പിത്തോരാഗഡ് (ഉത്തരാഖണ്ഡ്): ഒടുവിൽ, ധാർചുലയിലെ ഇന്ത്യ-ചൈന അതിർത്തിയിലെ നാഭിധാങ്ങിലെ നിരോധിത പ്രദേശത്ത് അനധികൃതമായി താമസിച്ച 27 കാരിയായ യുവതിയെ പോലീസ് തിരിച്ചു കൊണ്ടുവന്നു.
നേരത്തെ, താൻ പാർവതി ദേവിയുടെ അവതാരമാണെന്ന് അവകാശപ്പെട്ട് ശിവനെ വിവാഹം കഴിക്കണമെന്ന ആവശ്യത്തിൽ ഉറച്ചുനിൽക്കുകയും, നിരോധിത പ്രദേശത്ത് നിന്ന് മടങ്ങാൻ അവര്‍ വിസമ്മതിക്കുകയും ചെയ്തു. പോലീസ് പറയുന്നതനുസരിച്ച്, ഉത്തർപ്രദേശിലെ അലിഗഞ്ച് പ്രദേശത്തെ താമസക്കാരിയായ ഹർമീത് കൗർ, എസ്ഡിഎം ധാർചുല നൽകിയ 15 ദിവസത്തെ അനുമതി പ്രകാരമാണ് അമ്മയോടൊപ്പം ഗുഞ്ചിയിലേക്ക് പോയത്. എന്നാല്‍, പിന്നീട് നിരോധിത പ്രദേശം വിടാൻ തയ്യാറായില്ല. അനുമതി മെയ് 25 ന് അവസാനിച്ചു, പിത്തോരാഗഡ് എസ്പി ലോകേഷ് സിംഗ് പറഞ്ഞു.
നൽകിയ കാലാവധി കഴിഞ്ഞിട്ടും അവര്‍ തിരികെ വരാൻ വിസമ്മതിച്ചു. അതിനുശേഷം അമ്മയ്ക്ക് വീണ്ടും കുറച്ച് ദിവസത്തേക്ക് മറ്റൊരു പെർമിറ്റ് ലഭിച്ചു, പക്ഷേ ഹർമീതും മടങ്ങാൻ തയ്യാറായില്ല. ക്ഷീണിതയായ അമ്മ അവിടെ നിന്ന് മടങ്ങിയെത്തി ഭരണകൂടത്തോട് സഹായം അഭ്യർത്ഥിച്ചു.
നിരോധിത മേഖലയിൽ നിന്ന് ബലം പ്രയോഗിച്ച് മാറ്റിയാൽ ആത്മഹത്യ ചെയ്യുമെന്ന് ഹർമീത് ഭീഷണിപ്പെടുത്തിയതായി പോലീസ് പറഞ്ഞു. ഇതോടെ യുവതിയെ കൊണ്ടുവരാൻ പോയ പൊലീസ് സംഘം വെറുംകൈയോടെ മടങ്ങി. അതിനുശേഷം, 12 അംഗ പോലീസ് സംഘത്തെയും മെഡിക്കൽ ഉദ്യോഗസ്ഥരെയും നാഭിധാംഗിലേക്ക് അയച്ച് യുവതിയെ ബലമായി ധാർചുലയിലേക്ക് ഇറക്കി. യുവതിയെ ധാർചുലയിലേക്ക് കൊണ്ടുവന്നപ്പോൾ അവരുടെ കുടുംബാംഗങ്ങളും അവിടെ എത്തിയിരുന്നു. അവിവാഹിതയായ യുവതിക്ക് മാനസിക അസ്വസ്ഥതയുണ്ടെന്ന് തോന്നുന്നതായി പിത്തോരാഗഡ് എസ്പി ലോകേഷ് സിംഗ് പറഞ്ഞു.
