തിരുവനന്തപുരം: അധികാരത്തിലെത്തുന്നതിന് മുമ്പ് പ്രഖ്യാപിച്ച ചെലവുചുരുക്കൽ നിലപാടുകളിൽനിന്ന് വ്യതിചലിച്ച് മന്ത്രിമാരുടെ ഔദ്യോഗിക വസതികളുടെ നവീകരണത്തിനും സൗന്ദര്യവൽക്കരണത്തിനുമായി യുഡിഎഫ് സർക്കാർ കോടികൾ അനുവദിച്ചതായി വിവരാവകാശ രേഖകൾ. പുതിയ എയർ കണ്ടീഷണറുകൾ സ്ഥാപിക്കുന്നതിനും നിലവിലുള്ള സൗകര്യങ്ങൾ മെച്ചപ്പെടുത്തുന്നതിനും അധിക ലൈറ്റിങ് സംവിധാനങ്ങൾ ഒരുക്കുന്നതിനുമായി വലിയ തുക വകയിരുത്തിയെന്നാണ് രേഖകളിൽ വ്യക്തമാകുന്നത്. മന്ത്രിമന്ദിരങ്ങളിലെ എസി സംബന്ധമായ പ്രവൃത്തികൾക്കുമാത്രം 37,35,400 രൂപ അനുവദിച്ചതായാണ് വിവരം.
പൊതുപ്രവർത്തകനും സിപിഐ സംസ്ഥാന കൗൺസിൽ അംഗവുമായ പി.കെ. രാജു വിവരാവകാശ നിയമപ്രകാരം സമർപ്പിച്ച അപേക്ഷയ്ക്ക് ലഭിച്ച മറുപടിയിലാണ് മന്ത്രിമന്ദിരങ്ങളുടെ നവീകരണത്തിനായി അനുവദിച്ച തുകയുടെ വിശദാംശങ്ങൾ പുറത്തുവന്നത്. യുഡിഎഫ് സർക്കാർ അധികാരമേറ്റതിനുശേഷം മന്ത്രിമാരുടെ ഔദ്യോഗിക വസതികളിലെ അറ്റകുറ്റപ്പണികൾക്കും നവീകരണ പ്രവർത്തനങ്ങൾക്കുമായി അഞ്ച് കോടിയിലധികം രൂപയുടെ സാങ്കേതികാനുമതി നൽകിയിട്ടുണ്ടെന്നും രേഖകൾ വ്യക്തമാക്കുന്നു.
മന്ത്രിമാരുടെ ഔദ്യോഗിക വസതികൾ മോടിപിടിപ്പിക്കുന്നതിനായി അനാവശ്യമായി വലിയ തുക ചെലവഴിക്കില്ലെന്നായിരുന്നു വി.ഡി. സതീശൻ നേരത്തെ വ്യക്തമാക്കിയിരുന്നത്. എന്നാൽ, അധികാരത്തിലെത്തിയശേഷം സ്വീകരിച്ച നടപടികൾ ഈ പ്രഖ്യാപനത്തിന് വിരുദ്ധമാണെന്ന വിമർശനമാണ് ഉയരുന്നത്. പഴയ ഔദ്യോഗിക വാഹനങ്ങൾ തന്നെ ഉപയോഗിക്കുമെന്ന പ്രഖ്യാപനത്തിന് പിന്നാലെ 9.60 കോടി രൂപ ചെലവഴിച്ച് 24 പുതിയ ഇന്നോവ കാറുകൾ വാങ്ങാൻ സർക്കാർ തീരുമാനിച്ചതും നേരത്തെ വിവാദമായിരുന്നു.
മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലെ പ്രധാന കെട്ടിടത്തിലും ഔട്ട്ഹൗസിലെ മുറികളിലും എയർ കണ്ടീഷണറുകൾ സ്ഥാപിക്കുന്നതിന് 4,36,400 രൂപയാണ് എസ്റ്റിമേറ്റ് തയ്യാറാക്കിയിരിക്കുന്നത്. മന്ത്രി മോൻസ് ജോസഫിന്റെ ഔദ്യോഗിക വസതിയിൽ എസി സംബന്ധമായ പ്രവൃത്തികൾക്കായി 6,10,000 രൂപയും വി.ഇ. അബ്ദുൾഗഫൂർ താമസിക്കുന്ന കവടിയാർ ഹൗസിൽ 4,24,000 രൂപയും അനുവദിച്ചിട്ടുണ്ട്.
