വിദ്യാർഥികളെ പൊലീസ് ക്രൂരമായി മർദ്ദിച്ചെന്ന് ആരോപണം; ജില്ലാ പൊലീസ് മേധാവികളുടെ ഓഫീസുകളിലേക്ക് മാർച്ച്, വൈകിട്ട് അഞ്ചിന് സംസ്ഥാനവ്യാപക പ്രതിഷേധം
തിരുവനന്തപുരം: യൂണിവേഴ്‌സിറ്റി മെൻസ് ഹോസ്റ്റലിലുണ്ടായ സംഘർഷത്തിനും പിന്നാലെയുണ്ടായ പൊലീസ് ലാത്തിച്ചാർജിനും പിന്നാലെ പ്രതിഷേധം സംസ്ഥാനവ്യാപകമാക്കി എസ്എഫ്ഐ. വിദ്യാർഥികളെ പൊലീസ് മർദ്ദിച്ചെന്നാരോപിച്ച് ഇന്ന് (ഒക്ടോബർ 1) സംസ്ഥാനത്ത് പഠിപ്പുമുടക്ക് നടത്തുമെന്ന് എസ്എഫ്ഐ പ്രഖ്യാപിച്ചു.
പൊലീസ് നടപടിക്കെതിരെ എല്ലാ ജില്ലാ പൊലീസ് മേധാവികളുടെ ഓഫീസുകളിലേക്കും എസ്എഫ്ഐ ഇന്ന് മാർച്ച് നടത്തും. പൊലീസ്, യൂത്ത് കോൺഗ്രസ്, കെഎസ്‌യു പ്രവർത്തകരുടെ നടപടികളിൽ പ്രതിഷേധിച്ചാണ് മാർച്ച്. വൈകിട്ട് അഞ്ചിന് സംസ്ഥാനവ്യാപകമായി പ്രത്യേക പ്രതിഷേധ പരിപാടികളും സംഘടിപ്പിക്കുമെന്ന് എസ്എഫ്ഐ അറിയിച്ചു. ഇതോടെ യൂണിവേഴ്‌സിറ്റി ഹോസ്റ്റലിൽ ആരംഭിച്ച സംഘർഷത്തെ തുടർന്നുള്ള പ്രതിഷേധം തലസ്ഥാനത്തിന് പുറത്തേക്കും വ്യാപിക്കുകയാണ്.
ഇന്നലെ വൈകിട്ട് യൂത്ത് കോൺഗ്രസ് നടത്തിയ ‘റസിസ്റ്റൻസ് മാർച്ചിനിടെയാണ്’ സംഘർഷം രൂക്ഷമായത്. യൂത്ത് കോൺഗ്രസ് പ്രവർത്തകരും വിദ്യാർഥികളും തമ്മിലുള്ള ഏറ്റുമുട്ടലിനിടെ പൊലീസ് യൂണിവേഴ്‌സിറ്റി ഹോസ്റ്റലിൽ പ്രവേശിച്ച് ലാത്തിച്ചാർജ് നടത്തി. സംഭവത്തിൽ നിരവധി വിദ്യാർഥികൾക്ക് പരിക്കേറ്റു.
യൂത്ത് കോൺഗ്രസ് പ്രവർത്തകരും യൂണിവേഴ്‌സിറ്റി കോളേജിലെ വിദ്യാർഥികളും തമ്മിലുള്ള സംഘർഷം തലസ്ഥാന നഗരിയിൽ ഏറെ നേരം സംഘർഷാവസ്ഥ സൃഷ്ടിച്ചു.
മാർച്ചിനിടെ ഹോസ്റ്റലിൽനിന്ന് കല്ലുകളും കുപ്പികളും എറിഞ്ഞതാണ് സംഘർഷത്തിന് തുടക്കമിട്ടതെന്നാണ് യൂത്ത് കോൺഗ്രസിന്റെ ആരോപണം. എന്നാൽ യൂത്ത് കോൺഗ്രസ് പ്രവർത്തകരാണ് ആദ്യം പ്രകോപനം സൃഷ്ടിച്ചതെന്നാണ് ഹോസ്റ്റൽ വിദ്യാർഥികളുടെ വാദം.
