കൊല്‍ക്കത്ത: ബിർഭം അക്രമക്കേസിൽ കൊൽക്കത്ത ഹൈക്കോടതിയുടെ അന്വേഷണ ഉത്തരവിന് പിന്നാലെ റാംപുർഹട്ട് ബ്ലോക്ക് 1 പ്രസിഡന്റ് തൃണമൂൽ കോൺഗ്രസ് നേതാവ് അനറുൾ ഹഖിനെ സിബിഐ ചോദ്യം ചെയ്തു. ഇതിന് പുറമെ ഗ്രാമത്തിലെ ദൃക്‌സാക്ഷികളിൽ നിന്നും സിബിഐ സംഘം വിവരങ്ങൾ ശേഖരിച്ചു. ഞായറാഴ്ച ഫോറൻസിക് സംഘം വീണ്ടും ബാഗ്തുയിയിലെത്തി.
നാല് മണിക്കൂറിലധികം ഹുസൈനെ സിബിഐ ചോദ്യം ചെയ്തു. അതേ സമയം, കൊല്ലപ്പെട്ട ടിഎംസി നേതാവ് ഭാദു ഷെയ്ഖിന്റെ ബന്ധുവായ ആസാദ് ഷെയ്ഖിനെയും ചോദ്യം ചെയ്തു. ഭാദു ഷെയ്ഖിന്റെ മരണശേഷം ആസാദ് ഷെയ്ഖും അനാറുൾ ഹുസൈനും തമ്മിൽ ഫോണിൽ സംസാരിച്ചിരുന്നതായി സിബിഐ വൃത്തങ്ങൾ പറയുന്നു. ഇരയുടെ കുടുംബവുമായി ബന്ധമുള്ള മിഹിലാലിനേയും തിങ്കളാഴ്ച ചോദ്യം ചെയ്യുമെന്നാണ് വിവരം. വീടിന് തീവെച്ചപ്പോൾ മകൾ വിളിച്ചെങ്കിലും ആരും സഹായിച്ചില്ലെന്ന് മിഹിലാൽ ഷെയ്ഖ് ആരോപിച്ചിരുന്നു.
ഈ കേസിൽ ചോദ്യം ചെയ്യുന്നതിനായി ഗ്രാമീണരുടെ പട്ടികയും തയ്യാറാക്കിയിട്ടുണ്ടെന്ന് സിബിഐ വൃത്തങ്ങൾ പറയുന്നു. ഗ്രാമം വിട്ടുപോയവരെയും കണ്ടെത്തണമെന്ന് ഭരണകൂടത്തോട് ആവശ്യപ്പെട്ടിട്ടുണ്ട്. സിബിഐ ഡിഐജി അഖിലേഷ് സിംഗ് ഞായറാഴ്ച രാവിലെ രാംപൂർഹട്ട് ആശുപത്രിയിൽ എത്തിയിരുന്നു. പരിക്കേറ്റവരുടെ മൊഴി അദ്ദേഹം രേഖപ്പെടുത്തി. ഒരു സ്ത്രീയുടെ മൊഴിയെടുക്കാൻ സിബിഐക്ക് കഴിഞ്ഞില്ല. ഗുരുതരമായി പൊള്ളലേറ്റ അവര്‍ ആശുപത്രിയിൽ ചികിത്സയിലാണ്.
ബിർഭം അക്രമത്തിന് ശേഷം പശ്ചിമ ബംഗാളിലെ ക്രമസമാധാനം പ്രതിപക്ഷ പാർട്ടികള്‍ ലക്ഷ്യം വെച്ചിരിക്കുകയാണ്. അതിനിടെ, പോലീസിനെ രക്ഷിക്കാൻ മമത ബാനർജി രംഗത്തെത്തി . പോലീസിനെതിരെയും രൂക്ഷ വിമർശനമാണ് ഉയരുന്നത്. ഏതാനും പേരുടെ തെറ്റിന്റെ പേരിൽ മുഴുവൻ പോലീസ് വകുപ്പിനെയും അപകീർത്തിപ്പെടുത്തരുതെന്ന് മമത ബാനർജി അഭ്യര്‍ത്ഥിച്ചു. അക്രമത്തിൽ ഉൾപ്പെട്ട പ്രതികൾക്കെതിരെ അടിയന്തര നടപടി സ്വീകരിച്ചതായി മംമ്ത ബാനർജി പറഞ്ഞു. രാംപുർഹട്ട് പോലീസ് സ്റ്റേഷനിലെ ഓഫീസർ-ഇൻ-ചാർജിനെ ഉടൻ തന്നെ സസ്പെൻഡ് ചെയ്തതായും അവര്‍ പറഞ്ഞു.