മന്ത്രി രമേശ് ചെന്നിത്തലയുടെ വസതിയിൽ 4,01,000 രൂപയും എം. ലിജുവിന്റെ ഔദ്യോഗിക വസതിയായ അജന്തയിൽ 3,70,000 രൂപയും എസി സ്ഥാപിക്കുന്നതിനും അനുബന്ധ പ്രവൃത്തികൾക്കുമായി വകയിരുത്തിയിട്ടുണ്ട്. അനൂപ് ജേക്കബ് താമസിക്കുന്ന മൻമോഹൻ ബംഗ്ലാവിൽ 3,69,000 രൂപയും പി.സി. വിഷ്ണുനാഥിന്റെ വസതിയിൽ 3,37,000 രൂപയുമാണ് അനുവദിച്ചിരിക്കുന്നത്.
മന്ത്രി കെ.എ. തുളസിയുടെ ഔദ്യോഗിക വസതിയിൽ 1,89,000 രൂപയും കെ.എം. ഷാജി താമസിക്കുന്ന പൗർണമിയിൽ 1,76,000 രൂപയും പി.കെ. ബഷീറിന്റെ വസതിയിൽ 1,67,000 രൂപയും അനുവദിച്ചിട്ടുണ്ട്. എൻ. ഷംസുദ്ദീന്റെ ഔദ്യോഗിക വസതിയായ നെസ്റ്റിൽ 1,61,000 രൂപയും കെ. മുരളീധരൻ താമസിക്കുന്ന സാനഡുവിൽ 60,000 രൂപയുമാണ് എസി പ്രവൃത്തികൾക്കായി വകയിരുത്തിയിരിക്കുന്നത്.
പി.കെ. കുഞ്ഞാലിക്കുട്ടിയുടെ ഔദ്യോഗിക വസതിയിൽ നിലവിലുള്ള എസി യൂണിറ്റുകൾ മാറ്റിസ്ഥാപിക്കുന്നതിനായി 35,000 രൂപയും രേഖപ്പെടുത്തിയിട്ടുണ്ട്. വിവിധ മന്ത്രിമാരുടെ വസതികളിൽ എയർ കണ്ടീഷണറുകൾ സ്ഥാപിക്കുന്നതിനും മാറ്റിസ്ഥാപിക്കുന്നതിനും അനുബന്ധ സൗകര്യങ്ങൾ ഒരുക്കുന്നതിനുമായി അനുവദിച്ച തുകയുടെ വിശദാംശങ്ങളാണ് വിവരാവകാശ മറുപടിയിൽ ഉൾപ്പെടുത്തിയിരിക്കുന്നത്.
എയർ കണ്ടീഷണറുകൾ സ്ഥാപിക്കുന്നതിനു പുറമേ മന്ത്രിമന്ദിരങ്ങളിലെ വൈദ്യുതീകരണത്തിനും മറ്റ് നവീകരണ പ്രവർത്തനങ്ങൾക്കുമായി ലക്ഷക്കണക്കിന് രൂപയാണ് അനുവദിച്ചിരിക്കുന്നത്. രമേശ് ചെന്നിത്തലയുടെ ഔദ്യോഗിക വസതിയായ പമ്പ ബംഗ്ലാവിൽ അധിക ലൈറ്റിങ് സംവിധാനങ്ങൾ ഒരുക്കുന്നതിനായി മാത്രം 7,39,000 രൂപയുടെ എസ്റ്റിമേറ്റാണ് അനുവദിച്ചിരിക്കുന്നത്.
മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലെ ചോർച്ച തടയുന്നതുമായി ബന്ധപ്പെട്ട ഇലക്ട്രിക്കൽ പ്രവൃത്തികൾക്കായി 3,50,000 രൂപയും വകയിരുത്തിയിട്ടുണ്ട്. കെട്ടിടങ്ങളുടെ അറ്റകുറ്റപ്പണികൾ, വൈദ്യുതീകരണം, എസി സ്ഥാപിക്കൽ, മറ്റ് അടിസ്ഥാനസൗകര്യങ്ങളുടെ നവീകരണം തുടങ്ങിയ വിവിധ ഇനങ്ങളിലായാണ് തുക അനുവദിച്ചിരിക്കുന്നത്.
വിവരാവകാശ രേഖകൾ പ്രകാരം യുഡിഎഫ് സർക്കാർ അധികാരത്തിലെത്തിയതിനുശേഷം മന്ത്രിമന്ദിരങ്ങളിലെ അറ്റകുറ്റപ്പണികൾക്കും നവീകരണ പ്രവർത്തനങ്ങൾക്കുമായി ആകെ 5,63,95,000 രൂപയുടെ ഭരണാനുമതിയാണ് നൽകിയിരിക്കുന്നത്. ഇതിൽ 5,06,71,000 രൂപയുടെ പ്രവൃത്തികൾക്ക് സാങ്കേതികാനുമതിയും ലഭിച്ചിട്ടുണ്ട്.
അനുമതി നൽകിയ പ്രവൃത്തികളിൽ ഇതുവരെ 2.10 കോടി രൂപയുടെ ജോലികൾ പൂർത്തിയാക്കി ബിൽത്തുക നൽകിയതായും രേഖകൾ വ്യക്തമാക്കുന്നു. ഭരണാനുമതിയും സാങ്കേതികാനുമതിയും ലഭിച്ച മുഴുവൻ തുകയും ഇതിനകം ചെലവഴിച്ചിട്ടില്ലെങ്കിലും വിവിധ നവീകരണ പദ്ധതികൾക്കായി കോടിക്കണക്കിന് രൂപ അനുവദിച്ചിട്ടുണ്ടെന്നതാണ് പുറത്തുവന്ന വിവരങ്ങൾ സൂചിപ്പിക്കുന്നത്.
സംസ്ഥാനത്തിന്റെ സാമ്പത്തിക സ്ഥിതിയും സർക്കാർ ചെലവുകൾ നിയന്ത്രിക്കേണ്ടതിന്റെ ആവശ്യകതയും ചർച്ചയാകുന്നതിനിടെയാണ് മന്ത്രിമാരുടെ ഔദ്യോഗിക വസതികൾക്കായി അനുവദിച്ച തുകയുടെ കണക്കുകൾ പുറത്തുവരുന്നത്. അധികാരത്തിലെത്തുന്നതിന് മുമ്പ് ചെലവുചുരുക്കലിന് പ്രാധാന്യം നൽകുമെന്ന് പ്രഖ്യാപിച്ച സർക്കാർ മന്ത്രിമന്ദിരങ്ങളുടെ നവീകരണത്തിന് ഇത്രയും വലിയ തുക അനുവദിച്ചതിനെച്ചൊല്ലി രാഷ്ട്രീയ വിമർശനം ശക്തമാകാൻ സാധ്യതയുണ്ട്.
അതേസമയം, അനുവദിച്ച തുകയിൽ എത്രയാണ് അനിവാര്യമായ അറ്റകുറ്റപ്പണികൾക്കെന്നും എത്രയാണ് സൗന്ദര്യവൽക്കരണത്തിനും അധിക സൗകര്യങ്ങൾക്കുമായി നീക്കിവച്ചതെന്നുമുള്ള വിശദമായ വേർതിരിവ് വ്യക്തമാകേണ്ടതുണ്ട്. വിവരാവകാശ രേഖകളിലൂടെ പുറത്തുവന്ന കണക്കുകളിൽ സർക്കാരിന്റെ വിശദീകരണവും പ്രധാനമാണ്.
ഈ വാർത്ത ഇംഗ്ലീഷിൽ വായിക്കുക: Read this news in English
