാ ദേവാലയത്തിൽ ഒരാഴ്ച നീണ്ടുനിന്ന വിശുദ്ധ വാര കർമ്മങ്ങൾ ഈസ്റ്റർ ദിനത്തിൽ സമുചിതമായ ആഘോഷങ്ങളോടെ സമാപിച്ചു. ഇടവകാംഗങ്ങളുടെ വലിയ പങ്കാളിത്തത്തോടെ നടന്ന ശുശ്രൂഷകൾ വിശ്വാസത്തിന്റെയും ഐക്യത്തിന്റെയും ഉജ്ജ്വല സാക്ഷ്യമായി മാറി.
യേശുക്രിസ്തുവിന്റെ പുനരുത്ഥാനത്തിന്റെ സന്തോഷത്തിൽ ഊന്നിയായിരുന്നു ഈസ്റ്റർ ആഘോഷങ്ങൾ. പ്രത്യാശയുടെയും പുതിയ ജീവന്റെയും മരണത്തിന്മേലുള്ള വിജയത്തിന്റെയും സന്ദേശങ്ങൾ വിശ്വാസികൾക്കിടയിൽ പങ്കുവെക്കപ്പെട്ടു. “മിശിഹാ ഉയിർത്തെഴുന്നേറ്റു! സത്യമായും അവൻ ഉയിർത്തെഴുന്നേറ്റു!” എന്ന ആശംസകളോടെ വിശ്വാസികൾ പരസ്പരം സ്നേഹവും ഈസ്റ്റർ മംഗളങ്ങളും കൈമാറി.
ഈസ്റ്റർ സന്ദേശം നൽകിക്കൊണ്ട് ബിഷപ്പ് ഡോ. ഫിലിപ്പോസ് മാർ സ്റ്റേഫാനോസ് സംസാരിച്ചു. യേശുക്രിസ്തുവിന്റെ ജീവിതവും മരണവും പുനരുത്ഥാനവും കേവലം ഒരു കെട്ടുകഥയല്ല, മറിച്ച് ചരിത്രപരമായ യാഥാർത്ഥ്യവും ക്രൈസ്തവ വിശ്വാസത്തിന്റെ അടിസ്ഥാന സത്യവുമാണെന്ന് അദ്ദേഹം ഓർമ്മിപ്പിച്ചു. ക്രിസ്തു ഉയിർത്തെഴുന്നേറ്റില്ലെങ്കിൽ നമ്മുടെ വിശ്വാസം വ്യർത്ഥമാണെന്ന് അദ്ദേഹം ചൂണ്ടിക്കാട്ടി. പാപത്തെയും മരണത്തെയും ജയിച്ച ക്രിസ്തുവിന്റെ പുനരുത്ഥാനം കൃപയുടെ ഉറവിടമാണെന്നും സഭയുടെ നിലനിൽപ്പും പ്രബോധനങ്ങളും ഈ സത്യത്തിൽ അധിഷ്ഠിതമാണെന്നും അദ്ദേഹം കൂട്ടിച്ചേർത്തു.
ക്രിസ്തുവിന്റെ മരണത്തിലൂടെയും പുനരുത്ഥാനത്തിലൂടെയും മനുഷ്യത്വം ദൈവകൃപയാൽ രൂപാന്തരപ്പെട്ടുവെന്നും നമ്മൾ ദൈവമക്കളായി ഉയർത്തപ്പെട്ടുവെന്നും ബിഷപ്പ് ഓർമ്മിപ്പിച്ചു. ജീവിതത്തിലെ സാമ്പത്തികമോ, കുടുംബപരമോ, ഔദ്യോഗികമോ ആയ ഏതു പ്രതിസന്ധികളിലും ദൈവകൃപയുടെ സാന്നിധ്യം അനിവാര്യമാണ്. പാപവും ബലഹീനതകളും നിറഞ്ഞ മനുഷ്യജീവിതത്തിൽ യഥാർത്ഥ സന്തോഷവും ശാന്തിയും നൽകാൻ ക്രിസ്തുവിനു മാത്രമേ സാധിക്കൂ എന്ന് അദ്ദേഹം ഓർമ്മിപ്പിച്ചു.
പുനരുത്ഥാന സന്ദേശം വിശ്വാസികളുടെ ആത്മീയവും ധാർമ്മികവുമായ ജീവിതത്തെ സ്വാധീനിക്കണമെന്നും ആധുനിക ലോകത്ത് അർത്ഥവത്തായ രീതിയിൽ ജീവിക്കാൻ പരിശ്രമിക്കണമെന്നും അദ്ദേഹം ആഹ്വാനം ചെയ്തു. വിശുദ്ധ കുർബാനയിലുള്ള പങ്കാളിത്തം ദുഃഖത്തിന്റെയല്ല, മറിച്ച് ഉത്ഥിതനായ ക്രിസ്തുവുമായുള്ള സംഗമത്തിന്റെ സന്തോഷമാണ് നൽകേണ്ടതെന്നും ബിഷപ്പ് പറഞ്ഞു.
ശനിയാഴ്ച രാത്രി 7:00 മണിക്ക് ആരംഭിച്ച തിരുക്കർമ്മങ്ങളിൽ പ്രത്യേക ഈസ്റ്റർ ശുശ്രൂഷകൾ, ഭക്തിനിർഭരമായ റാസ (പ്രദക്ഷിണം), സ്നേഹവിരുന്ന് എന്നിവ ഉൾപ്പെട്ടിരുന്നു. വികാരി ഫാ. ബിന്നി ഫിലിപ്പിന്റെ നേതൃത്വത്തിൽ സെക്രട്ടറി സാലു സാമുവൽ, ട്രസ്റ്റി ഗീവർഗീസ് ജോർജ്, പാസ്റ്ററൽ കൗൺസിൽ അംഗങ്ങൾ, ഇടവക കമ്മിറ്റി എന്നിവർ വിശുദ്ധ വാര ആഘോഷങ്ങൾക്ക് ക്രമീകരണങ്ങൾ ഒരുക്കി.
വിശ്വാസികളുടെ സജീവ പങ്കാളിത്തം കൊണ്ട് ഈ വർഷത്തെ ഈസ്റ്റർ ആഘോഷങ്ങൾ ആത്മീയ ചൈതന്യം നിറഞ്ഞതും അവിസ്മരണീയവുമായ ഒന്നായി മാറി.
