ഉക്രെയിനിലെ ബുച്ച പട്ടണത്തിൽ നടന്ന സംഭവങ്ങളെക്കുറിച്ചുള്ള ഉക്രെയ്‌ന്റെ അവകാശവാദം മോസ്കോയെ തകർക്കാൻ ലക്ഷ്യമിട്ടുള്ള “വ്യാജ ആക്രമണം” ആണെന്ന് റഷ്യന്‍ വിദേശകാര്യ മന്ത്രി സെർജി ലാവ്‌റോവ് പറഞ്ഞു. ഉക്രേനിയൻ പട്ടണത്തിൽ റഷ്യൻ സൈന്യം ‘നൂറുകണക്കിന് ആളുകളെ’ കൊന്നുവെന്ന് കിയെവും അമേരിക്കയടക്കം പാശ്ചാത്യ രാജ്യങ്ങള്‍ ആരോപിക്കുന്നു.
ബുച്ചയുടെ നിയന്ത്രണം പിടിച്ചെടുത്ത വേളയില്‍ സാധാരണക്കാരെ കൊല്ലുന്ന ഒരു പ്രവൃത്തിയിലും റഷ്യൻ സൈന്യം ഉൾപ്പെട്ടിട്ടില്ലെന്ന് ലാവ്‌റോവ് തിങ്കളാഴ്ച ആവർത്തിച്ചു. ഇൻറർനെറ്റിൽ പ്രചരിക്കുന്ന ഫൂട്ടേജുകളിൽ മൃതദേഹങ്ങൾ എന്ന് വിളിക്കപ്പെടുന്നവ “നാടകം” ആണെന്നും ആ ചിത്രങ്ങളും ഉക്രെയ്നിന്റെ തെറ്റായ സംഭവ വികാസങ്ങളും കിയെവും പാശ്ചാത്യ രാജ്യങ്ങളും സോഷ്യൽ മീഡിയയിൽ പ്രചരിപ്പിക്കുകയാണെന്നും ലാവ്‌റോവ് പറഞ്ഞു.
“കഴിഞ്ഞ ദിവസം, കിയെവ് മേഖലയിലെ ബുച്ചാ നഗരത്തിൽ നിന്ന് റഷ്യന്‍ സൈനികർ പിന്മാറി കുറച്ച് ദിവസങ്ങൾക്ക് ശേഷം അവിടെ ഒരു വ്യാജ ആക്രമണം അരങ്ങേറി, അത് എല്ലാ ചാനലുകളിലും സോഷ്യൽ മീഡിയകളിലും ഉക്രേനിയൻ പ്രതിനിധികളും അവരുടെ പാശ്ചാത്യ രക്ഷാധികാരികളും പ്രചരിപ്പിച്ചു,” റഷ്യൻ വിദേശകാര്യ മന്ത്രി മോസ്കോയിൽ യുഎൻ അണ്ടർ സെക്രട്ടറി ജനറൽ ഫോർ ഹ്യൂമാനിറ്റേറിയൻ അഫയേഴ്സ് മാർട്ടിനുമായുള്ള ചർച്ചയിൽ പറഞ്ഞു.
തലസ്ഥാനത്ത് നിന്ന് 37 കിലോമീറ്റർ വടക്ക് പടിഞ്ഞാറ് മാറി പുതുതായി മോചിപ്പിക്കപ്പെട്ട പട്ടണമായ ബുച്ചയിൽ റഷ്യ നടത്തിയ “ക്രൂരമായ കൊലപാതകം” എന്ന് വിശേഷിപ്പിച്ച് മോസ്കോയ്ക്കെതിരെ പുതിയ ഉപരോധം ഏർപ്പെടുത്താൻ അമേരിക്ക ഉൾപ്പെടെയുള്ള പ്രധാന പാശ്ചാത്യ ശക്തികളോട് കിയെവ് ഞായറാഴ്ച അഭ്യർത്ഥിച്ചു.
300 പേരെ റഷ്യൻ സൈന്യം കൊന്നതായി ശനിയാഴ്ച ഒരു വീഡിയോ സന്ദേശത്തിൽ ബുച്ചയുടെ മേയർ അനറ്റോലി ഫെഡോറുക് അവകാശപ്പെട്ടു. ചിലരെ വെടിയേറ്റ് വീഴുന്നതിന് മുമ്പ് കൈകാലുകള്‍ ബന്ധിപ്പിച്ചതായി തോന്നുന്നു. റഷ്യൻ സൈന്യം കൊല്ലുകയോ വധിക്കുകയോ ചെയ്തവരുടെ മൃതദേഹങ്ങൾ കാണിക്കുന്ന ഫൂട്ടേജുകളും ഫോട്ടോഗ്രാഫുകളും അദ്ദേഹം അവതരിപ്പിച്ചു. 280 മൃതദേഹങ്ങൾ കൂട്ടക്കുഴിമാടങ്ങളിൽ അടക്കം ചെയ്തുവെന്നും മറ്റ് 10 ഓളം മൃതദേഹങ്ങൾ അടക്കം ചെയ്യാത്തതോ ഭാഗികമായി മാത്രം മണ്ണിനാൽ മൂടപ്പെട്ടതോ ആണെന്നും അവകാശപ്പെട്ടു.
ബുച്ചയിൽ റഷ്യൻ സൈന്യം “വംശഹത്യ” നടത്തുകയാണെന്ന് ഉക്രേനിയൻ പ്രസിഡന്റ് വോളോഡിമർ സെലെൻസ്കി പറഞ്ഞു. ഇത് യുദ്ധക്കുറ്റമാണെന്നും, ഈ “മനഃപ്പൂര്‍‌വ്വമായ” കൂട്ടക്കൊലയെക്കുറിച്ച് അന്വേഷിക്കുമെന്ന് അദ്ദേഹത്തിന്റെ വിദേശകാര്യ മന്ത്രി ദിമിട്രോ കുലേബ പറഞ്ഞു.
“കൂട്ടക്കുഴിമാടങ്ങൾ”, “വധിക്കപ്പെട്ട” സിവിലിയന്മാർ എന്നീ ആരോപണങ്ങൾ പാശ്ചാത്യ രാജ്യങ്ങളില്‍ രോഷത്തിന് കാരണമായി. ബ്രിട്ടൻ, ഫ്രാൻസ്, ജർമ്മനി, ഇറ്റലി, യൂറോപ്യൻ യൂണിയൻ എന്നീ രാജ്യങ്ങൾ ഹേഗിലെ അന്താരാഷ്ട്ര ട്രൈബ്യൂണലിൽ ഉത്തരവാദികളായവരെ നിയമത്തിന് മുന്നിൽ കൊണ്ടുവരണമെന്ന് ആവശ്യപ്പെട്ടു.
മാർച്ച് 30 ന് റഷ്യൻ സൈന്യം ബുച്ചയിൽ നിന്ന് പൂർണ്ണമായും പിൻവാങ്ങിയതായും ലാവ്‌റോവ് തിങ്കളാഴ്ച പറഞ്ഞു.