യൂത്ത് കോൺഗ്രസ് മാർച്ചിനിടെ ചില പ്രവർത്തകർ ഹോസ്റ്റൽ വളപ്പിലേക്ക് പന്തം എറിഞ്ഞതായും ഇതിന് പിന്നാലെ വിദ്യാർഥികളുടെ ഭാഗത്തുനിന്ന് കല്ലേറുണ്ടായതായും ആരോപണമുണ്ട്. തുടർന്ന് കോളേജ് ക്യാമ്പസിൽ പ്രവേശിച്ച യൂത്ത് കോൺഗ്രസ് പ്രവർത്തകർ അവിടെ സ്ഥാപിച്ചിരുന്ന കൊടിതോരണങ്ങളും ബോർഡുകളും നശിപ്പിച്ചതായും ആരോപണം ഉയർന്നു. ഇതോടെയാണ് സംഘർഷം കൂടുതൽ രൂക്ഷമായത്. തുടർന്ന് പൊലീസ് ഹോസ്റ്റലിൽ പ്രവേശിച്ച് ലാത്തിച്ചാർജ് നടത്തുകയായിരുന്നു.
സംഘർഷം അവസാനിപ്പിക്കുന്നതിനായി പൊലീസിന്റെ നിർദേശപ്രകാരമാണ് തങ്ങൾ സ്ഥലത്തെത്തിയതെന്ന് എസ്എഫ്ഐ സംസ്ഥാന സെക്രട്ടറി പി.എസ്. സജീവ് പറഞ്ഞു. എന്നാൽ പൊലീസ് ഏകപക്ഷീയമായി ഹോസ്റ്റലിൽ പ്രവേശിച്ച് വിദ്യാർഥികളെ ക്രൂരമായി മർദ്ദിച്ചെന്നാണ് അദ്ദേഹത്തിന്റെ ആരോപണം.
ലാത്തിച്ചാർജിന്റെ പേരിൽ വിദ്യാർഥികളുടെ തലയ്ക്കുൾപ്പെടെ അടിച്ചെന്നും സംഘർഷത്തിന് പ്രകോപനം സൃഷ്ടിച്ചത് യൂത്ത് കോൺഗ്രസ് പ്രവർത്തകരാണെന്നും പി.എസ്. സജീവ് ആരോപിച്ചു. എസ്എഫ്ഐ പ്രവർത്തകരെ പൊലീസ് മർദ്ദിക്കുകയായിരുന്നുവെന്നും അദ്ദേഹം പറഞ്ഞു.
സംഘർഷം രൂക്ഷമായതിനെ തുടർന്ന് ക്രമസമാധാന ചുമതലയുള്ള എഡിജിപി പി. വിജയൻ സ്ഥലത്തെത്തി. പ്രവർത്തകരെ പിരിച്ചുവിട്ട ശേഷം പൊലീസ് നടപടിയുമായി ബന്ധപ്പെട്ട വിഷയങ്ങൾ ചർച്ച ചെയ്യാമെന്ന നിലപാടാണ് എഡിജിപി സ്വീകരിച്ചത്.
യൂണിവേഴ്‌സിറ്റി ഹോസ്റ്റലിൽ പൊലീസ് കയറി ലാത്തിച്ചാർജ് നടത്തിയ സംഭവത്തിൽ അന്വേഷണം ആവശ്യപ്പെട്ട് സിപിഎം നേതാക്കളും പ്രതിഷേധവുമായി രംഗത്തെത്തി. സിപിഎം സംസ്ഥാന സെക്രട്ടേറിയറ്റ് അംഗം വി. ശിവൻകുട്ടി, തിരുവനന്തപുരം ജില്ലാ സെക്രട്ടറി വി. ജോയ് എന്നിവരുടെ നേതൃത്വത്തിൽ നേതാക്കൾ റോഡിൽ കുത്തിയിരുന്ന് ഉപരോധിച്ചു.
പരിക്കേറ്റ വിദ്യാർഥികളുമായി പോയ ആംബുലൻസ് യൂത്ത് കോൺഗ്രസ് പ്രവർത്തകർ തടഞ്ഞിട്ടും പൊലീസ് ഇടപെട്ടില്ലെന്ന ആരോപണവും സിപിഎം നേതാക്കൾ ഉന്നയിച്ചു.
സംഭവവുമായി ബന്ധപ്പെട്ട് ഇരുവിഭാഗവും പരസ്പരം ഗുരുതര ആരോപണങ്ങളാണ് ഉന്നയിക്കുന്നത്. പൊലീസ് നടപടിക്കെതിരായ എസ്എഫ്ഐയുടെ സംസ്ഥാനവ്യാപക പ്രതിഷേധത്തോടെ യൂണിവേഴ്‌സിറ്റി ഹോസ്റ്റൽ സംഘർഷം ഇന്ന് കൂടുതൽ രാഷ്ട്രീയ ചർച്ചകൾക്ക് വഴിവയ്ക്കുമെന്നാണ് സൂചന.
