റഷ്യയിൽ നിന്ന് എണ്ണയും പ്രകൃതിവാതകവും വാങ്ങുന്ന രാജ്യങ്ങൾക്കെതിരെ 100 ശതമാനം വരെ താരിഫ് ചുമത്താൻ യുഎസ് പ്രസിഡന്റിന് അധികാരം നൽകുന്നതാണ് ബില്ലിലെ പ്രധാന വ്യവസ്ഥ. എന്നാൽ ഇന്ത്യയ്ക്ക് 100% താരിഫ് ഏർപ്പെടുത്തിയെന്നോ അത് ഉറപ്പായെന്നോ ഇതുവരെ പറയാനാവില്ല.
വാഷിംഗ്ടൺ: റഷ്യയിൽ നിന്ന് ഊർജം വാങ്ങുന്ന ഇന്ത്യ ഉൾപ്പെടെയുള്ള രാജ്യങ്ങൾക്കെതിരെ കടുത്ത വ്യാപാര നടപടികൾക്ക് വഴിയൊരുക്കുന്ന റഷ്യ-ഇറാൻ ഉപരോധ ബിൽ യുഎസ് പ്രതിനിധി സഭയിൽ നിർണായക നടപടിക്രമ ഘട്ടം കടന്നു. 214 പേർ അനുകൂലിച്ചപ്പോൾ 211 പേർ എതിർത്തു. ഇതോടെ ബിൽ അന്തിമ വോട്ടെടുപ്പിലേക്ക് നീങ്ങുന്നതിനുള്ള വഴി തുറന്നു.
രണ്ട് ഡെമോക്രാറ്റിക് അംഗങ്ങൾ പാർട്ടി നിലപാടിൽ നിന്ന് മാറി നിർദേശത്തെ പിന്തുണച്ചതോടെയാണ് നടപടി നേരിയ ഭൂരിപക്ഷത്തിൽ അംഗീകരിക്കപ്പെട്ടത്.
റഷ്യയിൽ നിന്ന് അസംസ്കൃത എണ്ണയോ പ്രകൃതിവാതകമോ വാങ്ങുന്ന പ്രധാന രാജ്യങ്ങളിൽ നിന്നുള്ള ഇറക്കുമതിക്ക് 100 ശതമാനം വരെ താരിഫ് ചുമത്താൻ യുഎസ് പ്രസിഡന്റിന് അധികാരം നൽകുന്നതാണ് ബില്ലിലെ ശ്രദ്ധേയമായ വ്യവസ്ഥ.
ഇന്ത്യയ്ക്കൊപ്പം ചൈന, തുർക്കി, അസർബൈജാൻ, ഹംഗറി, സ്ലൊവാക്യ, യുഎഇ, സിംഗപ്പൂർ, കസാക്കിസ്ഥാൻ, കിർഗിസ്ഥാൻ തുടങ്ങിയ രാജ്യങ്ങളെയും സാധ്യതയുള്ള നടപടികളുടെ പരിധിയിൽ ഉൾപ്പെടുത്തുന്ന നിർദേശമുണ്ട്.
എന്നാൽ ബിൽ നിയമമായാൽ ഈ രാജ്യങ്ങൾക്ക് ഉടൻ 100 ശതമാനം താരിഫ് നിലവിൽ വരുമെന്ന് അർഥമില്ല. താരിഫ് ഏർപ്പെടുത്തണമോ, എത്ര നിരക്കിൽ ഏർപ്പെടുത്തണമോ എന്നത് നിയമത്തിലെ വ്യവസ്ഥകളും പ്രസിഡന്റിന്റെ തുടർനടപടികളും അനുസരിച്ചായിരിക്കും.
യുഎസ് സെനറ്റ് നേരത്തെ 86-11 എന്ന വോട്ടുനിലയിൽ ബിൽ പാസാക്കിയിരുന്നു. റഷ്യൻ ഉദ്യോഗസ്ഥർ, ധനകാര്യ സ്ഥാപനങ്ങൾ, ഊർജമേഖല എന്നിവയ്ക്കെതിരായ ഉപരോധങ്ങൾ ശക്തമാക്കുന്നതിനൊപ്പം റഷ്യയുടെ എണ്ണ വ്യാപാരവുമായി ബന്ധപ്പെട്ടതായി ആരോപിക്കപ്പെടുന്ന ‘ഷാഡോ ഫ്ലീറ്റ്’ കപ്പലുകൾക്കെതിരായ നടപടികളും നിർദേശത്തിലുണ്ട്.
റഷ്യൻ ഊർജ കയറ്റുമതിയിൽ നിന്നുള്ള വരുമാനം കുറയ്ക്കുന്നതിനായി എണ്ണയും വാതകവും വാങ്ങുന്ന രാജ്യങ്ങൾക്കുമേൽ അധിക സാമ്പത്തിക സമ്മർദ്ദം ചെലുത്തുകയാണ് ദ്വിതീയ താരിഫ് വ്യവസ്ഥകളുടെ ലക്ഷ്യം.
അതേസമയം, പ്രസിഡന്റിന് വിപുലമായ താരിഫ് അധികാരം നൽകുന്നതിനെതിരെ കോൺഗ്രസിനുള്ളിലും എതിർപ്പുണ്ട്. ഡെമോക്രാറ്റിക് അംഗം ഗ്രിഗറി മീക്സ് ഉൾപ്പെടെയുള്ള ചില നിയമനിർമാതാക്കൾ ദ്വിതീയ താരിഫ് വ്യവസ്ഥകൾക്കെതിരെ രംഗത്തെത്തിയിട്ടുണ്ട്.
ഇന്ത്യയെ സംബന്ധിച്ചിടത്തോളം 100 ശതമാനം താരിഫ് നിലവിൽ വന്നിട്ടില്ല. ബിൽ അന്തിമ നിയമനിർമാണ നടപടികൾ പൂർത്തിയാക്കി നിയമമാകുകയും തുടർന്ന് ബന്ധപ്പെട്ട വ്യവസ്ഥകൾ നടപ്പാക്കുകയും ചെയ്താൽ മാത്രമേ ഇന്ത്യയ്ക്കെതിരായ താരിഫിന്റെ കാര്യത്തിൽ വ്യക്തത വരൂ.
